Олон Улсын Зөвлөх Инженерүүдийн Холбоо буюу Federation Internationale Des Ingenieurs-Conseilsнь Швейцарын Женев хотноо байрладаг, барилга угсралт, бүтээн байгуулалтын салбарт шилдэг туршлага, жишгийг тогтоож, зөвлөх инженер нарын эрх ашгийг төлөөлөн ажиллах зорилготой 1913 онд үүсгэн байгуулагдсан олон улсын байгууллага юм.

            Энэхүү Холбоо нь ФИДИК Гэрээний цогц загвар нөхцлүүдийг боловсруулан, тэдгээр нөхцлүүдийг олон нийтэд ашиглах боломжоор хангадгаараа дэлхий дахинд танигдсан бөгөөд уг Гэрээний Ерөнхий Нөхцлүүдийн тухай сургалтыг “Батбаяр Энд Партнерс” хуулийн фирм нь ECV (European Construction Ventures Limited)-тай хамтран зохион байгуулж байгаа аж. Уг сургалт 2013 оны 11 дүгээр сарын 04 – 08-ны өдрүүдийн хооронд явагдаж байгаа ба ECV-с томилогдсон, сургалт явуулах онцгой эрхтэй, олон улсын төсөл хөтөлбөрүүдэд ажилласан арвин туршлагатай багш Роберт Кохрэйн удирдан англи хэлээр Монгол орчуулгатайгаар явагдаж байна.  Сургалт МҮХАҮТанхим дээр явагдаж байна.

               Энэхүү 5 өдөр үргэлжилж буй сургалт, зөвлөгөөнөөр 1999 оны ФИДИК Гэрээний нөхцөл, тэр дундаа Үйлдвэрийн ажил, Зураг төсөл боловсруулах, Барилга угсралтын ажил гүйцэтгэх гэрээ болон нэхэмжлэл, шаардлага зохицуулахтай холбоотой сэдвүүдийг тусгайлан авч үзэж байгаа юм байна.

               ФИДИК Гэрээний нөхцлүүд нь ажлын захиалагч, гэрээт гүйцэтгэгч хоорондын харилцаанд тэдгээрийн эрх ашгийг тэнцвэртэй хангах, эрсдлийг зөв зүйтэй хуваарилах, инженерийн зохистой үүрэг оролцоог тогтоох, төлбөр тооцоог хийх, ажлын чанар - хуваарьт хугацаа – зардал гэсэн үндсэн хүчин зүйлийн уялдааг хадгалах шилдэг арга хувилбарыг танилцуулж, тэдгээрийг өөрийн тухайлсан ажил, төсөлд хэрхэн нийцүүлэн хэрэглэж болох тухай удирдамжийг өгч, өөрөөр хэлбэл, гэрээний буюу төслийн удирдлагыг хэрэгжүүлэх тэргүүн туршлагыг санал болгодог.

                Тиймээс ФИДИК Гэрээний нөхцлүүд, түүний практик хэрэглээний тухай мэдэгдэхүүн нь дэд бүтэц, эрдэс баялаг, бүтээн байгуулалтын салбарт хамаарах төрийн болон хувийн хэвшлийн байгууллагууд, барилга угсралтын компаниуд, зөвлөх, архитектур, инжинерингийн үйлчилгээ үзүүлэгч компани, туслан гүйцэтгэгч, хууль санхүүгийн байгууллагын мэргэжилтэн, түүнчлэн олон улсын хөгжлийн банкуудын санхүүжилттэй барилгын төслүүдийг удирдан зохион байгуулах ажлыг хариуцдаг аливаа байгууллага, хуулийн этгээд, боловсон хүчинд чухал ач холбогдолтой хэмээн үздэг.

            Сургалтанд Зам, Тээврийн Яамны төлөөлөгч нар, Азийн Хөгжлийн Банкны санхүүжилттэй Авто замын чадавхийг бэхжүүлэх төслийн мэргэжилтнүүд, үл хөдлөх хөрөнгийн болон барилга угсралтын томоохон компаниуд, мэргэжлийн зөвлөх инженерүүд болон хуулийн фирмийн төлөөлөгч нар оролцож байна. Тус сургалт нь уг сэдвээр олон нийтэд хүртээмжтэй байдлаар Монгол Улсад анх удаагаа зохион байгуулагдаж байгаа гэдгээрээ онцлог юм. Сургалттай холбоотой мэдээллийг contact@bnp.mn хаягт хандаж авах боломжтой гэнэ.