УБЦТС ТӨХК хэрэглэгчдээсээ хууль бусаар их хэмжээний мөнгө авч байсан талаар өнгөрөгч долоо хоногт Эрчим хүчний зохицуулах хороо, Хэрэглэгчдийн эрх ашгийг хамгаалах нийгэмлэгүүдийн нэгдсэн холбооноос нийтэд зарласан.Энэ тухай Эрчим хүчний зохицуулах хорооны зохицуулагч Д.Чулуунбаатар хэлэхдээ “УБЦТС компани төлбөр төлсөн баримтын болон лавлагааны үнэ гэх зэргээр 386 төрлийн үйлчилгээнээс төлбөр авдаг нь тогтоогдсон. Энэ маягаар шаардлагагүй төлбөрт үйлчилгээ бий болгож, хэрэглэгчдээс жилд 1.2 тэрбум төгрөг завшдаг. Энэ мэт цөөнгүй зөрчил тус компанид бий. Үүнийг Эрчим хүчний зохицуулах хороо хариуцан ажиллаж байгаа”гэжбайсан юм. Ийнхүү хэрэглэгчдээсээ их хэмжээний мөнгө завшдаг байсан гэх нэр зүүгээд буй УБЦТС компанийн удирдлагууд хэвлэлийнхэнд хандаж дээрх мэдээллийг няцаалаа. Түүнчлэн бид хэрэглэгчдээсээ мөнгө завших нь бүү хэл өнгөрсөн онд ашигтай ажилласан. Тиймээс бидэнд хэрэглэгчдээ завших шалтгаан байхгүй гэсэн юм.

Ингээд тус компанийн гүйцэтгэх захирал С.Төмөрхүүгээс зарим асуултад тодруулгаавлаа.

-ШӨХТГ-аас танайд шалгалт хийгээд 10 сая төгрөгийн торгууль ногдуулсан гэх мэдээлэл байгаа. Үүнд тайлбар хийгээч?
-Өнгөрсөн онд Засгийн газрын тохируулагч агентлаг ШӨХТГ- аас шалгалт ирж, Батсуурь гэдэг улсын байцаагч шалгалт хийсэн. Та бүхэн тэр хүнээс асууж болно. Харамсалтай нь энэ мэдээллийг мушгин гуйвуулж, компанийн нэр хүндэд бүдүүлгээр халдаж байна. Манай компанид ямар ч торгууль ногдуулаагүй. Харин тодорхой хэмжээний зөрчил илэрсэн. Тэр зөрчлийг арилгах сануулга авсны дагуу бид одоо бүх зөрчлөө арилгаад байна. Мөн эрчим хүчээр хангах гэрээгээ шинэчлэх асуудал дээр зөвлөмж авсан. Үүний дагуу гэрээгээ ч шинэчилсэн. Нэг үгээр хэлбэл, энэ онд торгууль ногдуулах нь бүү хэл, ямар ч шалгалт манайд ороогүй.

-Ингэж зориудаар байгууллагын нэр хүндэд халдаж байна гэж үзэж байгаа бол зохих газарт нь хандаж болоогүй юм уу?

-Бид энэ хүмүүсийг ярьж байгаа зүйлийнхээ үнэн мөнийг өөрсдөө олж тайлбарлах болов уу гэж харж, хүлээсэн. Гэвч үр дүн харагдахгүй байсан учраас компанийнхаа нэр төрийг цэвэрлэх гэж энэ хурлыг хийж байна.

-Хэрэглэгчдийн тогны мөнгөнөөс 1.2 тэрбум төгрөг хууль бусаар авсан гээд байгаа шүү дээ?

-Шалгаагүй байж шалгасан гэж хэлээд худлаа мэдээлэл тараагаад байгаа хүмүүсийг гайхаж л сууна. Хэрвээ үнэхээр 1.2 тэрбум төгрөгөөр гараа угаачихсан юм бол түүнийг өдий болтол нууж явсан болж таарах гээд байгаа юм. Үнэндээ Эрчим хүчний зохицуулах хорооноос ийм худлаа мэдээлэл тараагаад байна л даа. Ямартаа ч бидний зүгээс худлаа мэдээлэл болохыг албан ёсоор, хариуцлагатайгаар мэдэгдэж байна.

-Өнөөдрийн байдлаар танай байгууллага иргэдээс хэчнээн төрлийн төлбөрт үйлчилгээ авч байна вэ?

