Жилээс жилд барилгажилтын ажил эрчимжиж, хот хөдөөгүй бүтээн байгуулалт олноор өрнөж байгаа тул барилгын арматурын эрэлт улам бүр өссөөр байгаа билээ. Үүнээс шалтгаалж төмрийн хүдрийн үйлдвэрлэлийн хэмжээ ч жил ирэх бүр нэмэгдэж байна. Тиймээс Засгийн газраас төмөрлөгийн үйлдвэрийн салбар тэр дундаа төмрийн баяжмал үйлдвэрлэл болон барилгын арматур үйлдвэрлэлийг дэмжих зорилгоор 50 сая ам.долларыг “Чингис бонд”-ны хөрөнгөнөөс гаргахаар шийдвэрлэсэн.

       “Монгол төмөр” хөтөлбөрийг боловсруулах ажлын хэсгээс манай улсын дотоодын нийт төмрийн хэрэглээ болон төмрийн хүдрийн нөөцийг газар нутгийн байдлаар судлах, монгол оронд төмөр, төмөрлөг бүтээгдэхүүнийг үйлдвэрлэх таатай нөхцлийг судлах, байгаль орчинд хал багатай шилдэг технологийг нэвтрүүлэх санал боловсруулах үүрэг бүхий судалгааны багийг томилон ажиллаж байна.

          Одоогийн байдлаар Монгол улсад барилгын арматур үйлдвэрлэдэг 12 үйлдвэр, цех байдаг ч иж бүрнээр ажилладаг нь ганц Дарханы төмөрлөгийн үйлдвэр юм. Энэ онд хийгдсэн судалгаагаар Төв аймагт жилдээ 4500 тонны 2 үйлдвэр, Зүүнхараад жилдээ 2000 тонны нэг үйлдвэр, Улаанбаатар хотод 17000 тонны хүчин чадалтай 7 үйлдвэр ажилладаг бол Дарханы Төмөрлөгийн үйлдвэр жилдээ 52400 тонн арматур үйлдвэрлэдэг ажээ.

         Уул уурхайн сайд, Эдийн засгийн хөгжлийн сайд, Үйлдвэр хөдөө аж ахуйн сайдын хамтарсан тушаалаар "Монгол төмөр", "Монгол зэс" хөтөлбөр боловсруулах ажлын хэсэг байгуулагдсан. Тус хөтөлбөрийн хүрээнд гангийн үйлдвэр, зэс хайлуулах болон цэвэршүүлэх үйлдвэр барих нэгдсэн төлөвлөгөө гаргахаар болжээ. Тус ажлын хэсгийн ахлагч Үйлдвэр хөдөө аж ахуйн дэд сайд Д.Цогтгэрэл энэ талаар "Манай улс төмрийн хүдрийн болон зэсийн асар их баялагтай. Төмрийн тэрбум орчим тонн нөөц илэрсэн. Энэ бүгдийг ямар техник технологи хэрэглэж эцсийн бүтээгдэхүүн болгох вэ гэсэн цогц хөтөлбөрийг боловсруулна” гэлээ.