Барилгын салбар дахь хөдөлмөрийн аюулгүй ажиллагаа сэдэвт үзүүлэх сургалтыг Баянзүрх дүүрэг дэх Мэргэжлийн хяналтын хэлтэс, Баянзүрх дүүргийн Онцгой байдлын хэлтэс, “Тайгам алтай” ХХК хамтран 2013 оны 10 дугаар сарын 08-ны өдөр Тайгам Алтай ХХК-ны Олимп хотхоны барилгын талбайд амжилттай зохион байгууллаа. 

       Үзүүлэх сургалтанд Баянзүрх дүүрэгт барилга угсралтын үйл ажиллагаа явуулж байгаа 33 компаний Хөдөлмөрийн аюулгүй байдлын 63 инженер техникийн ажилчид хамрагдсан.

      Уг үйл ажиллагаанд Баянзүрх дүүргийн Мэргэжлийн хяналтын хэлтсийн хөдөлмөрийн аюулгүй байдлын хяналтын улсын байцаагч Д.Хорлоо Барилгын салбарт 2013 онд хийсэн хяналт шалгалтын талаар мэдээлж, "Тайгам Алтай" ХХК-ний Хөдөлмөрийн аюулгүй байдлын албаны дарга Н.Эрдэнэзуу хөдөлмөрийн аюулгүй байдлыг хангах талаар хийж байгаа ажлын туршлагаасаа танилцууллаа.

  Мөн Олимп хотхон хариуцсан ерөнхий менежер У.Жанибек барилгын талбайн зохион байгуулалт, хотхоны төлөвлөлтийн талаар танилцуулсны дараа барилгын талбай дээрх хөдөлмөрийн аюулгүй байдлыг барилга дээр үзүүллээ. Нийслэлийн Мэргэжлийн хяналтын газрын барилга техникийн хяналтын улсын байцаагч Д.Дашдаваа өргөх зөөх машин механизмын аюулгүй ажиллагааны талаар мөн Онцгой байдлын хэлтсээс гал унтраах зааварчилгааг барилгын талбай дээр өглөө.

      Үзүүлэх сургалтын төгсгөлд барилгын салбарт үйл ажиллагаа явуулж буй аж ахуйн нэгж, байгууллагууд нь дотоодын хяналтыг сайжруулж, нийт ажиллагсадын мэргэжил, мэдлэгийг дээшлүүлэн барилга угсралтын үед дагаж мөрдөх норм дүрмийг баримтлан улам сайн ажиллах шаардлагатай байгааг тэмдэглээд оролцсон нийт барилгын компаниудад Баянзүрх дүүрэг дэх Мэргэжлийн хяналтын хэлтсээс хөдөлмөрийн аюулгүй байдал, эрүүл ахуйн талаарх 20 заалт бүхий  зөвлөмжийг хүргэлээ.

      Энэ арга хэмжээг зохион байгуулснаар барилгын салбарт ажиллаж байгаа аж ахуй нэгж байгууллагууд нь хоорондоо хөдөлмөрийн аюулгүй байдлын талаар хийж байгаа ажлын туршлага солилцож харилцан үр дүнд хүрэх юм.