Сүүлийн хэдэн жил барилга, бүтээн байгуулалтын салбар эрчимтэй хөгжиж, гоё ганган, өндөр сүрлэг барилгууд олноор сүндэрлэх болсон. Гэвч  сайны хажуугаар саар гэгчээр өнгө үзэмж төдийхнөөр хүний анхаарал татсан чанаргүй, орчныхоо аюулгүй байдлыг алдагдуулсан барилга байгууламж ч баригдсаар байна. Эдгээр асуудалтай барилгын талаар иргэдийн зүгээс манай сэтгүүлд хандаж санал гомдол ирсээр байгаа юм. Тиймээс энэ удаагийн “Асуудал дагуулсан барилгууд”  цуврал сурвалжлагаа сэтгүүлийн хаягаар ирсэн иргэдийн санал хүсэлтийн дагуу бэлтгэлээ.

      Манай сэтгүүлд “Өнгөрсөн оны 10-р сард Кореа Таун II хотхонд 2 өрөө орон сууцыг 100% төлбөрийг нь төлөөд худалдах, худалдан авах гэрээ байгуулсан. Гэрээнд 2013 оны 1-2 улиралд ашиглалтанд орно гэсэн заалт бий. Уг барилга нь одоогоор 100% баригдаж дууссан. Цэвэрлэгээ, гадна тохижилт зэргийг дуусгаад 3 сар болж байна. Одоо тэнд ганцхан хамгаалагч сууж байдаг. Захиалагчид өдөр болгон очиж хөөрхий манаачтай хэрэлдэж хэзээ улсын комисс хүлээж авах хугацаа асуудаг. 3 сарын турш УЛСЫН КОМИСС-ыг хүлээж байна гэх тайлбар сонслоо. Захиалагч бидэнд мэдээлэл хэрэгтэй байна. Уг байрны статус ямар байгааг мэдээлж өгнө үү?” гэсэн хүсэлт ирсэн юм. Бид уг хүсэлтийн дагуу Нийслэлийн Ерөнхий Төлөвлөгөөний Газараас тодруулахад Корей таун 2 хотхоны барилгад  Улсын комисс ажиллуулах хүсэлт ирээгүй гэсэн хариултыг өглөө. Ингээд тус орон сууцны борлуулалт хариуцсан ажилтантай утсаар холбогдож улсын комисс ажиллуулах хүсэлтийг яагаад гаргахгүй байгаа, хэзээ хүсэлт гаргахыг лавлахад барилгын ажил саяхан дууссан, 9 дүгээр сарын сүүлээр Улсын комисс ажиллуулах хүсэлтээ гаргана гэв. Корей таун 2 хотхонд очиж үзэхэд барилгын ажил нь бүрэн дууссан байсан бөгөөд сарын өмнө борооны улмаас гараж нь усанд автсан гэсэн мэдээлэл гарч байсан учир одоо байдал ямар байгааг тодруулахыг хүссэн ч биднийг дотогш оруулж, зураг авахыг зөвшөөрөөгүй юм. Төлбөрөө бүрэн төлчихөөд байрандаа орж чадахгүй олон иргэн айлын хажуу өрөөнд, хашаа байшинд тух алдан суугаа гэдгийг Тогтохжаргал ХХК –ийнхан анхааралдаа авна бизээ.

          Иргэдийн аюулгүй байдлыг алдагдуулсан нэгэн барилга хотын төвд сүндэрлээд удаж байна. Туушин зочид буудлын үүдний түр зогсоол нь явган явган хүний зам талбайг булаагаад барьчихсан учир иргэд автозамаар зорчихоос өөр аргагүйд хүрч, машин тэрэгтэй зэрэгцэн алхах болсон. Мөн "Туушин" компанийн 25 давхар зочид буудлын барилгатай холбоотой өөр нэг асуудал бол зураг төслийг нь шилэн ханатай байхаар төлөвлөсөн ч хиймэл чулуун хавтангаар барьснаас барилгын даацад ачаалал ирээд байгаа аж.  Монголдоо хамгийн өндөр, таван одтой зочид буудал гэгдэх Туушингийн барилгын чанар, аюлгүй байдлын баталгаа хэдэн од юм бол доо.

            Бидний дараагийн сурвалжилсан барилга бол Баянгол дүүргийн 2-р хороо буюу төмөр замд 5 жилийн өмнө баригдаж эхэлсэн ч одоог хүртэл дуусаагүй, балгас мэт дүнхийх Исламын сүмийн барилга юм. Тус сүмийг УИХ-ын гишүүн асан К.Сайраан бариулж байгаа ч санхүүжилт байхгүйн улмаас барилгын ажил нь зогсоод байгаа аж. Төв замаар явж буй хэн бүхэнд харагдах энэхүү дуусдаггүй барилга дотор одоогийн байдлаар нэгэн тавилгын үйлдвэр үйл ажиллагаа явуулдаг бөгөөд бүтэн 5 жил хотын өнгө үзэмжийг гутаан дүнхийсээр байна.

Сэтгүүлч Б.Цолмонтуяа