Монголын үндэсний худалдаа аж үйлдвэрийн танхимд ОХУ-ын Эрхүү мужийн танилцуулах арга хэмжээ явагдаж байна. Уг арга хэмжээнд ОХУ-ын Эрхүү мужийн Амбан захирагч Ерощенко Сергей Владимирович тэргүүтэй
төлөөлөгчид ирж оролцож байгаа бөгөөд энэ үеэр ХАА, Байгаль орчин, Эрчим хүч, Зам Тээвэр, Барилга, Аялал Жуучлалын Яамдууд, орон нутгийн захиргаа болон Дорнод Сибирын Худалдаа Аж Үйлдвэрийн Танхимын гишүүд хүрэлцэн ирж, хамтран ажиллах ажил хэргийн уулзалт зохион байгууллаа.

        Бизнес уулзалтын үеэр Эрхүү мужийн амбан захирагчийн орлогч Дубровин Сергей Иннокентьевич хэлсэн үгэндээ: “Монгол улс Эрхүү мужийн хувьд олон улсын нэг гол түншлэгч орон байсан, цаашид ч байх болно. 2012 оны байдлаар манай мужийн Монгол улстай хийсэн гадаад худалдааны бараа эргэлт 440 сая ам.доллар давсан. Энэ нь Орос Монголын нийт гадаад худалдааны бараа эргэлтийн дөрөвний нэг юм. Эрхүү мужаас Монголд экспортолж байгаа гол чиглэлүүд бол шатахуун эрчим хүчний бүтээгдэхүүн \энэ нь нийт барааны 80 хувь\,  хүнс боловсруулах салбарын бүтээгдэхүүн, химийн үйлдвэрийн бүтээгдэхүүн, бордоо болон мод боловсруулах бүтээгдэхүүн байна.

Бидний цаашдын үйл ажиллагааны зарим чиглэлд та бүхний анхаарлыг хандуулмаар байна. Экспортын зорилгоор Ковыктоны байгалийн хийн орд газраас Монгол улсын нутгаар дамжуулан магистраль хоолойг барих төслийг хэрэгжүүлэх сонирхолтой байгаа. Эрхүү-Улаанбаатар-Зүүн өмнөд Азийн орнууд чиглэлийн шууд нислэгүүдийг зохион байгуулах талаар хамтран ажиллахад бэлэн байна. Мөн Эрхүү мужийн машин үйлдвэрийн цогцолборууд нь Монголын уул уурхай болон бусад салбарын тоног төхөөрөмжийн нийлүүлэлтийг хэмжээг нэмэхэд бэлэн.

Өнөөдрийн арга хэмжээ нь бидний цаашдын олон жилийн түншлэлийн харилцааны үндэс суурийг тавьж байгаа гэдэгт итгэлтэй байна. та бүгдэд чин сэтгэлээсээ ажлын өндөр амжилт, үр дүнтэй гэрээ хэлэлцээр хийхийг хүсье.” гэсэн юм.

Мөн арга хэмжээний хүрээнд Эрхүү мужийн бараа бүтээгдэхүүний үзэсгэлэняармаг МҮХАҮТ-ын үзэсгэлэнгийн их зааланд зохиогдож байна. Өчигдөр нээлтээ хийсэн уг үзэсгэлэн хоёр өдөр үргэлжилнэ.

Үзэсгэлэнгийн нээлтийн үеэр

Бизнес уулзалт

Үзэсгэлэнд оролцогч "Сибекспоцентр" компаний Эрхүү мужид тогтмол зохион зохион байгуулдаг үзэсгэлэнгийн хуваарь

Хөдөлгөөнт хийц үйлдвэрлэгч "Братский завод мобильных конструкций" компаний танилцуулга.

Сэтгүүлч Б.Цолмонтуяа