Барилгын салбарын цогц мэдээллийг иргэддээ хүргэхийг гол зорилгоо болгон ажилдаг “Барилга.МН” сэтгүүлийн шинэ дугаар, шинэ өнгө төрх, шинэ мэдээлэлтэйгээр уншигч, захиалагчдынхаа гарт очлоо.

      Энэ дугаараас уншигч та бүхэн барилгын салбарын хөгжилд тээг, тушаа болсон асуудлуудыг мэргэжлийн төрийн бус байгууллагуудын төлөөлөл юу гэж тодорхойлсныг унших боломжтой. Мөн салбар эрхэлсэн яамнаас 2013 онд шинэчлэлийн талаар авч хэрэгжүүлсэн ажил “Барилгын тухай хууль”  нь барилгын салбарт үйл ажиллагаа явуулж байгаа байгууллага, аж ахуйн хэмжээнд төдийлэн мэдрэгдэхгүй байна гэсэн хариултыг өгч байна.

     Түүнчлэн барилгын материалын үйлдвэрлэл шинээр эрхлэх гэж байгаа хүмүүст гарын авлага болохуйц мэдээллийг мэргэжлийн холбооноос бэлтгэн оруулсныг дуулгаж байна.

“Барилга.МН” сэтгүүлийн шинэ дугаарт орсон мэдээллүүдээс тоймлон хүргэе

Дугаарын зочин

    Энэ дугаартаа барилгын салбарт үйл ажиллагаа явуулдаг мэргэжлийн 11 холбоог нэгтгэсэн Барилгын Хөгжлийн Үндэсний Нэгдсэн Төвийн ТУЗ-ийн дарга Г.Мягмарыг урьж оролцууллаа. Ярилцлагын гол сэдэв нь барилгын салбарын шинэчлэлийн эргэн тойронд өрнөсөн юм.

     Төрийн байгууллагын зарим чиг үүргийг төрийн бус байгууллагад шилжүүлэхгүй байгаагийн гол шалтгаан, нөхцлийг юу гэж үзэж байгааг энэхүү дугаараас уншаарай.

... Салбарын төрийн бус байгууллага гэдэг бол одоо ажиллаж байгаа ганц нэг хүний асуудал ч биш, салбарын хүрээний мэргэжилтнүүдийн дийлэнхи олонхийг өөртөө багтаасан, цаашид залгамж халгаа үүсгэн тасралтгүй үргэлжлэх үйл ажиллагаа бүхий мэргэжлийн байгууллага юм.  Манай мэргэжлийн холбоод мэргэжлийн үйл ажиллагааг зохион байгуулах, авч явах тал дээр одоогийн төрийн байгууллагаас хамаагүй илүү чадвар чадавхитай ...

Мэдээ мэдээлэл

     Улаанбаатар урагшилсаар цуврал мэдээллийг бэлтгэн оруулсаар багагүй хугацаа өнгөрлөө. Мэдээллийнхээ багцад Улаанбаатар хотын өнгө төрхөнд хувь нэмрээ оруулсан бүтээн байгуулалт, шинээр тохижуулсан гудамж талбай, нийслэлийн хөгжилд нөлөөлөхүйц “бүтээлч” ажлуудыг онцолдог билээ.

     Энэ удаа сургуулийн бага насны хүүхдүүдийг авто ослоос сэргийлэх зорилгоор санаачилсан 3Dгарцын талаарх мэдээллийг багтаалаа. Мөн бохирдлоосоо болж ширгэх дээрээ тулаад байгаа “Туул, Дунд голын эргийг архигүй орчин болгоно” гэсэн таатай мэдээллийг багц мэдээлэлдээ орууллаа.

    Сүүлийн жилүүдэд Монголын барилгын салбарт гадны хөрөнгө оруулалт, барилгын салбараараа дэлхийд тэргүүлэгч улс орны барилгын компаниуд нэмэгдэж байгаа. Тэгвэл ОХУ-ын Эрхүү мужийн барилгын компаниудтай хамтран ажиллах боломж бүрдлээ. Дэлгэрэнгүй мэдээллийг Барилга.МН сэтгүүлийн 11-р сарын дугаараас унших боломжтой.

