Нийслэлийн агаарын чанарыг сайжруулах бүсэд хамрагдсан хэрэглэгч та цахилгаан халаагуураар дулааны асуудлаа шийдэх гэж байгаа бол дараах асуудалд анхаарлаа хандуулна уу.

            Юуны түрүүнд та харьяа Хэрэглэгчдэд үйлчлэх төвдөө хандаж танай гэрийг  цахилгаанаар тэжээж байгаа станцын ачаалал хир байгааг тодруулах хэрэгтэй. Хэрэв тухайн станц 80 хувиас доош ачаалалтай бол цахилгаан халаагуур шинээр холбох боломжтой байдаг. Түүнээс дээш хувиар ачаалагдсан байвал хэрэглэгч та үнийн урамшуулалд хамрагдах боломжгүй. Учир нь нийслэлийн хэрэглэгчдийн цахилгаан хэрэглээ улам бүр нэмэгдэж шугам тоноглолын хүчин чадал өвлийн оргил ачааллыг даахгүйд хүрдэг.

         Харин цахилгаан халаагуураас бусад буюу  стандартын шаардлага хангасан дулаалгатай гэр, амины орон сууцтай, бүх төрлийн хийн түлшээр ажилладаг халаалттай, газрын гүнийн дулаан, нар салхины болон бусад сэргээгдэх эрчим хүчийг ашиглаж байгаа, стандартын шаардлага хангасан шахмал болон коксон түлш, сайжруулсан зуух, яндангийн шүүлтүүр хэрэглэж байгаа, байгаль орчинд ээлтэй эрчим хүчний хэмнэлттэй байшин, амины орон сууцтай байх зэрэг нөхцөл шалгуурыг хангасан айл өрхүүдтэй урамшууллын гэрээг байгуулах бүрэн боломжтой. Та дүүрэг, хорооныхоо Агаарын чанарын албанд цахилгааны үнийн хөнгөлөлтөд хамрагдах хүсэлтээ гаргаарай. Агаарын чанарын албанд хүсэлт гаргасан хэрэглэгчдийн жагсаалтыг судлан үзэж, хамрагдах боломжтой хэрэглэгчидтэй гэрээ байгуулж байна.

Жич: Өмнөх жилүүдэд цахилгаан халаагуураар үнийн урамшууллын гэрээ байгуулсан айл өрхүүд дахин гэрээ байгуулах шаардлагагүй ба үнийн хөнгөлөлтөд шууд хамрагдана.