Үе үеийн барилгачид, ахмадууддаа болон барилгын салбарт мөр зэрэгцэн ажиллаж буй та бүхэндээ барилгачдын баярын мэнд дэвшүүлж, бүтээн байгуулах их үйлсэд тань улам их амжилт, хүн бүрт эрүүл энх, сайн сайхан бүхнийг хүсэн ерөөж мэндчилье.

        Манай хамт олон Монгол Улсын хөгжлийн түүчээ болсон барилгын салбарын хөгжил дэвшил, алдаа оноо, тулгамдсан асуудлын талаарх мэдээ мэдээллийг Барилга.МН сэтгүүл, сайт болон зохион байгуулж байгаа үзэсгэлэн, бусад арга хэмжээгээрээ дамжуулан  хүргэж, мэдээлэлтехнологийн ололтыг ашиглан барилгын салбарыг хүнд сурталгүй, нээлттэй, ил тод болгохын төлөөзорин ажиллаж байна.Бид Барилгын салбарыг нуруун дээрээ үүрч яваа мянга мянган бизнес эрхлэгчид, барилгачдынхаа амжилт ололтыг хамтдаа хуваалцаж, алдаа оноог нь дэнсэлж, сайн үйлсийг тань дэмжиж, та бүхнийхээ дуу хоолой болж ажиллах болно. 

2013 онд Монгол улсын барилгын салбарт хууль, эрх зүйн  шинэчлэлийн алхамууд хийгдэж, Засгийн газраас барилгын салбарт үзүүлсэн санхүүгийн дэмжлэг болон иргэдийг орон сууцжуулах 8 хувийн хүүтэй орон сууцны ипотекийн зээлийн хөтөлбөрийг баталсан нь барилгын салбарын бизнес эрхлэгчдэд томоохон дэмжлэг болж байна.

        “Барилга Орон сууц-2013” үзэсгэлэн яармагт ипотекийн зээлийн хөтөлбөрийг хэрэгжүүлж буй арилжааны банкуудыг урьж оролцуулж байгаа бөгөөд Улаанбаатар хотод баригдаж буй шинэ орон сууцнуудын талаарх дэлгэрэнгүй танилцуулга, Гэр хорооллын дахин төлөвлөлтийн төсөл хөтөлбөрийн тухай, Барилгын салбарт нэвтэрч байгаа шинэ материал, дэвшилтэт технологийн мэдээллийг нэг дороос авах боломжийг иргэдэд олгож байна.

“Барилга Орон сууц-2013” үзэсгэлэн яармаг нь барилгын салбарын хөгжил дэвшлийг илэрхийлэхийн сацуу салбарын бизнес эрхлэгчдийн хамтын ажиллагааг өргөжүүлэн, үйл ажиллагааг нь олон нийтэд сурталчилан таниулдагаараа онцлогтой билээ.

Үзэсгэлэн яармагийг зохион байгуулахад дэмжлэг үзүүлсэн Төрийн захиргааны болон төрийн бус байгууллагууд, салбарын үйл ажиллагааг дэмжин ажилласан ивээн тэтгэгчид, үзэсгэлэн яармагт оролцогч та бүхэндээ талархал илэрхийлье.

Эрхэм хүндэт Барилга.МН сэтгүүлийг уншигч таны болон барилгын салбарт  ажиллаж буй та бүхний минь ажил үйлс тань үргэлж өөдлөн дэвжиж байхын ерөөлийг өргөе.

Барилга.МН сэтгүүлийн үүсгэн байгуулагч

Барилгын Зөвлөгөө Мэдээллийн Төвийн Захирал                  

Г.Батсүх