БХБЯ, НМХГ болон Монголын Цонх Хаалга Үйлдвэрлэгчдийн холбоо хамтран Улаанбаатар хотод шинээр баригдаж байгаа барилгуудын цонх хаалганы чанар, стандартын байдалд хийсэн шалгалтынхаа дүнг өнөөдөр танилцууллаа.

     Уг шалгалтанд нийслэлийн 6 дүүрэгт шинээр баригдаж байгаа 61 аж ахуйн нэгжийн 16231айлын орон сууцны барилга, 150 ортой төрөх эмнэлэг 1, дээд сургуулийн өргөтгөл, оффиссын зэрэг барилгуудын захиалагч, хөрөнгө оруулагч, гүйцэтгэгч 65 аж ахуйн нэгж, зураг төслийн 31, хаалга цонх үйлдвэрлэгч 45 аж ахуйн нэгж хамрагдсан байна.

     Шалгалтаар хуванцар хаалга, цонхны 45 үйлдвэрийн 24 буюу 53.3% нь барилгын материалын үйлдвэр эрхлэх тусгай зөвшөөрөлгүй, 12 буюу 26.6% нь технологийн заавар боловсруулаагүй, батлуулаагүй, мөрдөөгүй, 29 буюу 47.5% нь бүтээгдэхүүнээ тохирлын баталгаажуулалтанд хамруулаагүй байсан зөрчил илэрчээ.

     Харин дээрх барилгуудын зураг төсөлд үзлэг шалгалт хийхэд давхардсан тоогоор зураг төслийн 31 аж ахуйн нэгж зураг төслийг боловсруулжээ. Гэтэл зөвхөн 24.5% нь MNS тэмдэглэгээ хийсэн, 75.5% нь цонх хаалганы стандартыг зураг төсөлдөө огт тусгаагүй байсан нь илэрчээ. Энэ нь урьд өмнөх жилүүдэд илэрч байсан зөрчил бөгөөд энэ жил ч дахин давтагдаж байгаагаас харахад зураг төслийн байгууллагуудын үйл ажиллагаанд анхаарал хандуулах цаг болсныг харуулж байна.  

      Мөн барилгын хөрөнгө оруулагч, захиалагчид чанарыг биш, хямд үнэтэй хаалга цонх сонгож байгаа нь дулааны алдагдлыг ихэсгэхээс гадна хэрэглэгчдийн эрхийг зөрчиж ашгийн төлөө ажилласаар байна.

      Шалгалтанд хамрагдсан зураг төслийн 31, гүйцэтгэгч 65, цонх хаалга үйлдвэрлэгч 45 аж ахуйн нэгжүүдэд илэрсэн зөрчлийг арилгуулахаар улсын байцаагчийн 90 заал бүхий 30 албан шаардлага хугацаатай үүрэг өгсөн байна. Мөн “Барилгын тухай хууль” зүйл заалт, стандартыг зөрчсөн 9 аж ахуйн нэгжид 17 сая төгрөгийн торгуулийн арга хэмжээ ноогдуулснаас 15 сая төгрөгийг барагдуулжээ.

     Мөн дээрх зөрчил, дутагдлыг арилгуулахын тулд авах арга хэмжээний талаарх саналаа БХБЯ, Барилгын Хөгжлийн төв, Зураг төсөл зохиогчдын холбоо, Монголын Хаалга Цонх Үйлдвэрлэгчдийн холбоонд хүргүүлэх юм байна.

Хаалга, цонхны норм ба дүрэм стандартыг мөрдүүлэх тухай БХБ-ын сайдын албан даалгавар