Японы олон улсын хамтын ажиллагааны байгуулага(JICA)-ийн Ерөнхийлөгчийн нэрэмжит шагналыг Барилга, хот байгуулалтын яам, Улаанбаатар хотын Засаг даргын тамгын газарт гардуулж өглөө.

      Тус байгууллагын Ерөнхийлөгчийн шагналыг олон улсын хамтын ажиллагааны төслүүдэд хувь нэмэр оруулан хамтран ажиллаж, хөгжиж буй орнуудын хүний нөөц нийгмийн хөгжилд чухал үүрэг гүйцэтгэсэн төсөл, хувь хүн, байгууллагуудад олгодог юм.

      Барилга, хот байгуулалтын яам болон Улаанбаатар хотын ЗДТГ нь JICA -тай Улаанбаатар хотын ерөнхий төлөвлөгөө боловсруулж  батлуулахад хамтран ажилласан юм.

     Ингэхдээ хот байгуулалтын хөтөлбөрийн судалгааг 2007-2009 онд хэрэгжүүлж, цомхон хотын үзэл баримтлалд тулгуурласан газар ашиглалт, хот байгуулалтын удирдлагын эрх зүйн орчны шийдлүүдийг тусгасан хот байгуулалтын ерөнхий төлөвлөгөөг боловсруулан Улаанбаатар хотыг хөгжүүлэх ерөнхий төлөвлөгөөг 2013 оны 2 дугаар сард УИХ-аар батлуулсан байна.

      Хотын хөгжлийн ерөнхий төлөвлөгөөг боловсруулахаас эхлээд  түүнийг амьдралд хэрэгжүүлэхэд шаардагдах хууль эрх зүйн орчин тогтолцоог бий болгох, хот байгуулалтын салбар дахь хамтын ажиллагаа, хүний нөөц, нийгмийн хөгжилд оруулсан хувь нэмрийг үнэлэн энэхүү шагналыг олгож байгаа юм гэж JICA-ийн Төлөөлөгчийн газрын дарга Като Тошинобү  Барилга, хот байгуулалтын сайд Ц.Баярсайханд шагнал гардуулах үеэрээ  хэллээ.

       Японы олон улсын хамтын ажиллагааны  байгуулага ( JICA )-ийн  Ерөнхийлөгчийн нэрэмжит энэхүү шагнал 2007 оноос хойш хөтөлбөр, ерөнхий төлөвлөгөөн дээр ажиллаж ирсэн бүх хүмүүст өгсөн шагнал юм гэж сайд Ц.Баярсайхан шагнал гардуулах үеэр тодотголоо.