Барилга, хот байгуулалтын сайд Ц.Баярсайхан болон БХБЯ-ны Төрийн нарийн бичгийн дарга Р.Эрдэнэбүрэн, БХБЯ-ны ББМҮБХЗГ-ын дарга Б.Цэдэнсамба нар Дорноговь аймагт  баригдаж байгаа цементийн үйлдвэрүүдтэй танилцаад ирлээ.

       Дорноговь аймгийн Даланжаргалан сумын нутаг орших элс, хайрга, гөлтгөнө, шохойны орд газрууд дээр түшиглэн МАК, Гермес Гахиур компани цементийн үйлдвэр байгуулж байна.   МАК компанийн Хөх цавын  цементийн үйлдвэр  ирэх оны 3-р улиралд ашиглалтанд орох боломжтой байна.Гэхдээ ирэх жил үйлдвэрийн тохиргоог хийх нарийн мэргэжлийн ажилчид нэн шаардлагатай байгаа ба 1300 ажиллах хүчин гаднаас авахыг Засгийн газраас зөвшөөрч квот өгвөл ирэх жилийн өдийд үйлдвэрийнхээ нээлтийг хийнэ гэж МАК ХХК-ийн ерөнхийлөгч н. Нямтайшир хэлж байсан юм.

       Хөх цавын цементийн үйлдвэр нь шилдэг технологи болох хуурай аргаар цемент үйлдвэрлэнэ.  Шинэ үйлдвэр нь жилд 1-2 сая тонн цемент үйлдвэрлэх хүчин чадалтай.  Шинэ технологи,   шилдэг тоног төхөөрөмж оруулж ирэх үүднээс  Данийн Flsmidth компанитай  төслөө хамтран хэрэгжүүлж байна. 

     Орчин үеийн цементийн энэхүү үйлдвэрийг БНХАУ-ын JHY компанийн ажилчид 1 жилийн дотор гол нурууг нь босгожээ. Эдний үйлдвэрээс PC42,5  PC52,5  PC62,5 маркийн цемент гарах бөгөөд эх орныхоо барилгын материал үйлдвэрлэгчдийг цементээр хангаад зогсохгүй цаашид экспортонд гаргах боломжтой гэнэ.

       Манай улсын цементийн жилийн хэрэгцээ 4 сая тонн-д  дөхөж байна. Хөх цавын үйлдвэр бүрэн хүчин чадлаараа ажиллавал жилд 2 сая тонн орчмыг Хөтөл 1 сая тонныг бусад жижиг үйлдвэрүүд үлдсэн хэрэгцээг хангах дүр зураг  ирэх оны эцэс гэхэд харагдаж байна.

      Ингэж чадвал цементийн импортын хамаарлаас бүрэн гарах учраас салбарын сайд шинээр баригдаж байгаа цементийн үйлдвэрүүдийн явц байдлыг газар дээр нь очиж үзлээ.