1984 оны 09 сарын 06-нд “Улсын Барилгын Зургийн Төв Институт”-ийн дэргэд “Мөнгөн Харандаа” хамтлаг анх байгуулагджээ. Анхны гишүүд нь хамтлагийн ахлагч даралтат хөгжимчин Т.Түвшинтөр, гоцлол гитарчин Л.Энхбаяр, басс гитарчин Х.Эрдэнэбат, бөмбөрчин Ц.Алтангэрэл, дуучин Ц.Сэлэнгэцэцэг, ритм гитарчин Г.Ганбат нар байлаа. Тус хамтлагийн гишүүд нь “Улсын Барилгын Зургийн Төв Институт”-ийн инженер, техникийн ажилтан албан хаагч нар байсан бөгөөд санаа сэтгэл нэгдэн хамтлаг байгуулсан түүхтэй.

Ингээд "Мөнгөн харандаа" хамтлагийн ахлагч Т.Түвшинтөртэй тоглолтынх нь талаар ярилцлаа.

- Сайн байна уу та. 9-р сарын 6-нд болох концертын талаарх мэдээллээр ярилцлага эхлэе?

      Сайн байна уу. Юуны өмнө та бүхэнд энэ өдрийн мэнд хүргэе. Манай хамтлаг байгуулагдсаны 30-н жилийн ой энэ онд тохиож байгаа учраас манай хамтлагын гишүүд, дэмжигчид санаа нэгдэн уран бүтээлдээ эргэн орж, өнгөрсөн 30 жилийн хугацаанд хийсэн уран бүтээлээ дүгнэн нэгтгэж, үзэгчид, ялангуяа барилгын салбарын ганц хамтлагийн хувьд нийт барилгын салбарынхандаа тайлан тоглолтоо хийхээр шийдсэн. 9-р сард болдог баярынхаа хүрээнд Барилга, хот байгуулалтын яам, Барилгын хөгжлийн төв болон мэргэжлийн холбоодтойгоо хамтран уг концертыг баярын арга хэмжээний хүрээнд хийхээр болсон. Концерт маань 9 сарын 6-ний өдрийн 18:00 цагаас УБ Паласын Их танхимд болно. Билетийг манай хамтлагийн 88117203 гэсэн утсаар холбоо бариад захиалга өгч, авч болно.

      Хамтлаг анх байгуулагдах болсон шалтгаан, “Мөнгөн Харандаа” гэдэг нэрийг хэн өгсөн, мөн энэ нэрнийхээ утгын талаар та ярихгүй юу?

      Би 1984 оны зун цэргээс халагдаж ирээд “Улсын Барилгын Зургийн Төв Институт”-д одоогийн “Өргөө” хамтлагийн дуучин н.Бархастай хамт нэг өдөр ажилд орсон юм. Би институтийн хэвлэх цехэд, н.Бархас Соёлын тэнхимийн эрхлэгчээр ажиллаж байлаа. Хэсэг хугацааны дараа н.Бархас мэргэжлээрээ ажиллахаар Муж төлөвлөлтийн товчоонд шилжин орж би Соёлын тэнхимийг хариуцан ажиллах болсон юм. Тэр үед залуучуудын чөлөөт цаг өнгөрүүлэх анхны хамгийн том “Проект 01” гэдэг диско клубыг “АПУ” ХХК-ийн гүйцэтгэх захирал байсан н.Батжав, “Петровис” ХХК-ийн захирал н.Батболд, “Zet”ХХК-ийн тэнхимд цахилгаан гитар, бөмбөр болон хөгжмийн техник хэрэгслүүд байсан юм. Удирдлагаас биднийг барилгачдын баярын өдрөөр хөгжим тоглох үүрэг даалгавар өгсөнөөр Х.Эрдэнбат, Л.Энхбаяр, Ц.Алтангэрэл, Г.Ганбат бид нар нэгдэн “Мөнгөн Харандаа” хамтлагийг байгуулах болсон. Харин Ц.Сэлэнгэцэцэгийг бид нэгдсэнийхээ дараа манай институтийн бичээчээр ажиллаж байх үед нь хамтлагтаа дуучнаар авсан юм.

       “Мөнгөн Харандаа” гэдэг нэрийг “Улсын Барилгын Зургийн Төв Институт”-ийн Намын хорооны даргаар тухайн үед ажиллаж байсан н.Норов гуай өгсөн юм. Нэрийн утга учир нь бол барилгын зураг төслийн ажил хийхэд хэрэглэгддэг ажлын гол зэвсэг нь харандаа байсан учраас ингэж нэрлэсэн.

