Нийслэлийн ЗДТГ-аас нийслэлийн ногоон бүсэд хууль бусаар олгогдсон 4052 газрын эзэмших эрхийг цуцлахаар болсон байна.   Сүүлийн жилүүдэд ногоон бүсэд хамрагдах нутаг дэвсгэрийн ойн санд хууль зөрчин газар олгох, иргэд аж ахуйн нэгжүүд зөвшөөрөлгүй хашаа, байшин барих зөрчил ихээр гардаг болсон. Иймээс эдгээр зөрчил ихээр гардаг Чингэлтэй, Сүхбаатар, Баянзүрх, Сонгинохайрхан дүүргүүдэд Нийслэлийн Засаг даргын захирамжаар байгуулсан ажлын хэсэг шалгалт хийжээ.

             Шалгалтаар ойн болон усны сан газарт хууль зөрчин газар олгосон, зөвшөөрөлгүйгээр дур мэдэн бууж, байшин барилга барьсан, Ойн санд орох орц, гарцыг хааж хашаа барьсан зэрэг ноцтой зөрчлүүдийг илрүүлсэн байна. Өнөөдрийн байдлаар Чингэлтэй дүүрэгт 2340, Сүхбаатар дүүрэгт 1090, Баянзүрх дүүрэгт 450, Сонгинохайрхан дүүрэгт 172, нийтдээ хууль зөрчин олгосон 4052 газар байгаа аж. Эдгээр газрын эзэмших зөвшөөрлийг яаралтай цуцлахгүй бол нийслэлийн ногоон бүс, экологийн тэнцвэрт байдал алдагдаж, ихээхэн хохирол учирч болзошгүй байгаа тул нийслэлийн Засаг дарга   эдгээр газрын эрхийг цуцлах захирамж гаргахаар болсон байна. Мөн цаашид нийслэлийн ногоон бүсэд газар олгохгүй байх, газар олгосон тохиолдолд холбогдох албан тушаалтанд хуулийн дагуу хариуцлага тооцохоо нийслэлийн удирдлагууд сануулсан.

      Харин Нийслэлийн ногоон бүсэд хууль зөрчиж барьсан барилгуудыг нураах эсэх нь хамгийн хүндэлтэй асуудал болоод байгаа бөгөөд үүнийг хууль хяналтын байгууллага нь хуулийн дагуу шийдвэрлэх аж.