Энэ намрын чуулганаар хэлэлцэгдэх Татварын багц хуулиудын хүрээнд шинээр Хотын албан татвар  болон Өв, залгамжлал, бэлэглэлийн албан татвар авахаар болж байна. Хууль санаачлагчид тайлбарлахдаа гадаад улс орны жишигт нийцүүлэн дээрх татваруудыг шинээр боловсруулсан бөгөөд энэ нь улс орны эдийн засагт тодорхой дэмжлэг үзүүлнэ гэлээ.  Тус хуулийн төслүүд дээр Сангийн яам болон Татварын ерөнхий газар ажиллаж байгаа юм.  

           Нийслэл болон улс, аймгийн чанартай хотуудад үйл ажиллагаа явуулж буй албан газар, аж ахуйн нэгжүүдээс хотын татварыг авахаар Сангийн яамны боловсруулж байгаа төсөлд тусгагдсан байна.  Хуулийн дагуу Улаанбаатар хот,  21 аймгийн төвд үйл ажиллагаа явуулж буй албан газар, аж ахуйн нэгжийн олсон орлогоос тодорхой хэсгийг нь хотын хураамжид авах аж.   Өөрөөр хэлбэл, Архангай аймгийн төвд  очиж зочид буудалд нь гурав хонолоо гэхэд гарсан төлбөр дээрээ нэмж  тус аймгийн аж ахуйн нэгжээр үйлчлүүлснийхээ төлөө тодорхой хураамжийг төлнө.  Хотын аль нэг ресторан, дэлгүүр, зочид буудлаар үйлчлүүллээ гэхэд мөн адил Хотын албан татварын хуулийн дагуу  үндсэн төлбөр дээрээ хураамж нэмж төлөх юм.    Энэ  хууль нь Улаанбаатар  хот, бүх аймгийн төвүүд, Эрдэнэт, Дархан, Алтанбулаг зэрэг нийт 27 суурин газарт үйлчлэх гэнэ.  Харин эмнэлэг, сургууль, цэцэрлэг, төрийн албан газруудаас Хотын албан татварын хураамж авахгүй юм байна.

           Хотын албан татварыг тухайн аж ахуйн нэгжийн борлуулсан бараа, гүйцэтгэсэн ажил, үзүүлсэн үйлчилгээний үнийн дүнгийн 0.1-0.3-аар бодож авахаар тусгажээ.