       “Мөнгөн Харандаа” хамтлагийн түүхээс харахад олон хүмүүс солигдож байсан байх юм. Яагаад солигдож байсан, гишүүд хэн хэн гэж хүмүүс байсныг тодруулж ярихгүй юу? Одоо тэр хүмүүс ямар ажил эрхэлж байгаа вэ? Мөн та өөрийнхөө тухай ярихгүй юу?

      Хамтлагийн гишүүдийн тухайд бол манай хамтлаг сайн дурын үндсэн дээр байгуулагдан, ажлынхаа зав чөлөөгөөр бэлтгэл сургууль хийж тоглодог байсан болохоор хэн нэг нь ажлын шаардлагаар янз бүрийн томилолтонд явах, сургууль соёлд явах гээд олон шалтгаанаар хамтлагийг орхих болдог байсан. Тэгээд нэг нь явж тэр хүний оронд шинэ гишүүн авдаг байсан. Манай хамтлагт маш сайн хөгжимчид тоглож байсан.

    Тэдгээрийг дурьдвал Морин хуур наадмын 3 удаагийн тэргүүн байрын шагналт, Монголын Хөгжмийн Зохиолчдын Холбооны ерөнхийлөгч, хөгжмийн зохиолч Б.Бямбабаяр, Шар Айраг хамтлагийн даралтат хөгжимчин Б.Баттүшиг мөн манай эмэгтэй даралтат хөгжимчид дундаа хамгийн сайнд тооцогддог н.Ариунаа нар даралтат хөгжим тоглодог байсан. Бөмбөрчдийн хувьд “Цаст Констракшн”-ий ерөнхий архитектор Ц.Алтангэрэл, одоо жолооны сургуулийн багшаар ажиллаж байгаа Р.Батхуяг мөн 70-аад оны үед тоглож байсан манай анхны хамтлагуудын нэг болох “Дөмөн” гэдэг хамтлагийн бөмбөрчин н.Баатаржав агсан нар ээлжлэн тоглосон. Гитарчдаас мөн “Дөмөн” хамтлагийн гитарчин Ш.Энхболд, “Залуус” хамтлагт тоглож байсан А.Алтанхуяг, “On’n Off” продакшны захирал С.Ононбат нар тоглож байлаа. Огт солигдож байгаагүй 3 үндсэн гишүүн байдаг нь “LADY”ХХК-ийн ерөнхий захирал, басс гитарчин Х.Эрдэнэбат, “Чингисийн тал” ТББ-ын дэд тэргүүн гоцлол гитарчин Л.Энхбаяр, мөн даралтат хөгжимчин Т.Түвшинтөр миний бие юм. Миний хувьд гэвэл Багануур дүүрэгт дуу хөгжмийн багшаар ажиллаж амьдарч байна.

- Танай хамтлагаас цөөнгүй алдартай, чадвартай дуучид, уран бүтээлчид төрсөн гэж ярьдаг. Тэдний тухайд?

     Манай хамтлагаас төрөн гарсан алдартнууд болон олны танил хүмүүс олон бий. Дуучдаас МУГЖ, зууны манлай дуучин Б.Сарантуяа, дуучин Р.Лхамаа, рок эмэгтэй дуучин Д.Түвшинтунгалаг, манайд дагуулж байгаад “Соёмбо” хамтлагийн дуучин болсон н.Мөнгөнцэцэг нар манай хамтлагаас анх гараагаа эхэлсэн. Хөгжимчдөөс дээр дурьдсан хөгжмийн зохиолч Б.Бямбабаяр, Б.Баттүшиг “On’n Off” продакшны захирал С.Ононбат нараас гадна сайн сайн дуучид, хөгжимчид байсан.

“Мөнгөн Харандаа” хамтлаг тарах болсон шалтгаан?

     80-аад оны сүүлээр зах зээлийн шилжилт эхэлж, хувийн хамтлаг байгуулах нь илүү ашигтай байсан учраас хамтлагаа тараан “Улсын Барилгын Зургийн Төв Институт”-ээс гарч Багануур хотод шилжин суурьшиж, хамтлагийн гишүүн Л.Энхбаяр, н.Баатаржав, А.Алтанхуяг бид дөрөв Багануур хотын “Уянга” хамтлагийн гишүүн Б.Бадрал, Т.Алтан-Эрдэнэ, Ч.Жаргалсайхан, Г.Отгонбаатар нартай нийлж “Өчигдөр Өнөөдөр” гэдэг бие даасанхамтлаг байгуулсан. “Өчигдөр Өнөөдөр” хамтлаг нь Монголын 18 аймаг, 3 хот, 300 гаруй сум, бригадуудаар аялан тоглосон. Үүнээс гадна хөрш орнууд болох ОХУ-ын Чита, Улаан-Үд хотууд, Өвөр Монголын Хайлаар, Манжуур, Амгаланбаатар, Алтан-Эмээл зэрэг аймаг хотуудаар айлчлан тоглолт хийсэн.