Асуудал хөндсөн сэдэв

     Монгол улс барилгын материалын талаас илүү хувийг импортоор авч хэрэглэдэг, тэр дундаа урд хөрш Хятад улсаас бүрэн хараат гэж хэлж болно. Тиймээс жилийн жилд барилгын ажлын улирал эхэлмэгц барилгын материалын үнэ өсөж, зарим үед хомсдол үүсдэг нэг зовлон бий. Мэдээж үүнээс гарах гарц нь дотоодын үйлдвэрлэлийг дэмжих, дэд бүтцээр хангах чиглэлээр шинэчлэл хийх явдал.

     Хэрэв барилгын үндсэн түүхий эд, гадна, дотор заслын материалаа дотооддоо улирал харгалзахгүй, их хэмжээтэй, стандартын шаардлага хангасан чанартайгаар үйлдвэрлэдэг болчихвол барилгын нийт төсөвт өртгийг 15-25 хувь хүртэл хэмнэх  боломжтой болох ажээ.

Дуулгах мэдээ

      Зам дагаж хөгжил ирнэ гэдэг. Гэвч хөгжилд хөтлөх замаа танигдахын аргагүй эвдэлж сүйтгэдэг нь монголчуудын зан уу? эсвэл зам тавих хөрөнгө мөнгөнөөс нь ар өврийн хаалгаар “идэж” замаа “нимгэлдэг”, нарийсгадаг эсвэл зайлшгүй байх жор найрлагыг нь технологийн дагуу бүрэн хийхгүй өөдгүй зангаас үүдэлтэй юу уу?. Ямартай ч жил бүр л зам засварын ажил хийдэг хэрнээ зассан зам нь ойндоо хүрэлгүй эвдэрч, “нөхөөс” байнга л тавихаас өөр аргагүйд хүрдэг. Тэгээд л дуусдаггүй ажил, бухимдал, үрэлгэн зардал ёс юм шиг урсан гардаг. Авто замын тэр эвдрэл, гэмтэл нь хэд хэдэн шалтгаан нөхцлөөс үүсэлтэй байж болох юм.

Мэргэжлийн зөвлөмж

      Агаарын бохирдол нь зөвхөн Улаанбаатарчуудад бус дэлхий нийтэд хамгийн тулгамдсан асуудлын нэг болоод байна. Үүнээс гарах арга замыг улс орон бүр хайж, тодорхой үр дүнд хүрсээр ирлээ.Үндсэн арга замаа тухайн үйлдэлд хамгийн бага эрчим хүч зарцуулах, байгаль орчинд халгүй эрчим хүч ашиглах гэж тодорхойлдог.

      Улаанбаатар хотод хүний амьсгалах түвшинд буй агаарын бохирдлын 90 хувь гэр хорооллын айл өрхийн халаалтын зуухнаас ялгардаг гэх боловч ерөнхий дүнгээрээ дулааны цахилгаан станцууд 90 хувийг ялгаруулдаг. Энэ нь агаарын бохирдлыг бууруулах арга хэмжээг нэлээд өргөн хүрээг хамарч явуулах ёстойг харуулж байна. Гол арга зам нь бага хэрэглээгээр илүү тухтай амьдрах явдал бөгөөд үүнд хүрэх үндсэн 3 арга зам байна гэж үздэг.

Үнэ ханш

      Улаанбаатар хотод 2013, 2014 онуудад ашиглалтанд орох 40,513 айлын орон сууцны мэдээллийг дүүргээр нь нэгтгэн гаргалаа. Түүнчлэн орон сууцны үнэ ханштай холбоотой судалгаа мэдээлэл гээд бүрэн цогц мэдээллийг унших боломжтой.

Мөн барилгын материалын өргөн хэрэглээний материал бүтээгдэхүүний үнийг авах боломжтой.

"Барилга.МН" сэтгүүлийг интернэтээр худалдан авахыг хүсвэл book.gogo.mn/paper.html дарна уу?