Монгол улсад барилгын салбар үүсч хөгжсөний түүхт 87 жилийн ойн баярын арга хэмжээг тохиолдуулан Барилгын Зөвлөгөө Мэдээллийн Төвөөс зохион байгуулж буй “Барилга орон сууц-2013” үзэсгэлэн яармаг 9 дүгээр сарын 6-8-ны өдрүүдэд Мишээл экспо төвд болох юм. 

         Үзэсгэлэнгийн хамтран зохион байгуулагчаар БХБЯам,  НЗДТГ, НЕТГ, Гэр хорооллын хөгжлийн газар зэрэг салбарын төрийн захиргааны байгууллагууд болон МБХолбоо, ЗТЗХолбоо, МБИХ зэрэг мэргэжлийн төрийн бус байгууллагууд оролцож байна. 

          “Барилга орон сууц- 2013” үзэсгэлэн нь хүн амын байнга өсөн нэмэгдэж буй байр, орон сууцны хэрэгцээг хангахад дэмжлэг үзүүлэх зорилготой юм. 2013 оны 6 дугаар сард Засгийн газраас иргэдийг орон сууцжуулах бодлогын хүрээнд 8 хувийн хүүтэй орон сууцны ипотекийн зээлийн хөтөлбөрийг баталсан нь иргэдийн талархлыг хүлээсэн зөв шийдвэр болоод зогсохгүй улс орны эдийн засаг, хүн амын нийгмийн  хөгжилд эергээр нөлөөлөх чухал арга хэмжээ болсон юм.

          Тиймээс энэ намрын “Барилга Орон сууц-2013” үзэсгэлэнд тус хөтөлбөрийг хэрэгжүүлж буй арилжааны банкуудыг урьж оролцуулан ипотекийн зээл болон Улаанбаатар хотод баригдаж буй, ашиглалтанд орсон шинэ орон сууцнуудын талаарх дэлгэрэнгүй танилцуулга, Гэр хорооллын дахин төлөвлөлтийн төсөл хөтөлбөрийн тухай болон барилгын материал, дэвшилтэт технологийн талаарх  цогц мэдээллийг нэг дороос авах боломжийг иргэдэд олгож байна.

          Үзэсгэлэнгийн өдрүүдэд хамтран зохион байгуулагч байгууллагуудын  уулзалт семинар, нээлттэй хэлэлцүүлэг зэрэг олон сонирхолтой арга хэмжээ зохиогдохоос гадна үзэсгэлэнд оролцогч компаниуд барилгын материал, бүтээгдэхүүн үйлчилгээ, шинэ орон сууцандаа хямдрал урамшуулал зарлаж,  сугалаат  худалдааг зохион явуулах юм.