-Эрчим хүчний зохицуулах хорооноос манай төлбөрт үйлчилгээний үнэ тарифыг тогтоож өгдөг. Үүний дагуу бид үйлчилгээгээ явуулдаг. Бид одоогоор 386 төрлийн төлбөрт үйлчилгээ явуулж байна. Мэдээж тогтоосон тарифын дагуу мөнгөө авахаас гадна тухайн ажилтны ажлын хөлс нэмж ордог. Гэхдээ мэдээж энэ бол хэрэглэгчдийн хүсэлтээр хийгддэг ажил шүү дээ. Тухайлбал, тогны мөнгөнөөс гадна хэрэглэгч өөрөө хүсвэл нэмэлт үйлчилгээ авч болно. Үүний төлбөр гэж нэмэгдэж гарч байгаа. Тухайлбал, сэтгүүлч та гэртээ разетка солиулахаар манайд хандвал манай хүмүүс очоод сольж өгөөд, тэр үйлчилгээндээ тохирсон төлбөрөө авдаг. Энэ төлбөрт үйлчилгээний тариф нь манай компанийн сайтад байдаг. Манай компанийн 1700-гаад ажилтан хуулиар хүлээсэн үүргийнхээ дагуу иргэдийг цахилгаан дулаанаар найдвартай хангах үүргээ биелүүлж ажиллаж байгаа.

-Төлбөрт үйлчилгээн дээр тухайн ажилтны ажлын хөлс гэж хэчнээн төгрөг авч байгааг хянадаг уу. Тийм боломж бий юу?

-Хянадаг. Өнөөдрийн байдлаар 1700-гаад ажилтантай, олон салбар нэгжтэй учраас нарийвчлан хэлэх боломжгүй.

-Өнөөдрийн байдлаар танай компани алдагдал хүлээсэн үү. Үгүй бол хэчнээн төгрөгийн ашигтай ажиллаад байгааг хэлж болох уу?
-Манай компани өнгөрсөн онд ашигтай ажилласныг хэлэх нь зүйтэй байх. Тодруулбал, бид 2012 онд тэрбум гаруй төгрөгийн ашигтай ажилласан нь үнэн. Гэхдээ энэ мөнгө манайд шууд ашиг болоод орчихоогүй. Техник тоног төхөөрөмж, ажилчдын цалин, тээврийн зардал гэх мэтэд шингэдэг. Түүнчлэн Эрчим хүчний зохицуулах хороо, Хэрэглэгчдийн эрх ашгийг хамгаалах нийгэмлэгүүдийн нэгдсэн холбооноос манай байгууллагад ямар нэгэн шалгалт хийгээгүй. Гэтэл ингэж олон нийтэд ташаа мэдээлэл тарааж байгаад бид үнэхээр гайхаж байна.

-Тоолуурын заалтаа харахын тулд иргэд мөнгө төлдөг байсан. Энэ байдлыг бүрэн зогсоож чадсан уу?

-Өмнө нь хэрэглэгчдийн зүгээс маш их гомдол ирдэг байсан асуудал нь наадах чинь. Өөрөөр хэлбэл, тоолуурын заалтаа харах гэж мөнгө төлж байна гэх гомдол багагүй ирдэг байсан учраас бид үүнийг болиулсан. Энэ оны нэгдүгээр сарын 1-нээс хойш энэ төрлийн үйлчилгээ авсан нэг ч хүнээс бид төлбөр тооцоо аваагүй.

-Тоолуур баталгаажуулах хугацаа ямар байх ёстой байдаг юм бэ?
-Цахилгаан эрчим хүчний тоолуурыг шалгаж, баталдаг, хянадаг хуулиар тогтоосон хугацаатай. Электрон тоолуурыг найман жилд нэг, механик тоолуурыг гурван жилд нэг баталгаажуулдаг. Хэрвээ хэрэглэгч хүсээд, манай тоолуур нэг л биш байна гэж үзвэл хугацаанаас нь өмнө баталгаажуулах боломжтой. Тэрнээс биш манайхан жил бүр айлуудаар яваад, тоолуурыг нь баталгаажуулах нэрээр элдэв мөнгө төгрөгийн будилаан үүсгэхгүй.

-Урьдчилан мэдэгдэлгүйгээр хэрэглэгчдийн тогийг таслаад хаячихдаг гэсэн гомдол иргэдээс их ирдэг. Энэ ямар учиртай юм бэ?
-Хэрэглэгчдийн тог хоёр шалтгаанаар тасарч байгаа. Нэгдүгээрт, аваар гэмтэл гараад тасардаг. Нөгөө нь хэрэглэгч цахилгаан эрчим хүчээр хангах, хангагдах гэрээнийхээ дагуу хугацаандаа төлбөрөө төлөөгүй нөхцөлд манай компаниас тогийг нь хязгаарладаг. Сүүлийн тохиолдолд манай компани тогны мөнгөө хугацаанд нь төлнө үү гэсэн мессежийг хэрэглэгчдийн гар утсанд явуулдаг. Энэ нь сануулга болж байгаа юм л даа. Зарим тохиолдолд хэрэглэгч хэрвээ манайд мөнгөө төлчихөөд тэр үйлчилгээг авч чадаагүй бол дараа сарын төлбөр дээр тооцоод, хасаад өгдөг. Илүү төлбөр авах ямар ч шалтгаан байхгүй.