Шинэчилж шийдье уриатай Засгийн газраас эдийн засаг, нийгэм, бүтээн байгуулалтын салбарт шинэчлэлийн олон ажлыг амжилттай эхлүүлж, хэрэгжүүлээд байгаа билээ. Харин улс орны хөгжлийн түүчээ болсон Барилга, бүтээн байгуулалтын салбарт энэ онд ямар ямар шинэчлэлийн ажлууд хийгдсэн талаар тоймлон хүргэж байна.

Хууль эрх зүй

           Барилга, хот байгуулалт гэдэг сэдэв нь зөвхөн бүтээн байгуулах ажлаас гадна газар зохион байгуулалт, газар өмчлөл,  хот төлөвлөлт, цаашлаад хүн амын үл хөдлөх хөрөнгө худалдан авах эдийн засгийн чадвар, дэд бүтэц гээд маш олон салбар хүрээг хамардаг өргөн ойлголт. Энэ ч утгаараа  барилгын салбарын эрх зүйн шинэчлэлийн хүрээнд  хэд хэдэн багц хуулийг шинээр боловсруулах, шинэчилсэн найруулга хийх, нэмэлт өөрчлөлт оруулах шаардлагатай байгаа ажээ. Үүнд газрын тухай, газрын төлбөрийн тухай, газрын кадастрын тухай, Монгол улсын иргэнд газар өмчлүүлэх тухай, хот байгуулалтын тухай, барилгын тухай хуулиудад шинэчилсэн найруулга хийгдэх бол геодези зураг зүйн тухай, орон сууц хувьчлах тухай хуулиудад нэмэлт өөрчлөх оруулах юм. Харин хотыг дахин хөгжүүлэх тухай, хот тосгоны ногоон байгууламжийн тухай, авто зогсоолын тухай, үндэсний орон зайн  мэдээллийн дэд бүтцийн тухай хуулиудыг шинээр боловсруулан мөрдүүлэхээр  ажиллаж байна.

Салбарын үндэсний стандарт

          Энэ оны 1 дүгээр сарын 14-өөс 2 дугаар сарын 14-ний хооронд барилгын салбарын үндэсний стандартын улсын үзлэгийг хийсэн бөгөөд үзлэгээр барилгын салбарт мөрдөгдөж байгаа нийт 575 стандартыг хамруулснаас хэвээр мөрдөх 331, дахин хянах 224, хүчингүй болгох 20 стандарт байгааг тогтоосон байна.  Мөн цаашид шинээр боловсруулах 112 стандарт шаардлагатай байгаа бөгөөд эдгээрийг барилгын чанар аюулгүй байдал, салбарт нэвтэрч байгаа шинэ технологитой уялдуулан боловсруулах шаардлагатай байгаа аж.  Мөн энэ оны 4 дүгээр сарын байдлаар барилгын салбарт хүчин төгөлдөр мөрдөгдөж буй 437 норм норматив байгаагаас 245 БНбД заавал мөрдөх, 91 БД , 12 УББ, 53 тогтоол шийдвэр, ОХУ-ын 36 Бд зөвлөмжийн шинж чанартай мөрдөгдөж байгааг тогтоожээ. Цаашид

·       Канад, Америк, Европ, Солонгос, Японд мөрдөгдөж буй норм нормативуудаас Монгол хүний аюулгүй орчинд амьдархад зохицсон олон улсын жишигт нийцсэн Монгол оронд нутагшуулах боломжтой норм норматив бий болгох

·       Гадаадаас орж ирж буй шинэ техник технологи, материалуудад эхний ээлжинд техникийн нөхцөл олгож, нэвтрүүлэх боломжоор хангах бодлого баримталж ажиллах

·       Шинээр норм норматив боловсруулах ажлыг салбарын ТББ, мэргэжлийн холбоотой хамтран гүйцэтгэхээр төлөвлөөд байгаа билээ.

Тусгай зөвшөөрөл

§  Нэг цонхны үйлчилгээгээр олгодог болсон.

§  Долоо хоног бүрийн Пүрэв гарагт хуралдаж тодорхой хугацаанд хариу мэдэгддэг болсон.

§  Заавал шаардагдах бичиг баримтуудыг цөөлсөн.

§  Суурь нөхцөлүүдийг хөнгөвчилсөн.

§  Зөвлөх болон мэргэшсэн инженерийн тоог цөөрүүлсэн.

§  Ажилласан жилийн хязгаарыг болиулсан.

§  ТББ-ын оролцоог нэмэгдүүлж, барилгын материалын үйлдвэрлэлийн тусгай зөвшөөрлийг мэргэжлийн ТББ-д, нийтийн аж ахуйн тусгай зөвшөөрлийг Усны үндэсний хороо олгодог болсон.

§  Цаашид тусгай зөвшөөрлийг цахим хэлбэрээр олгож, бүртгэлийн системд оруулах ажлыг зохион байгуулахаар төлөвлөөд байна.

Барилгын ажил эхлүүлэх, үргэлжлүүлэх зөвшөөрөл олгох

          Барилгын ажил эхлүүлэх, үргэлжлүүлэх, ашиглалтанд оруулах  ажлыг шуурхай зохион байгуулдаг болохын тулд Засгийн газраас 151-р тогтоолыг баталж мөрдүүлээд байгаа. Энэхүү тогтоолд зааснаар барилга орон сууцыг эрсдэлийн түвшингээр 3 ангилж, эрсдэл өндөртэй буюу 17-35 давхар барилга байгууламж нь 1-р ангилалд, 17 давхар хүртэлх үйлдвэр, иргэний барилга байгууламж нь 2-р ангилалд,  хоёр давхар хүртэлх буюу дээд тал нь 3600 метр куб хэмжээ бүхий барилга байгууламж, хувийн орон сууц нь 3-р ангилалд хамаарах юм. 3-р ангиллын барилгад барилгын ажил эхлүүлэх, үргэлжлүүлэх зөвшөөрөл авах шаардлагагүй бөгөөд 1-р ангиллын барилгад Барилга, хот байгуулалтын яам зөвшөөрөл өгөх бол 2-р ангиллын барилгын хувьд барилгын ажил эхлүүлэх, үргэлжлүүлэх зөвшөөрөл олгох, ашиглалтанд оруулах үйл ажиллагааг Нийслэлийн ерөнхий төлөвлөгөөний газар зохион байгуулж байна. Ингэхдээ  Иргэн, аж ахуй нэгж байгууллага  барилгын ажлыг эхлүүлэх, үргэлжлүүлэх зөвшөөрөл олгох үйлчилгээг авахыг хүсэж байвал шаардлагатайматериалыгбүрдүүлэн Хангарьд ордны 1 давхарт байрлах нэг цэгийн үйлчилгээнд  өгнө. Тухайн хүсэлтийн хариуг  ажлын 3 хоногт багтаан Нийслэлийн ерөнхий Төлөвлөгөөний газрын Хот байгуулалт, дэд бүтцийн хяналтын албанаас авах боломжтой.