Өчигдөр УИХ-ын дарга З.Энхболд Улаанбаатар хийгдэж буй бүтээн байгуулалтын ажлын явцтай танилцлаа. Түүнийг дагалдаж нийслэлийн Засаг дарга Э.Бат-Үүл, Барилга, хот байгуулалтын сайд Ц.Баярсайхан, УИХ-ын Эдийн засгийн байнгын хорооны дарга Б.Гарамгайбаатар, УИХ-ын гишүүн Х.Болорчулуун,О.Баасанхүү, С.Одонтуяа болон нийслэлийн холбогдох албаныхан Баянзүрх дүүргийн 8-р хороо, Батлан хамгаалах их сургуулийн хойд талд байх  гэр хорооллын дахин төлөвлөлт, Сүхбаатар дүүргийн 7-р хорооллын барилгажилт, автозам, дэд бүтцийн ажлын явцыг газар дээр нь үзэж сонирхов.  

       Сүхбаатар дүүргийн нутаг дэвсгэрт хэрэгжиж буй орон сууцны долдугаар хороолол төслийг “Бэрэн” групп гүйцэтгэж байгаа бөгөөд энд зургаан мянган авто машины граж,  гурван мянган ил зогсоол, 9600 айлын орон сууц, гурван мянган хүүхдийн сургууль, мянган хүүхдийн цэцэрлэг, 250 хүний ортой эмнэлэг баригдах юм. Төслийн гүйцэтгэл нь 85 хувьтай явж байгаа,  дэд бүтцийн асуудал шийдэгдчихвэл энэ онд багтаагаад ашиглалтад оруулна гэж төслийн удирдагч Ц.Эрдэмбаяр тайлбарлалаа.

    Ажлын хэсэг Хайлаастын 49 дүгээр сургуулийн гадна хэрэгжүүлж буй “Бохирыг цэвэршүүлэх байгууламж төсөл” буюу септик танктай танилцсан. Энэхүү төсөл нь Азийн хөгжлийн банкны санхүүжилтээр хэрэгжиж байгаа бөгөөд эхний ээлжинд нийслэлийн нийт 26 сургуульд цэвэрлэх байгууламж барих ажээ. Бохирын цэвэрлэх байгууламж нь механик, биологийн, хөрсний гэсэн гурван үе шаттайгаар усыг цэвэрлэдэг гэнэ. Энэхүү технологи нь байгаль орчинд ээлтэй, газар төлөвлөлтөд нөлөө үзүүлэхгүй, ашиглалтын зардал багатай, өвөл хөлдөхгүй, үнэр гардаггүй зэрэг давуу талтай аж. Ингэхдээ бохирыг цэвэршүүлэн хөрсөнд нь бордоо болгон шингээх юм байна. Өөрөөр хэлбэл, тус септик танк нь агааргүйгээр маш сайн битүүмжлэгдсэн учраас ямар ч нянг устгах хүчин чадалтай ажээ. Ийм цэвэрлэх байгууламжийг гадаадын оронд  айлууд ч өргөн хэрэглэдэг гэдгийг төслийн гүйцэтгэгч “Атмор” ХХК-ийн гүйцэтгэх захирал С.Саруулсайхан хэлсэн юм. Сургууль, цэцэрлэгүүд бохироо соруулахад жилд 20 гаруй сая төгрөг зарцуулдаг гэнэ. Тэгвэл тус цэвэрлэх байгууламжийг 22 сая төгрөгийн хөрөнгөөр барьж байгаа бөгөөд 50-100 жил ашиглах боломжтой аж.

     Гэр хорооллын дахин төлөвлөлт төслийн хүрээнд нийслэлийн Баянзүрх дүүргийн 8, 16 дугаар хороонд “Баганат-Өргөө” ХХК нийт 24 тэрбум төгрөгийн хөрөнгөөр орон сууцны хороолол барих гэж байгаа юм. Одоогийн байдлаар айлуудаа нүүлгэсэн бөгөөд барилгын сууриа тавихаар газраа ухаж байлаа. “Баганат-Өргөө” компаний гүйцэтгэх захирал Б.Нанзаддорж “Эндэхийн хөрс муу, ус ихээр шүүрч байгаа учраас ажил явагдахад хүндрэлтэй байгаа. Гэвч бид гэрээнд заасан хугацаандаа шуурхай ажиллаж орон сууцны чанартай хороолол барих болно. Хамгийн эхний орон сууцыг ирэх оны дөрөвдүгээр улиралд багтаан ашиглалтад оруулна” гэв.

    Нийслэлийн Хан-Уул дүүргийн X хороонд баригдаж буй шинэ эх нялхсын эмнэлгийн барилгатай мөн танилцлаа. Энэхүү эмнэлгийг “Нийслэл өргөө”, “Пума” компани хамтран барьж байгаа юм. Эмнэлгийн барилгын шавыг 2011 онд анх тавьсан бөгөөд өнөөг хүртэл ашиглалтад ороогүй байгаад УИХ-ын дарга шүүмжлэлтэй хандаж байгаагаа илэрхийлсэн.

     Энэ талаар БХБ-ын сайд Ц.Баярсайхан тайлбарлахдаа: “Өнгөрсөн жилээс хойш барилгын ажил зогссон. Гүйцэтгэгч компанийн зүгээс дэд бүтэц шийдэгдэхгүй болохоор ажил удаашраад байна гэдэг байсан. Тиймээс энэ жил дэд бүтцийн асуудлыг шийдэж өгсөн. Одоо бол барилгын ажлаа саадгүй үргэлжлүүлж болно” гэсэн юм.

         Мөн ажлын хэсэг Эрэл группын дайрга, асфальт, тоосгоны үйлдвэр, Буянт-Ухаа дахь шинээр баригдаж байгаа орон сууцны хорооллын цэвэрлэх байгууламж, дэд бүтцийн ажил болон шинээр баригдаж буй төрөх эмнэлгийн ажилтай тус тус танилцлаа.

    Цэвэрлэх байгууламжийн ажил хэвийн үргэлжилж байгаа бөгөөд дэд бүтцийн асуудлыг бүрэн шийдсэн гэнэ. Ажлын хэсгийн дараагийн очсон газар нь  “Премиум конкрит” ХХК-ийн бетон зуурмагийн үйлдвэр байлаа. Хятад, Солонгос хөрөнгө оруулалттай барилгын компаниуд бетон зуурмагаа өөрсдийнхөө үйлдвэрлэгчдээс л авах сонирхолтой байдаг. Иймээс үндэсний үйлдвэрлэгчдээ төрөөс дэмждэг бодлого баримтлахыг хүсч байгаагаа “Премиум конкрит” компанийнхан илэрхийлсэн юм.