Төр хувийн хэвшлийн байгууллага, гадаад дотоодын хөрөнгө оруулагчдын хамтын ажиллагааг хөгжүүлэх, тэдэнд барилгын салбарын бодлогыг танилцуулах зорилгоор зохион байгуулж байгаа “Construction Mongolia 2013” олон улсын хурал төрийн ордонд нээлтээ хийлээ.

      Энэхүү хурал нь БХБЯ-аас 2013 оныг “Барилга хот байгуулалтын салбарын бодлого, эрх зүйн орчинг шинэчлэх жил” болгон зарласантай холбогдуулан болж байгаа юм байна.

Хурлын эхэнд БХБ-ын сайд Ц.Баярсайхан “Барилгын салбарт төрөөс хэрэгжүүлж буй бодлого” сэдвээр илтгэл тавьлаа.

      Үүний дараа НҮБХХ-ийн Монгол дахь суурин төлөөлөгчийн орлогч Томас Эриксон “Барилгын салбар дахь эрчим хүчний хэмнэлт ба ногоон эдийн засаг” сэдвээр мэдээлэл өглөө. Тэрээр Монголын барилгын салбар “ногоон эдийн засаг” –ийг хөгжүүлэх бүрэн боломжтойг онцлон хэллээ.  

    Түүний хийсэн мэдээллээс харахад манай улсын эрчим хүчний алдагдал 2010 онд өмнөх оноос 2 дахин нэмэгдсэн байна. Гэр хорооллын иргэд орон сууцанд амьдардаг иргэдээс 16 дахин их мөнгийг цахилгаан эрчим хүч, дулаанд зарцуулж байгааг дуулгалаа. Эндээс харахад МУ-д эрчим хүчний үнэ харьцангуй үйлчилж байна гэлээ. Мөн хүлэмжийн хийг бууруулсан аж ахуйн нэгжид урамшуулал олгодог системийг нэвтрүүлэх нь чухал хэрэгтэйг онцоллоо.

     Дээрх асуудлуудыг шийдэх гарц нь барилгын компаниуд барилгын материал хийцийг дахин ашиглах, байгальд ээлтэй технологи ашиглах буюу ногоон эдийн засгийг үйл ажиллагаандаа нэвтрүүлэх шаардлагатай.  Ингэснээр эрчим хүчийг 30%-иас дээш хувиар хэмнэх боломж бүрдэх юм.

/АНУ-ын өндөр барилга, хот байгууламжийн зөвлөлийн төлөөлөгч Даниэл Сафарик/

     Түүнчлэн “Монгол Улсын дэд бүтцийн хөгжилд Жайкагийн хэрэгжүүлж буй төслүүд”, “Өндөр барилгын олон улсын чиг хандлага” гэсэн сэдвээр ОУ-ын байгууллага болон хуралд оролцогч байгууллагууд мэдээлэл хийсэн юм.

/Хурлын үеэр хот байгуулалтын түүхийг харуулсан үзэсгэлэн гарлаа/

     Хуралд барилгын салбарт үйл ажиллагаа явуулж байгаа аж ахуйн нэгж, байгууллагуудын төлөөлөл, мэргэжлийн  төрийн бус байгууллагууд болон гадаадын 11 улс орны төлөөлөл оролцон Монголын барилгын салбарын талаар санал бодол, мэдээллээ солилцож байгаа юм.  

“Construction Mongolia 2013” олон улсын хурал маргааш төрийн ордонд 10.30 минутаас эхлэн үргэлжлэх юм.