Улаанбаатар хотын утааны асуудлыг жил бүрийн намар хэлэлцдэг уламжлал тогтжээ. Энэ жилийн ээлжит хурал өчигдөр болж өнгөрлөө. Тус хурлаар “Агаарын бохирдлыг бууруулах үндэсний хороо” агаарын бохирдлыг багасгах зорилгоор өнгөрсөн жил хийсэн ажлуудаа тайлагнахын зэрэгцээ цаашид авч хэрэгжүүлэх арга хэмжээний талаар танилцууллаа.     

          Нийслэлийн агаарын бохирдлыг бууруулах ажлын хүрээнд “Агаарын бохирдлыг бууруулах үндэсний хороо”-ноос  гэр хорооллын өрхүүдэд 2011-2013 онд нийт 121.6 мянган ширхэг сайжруулсан зуух, гэрийн дулаалга 21 мянган ширхэг, 7.5 мянган дулаан баригч, нэг мянган яндангийн шүүлтүүр, 5.15 мянган гонх, 98 тооны эрчим хүчний хэмнэлтэй сууцыг хөнгөлөлттэй үнээр болон үнэ төлбөргүй олгожээ. Цаашид нийслэлийн гэр хорооллын өрхийг сайжруулсан зуухаар бүрэн хангахад 45 мянган ширхэг зуух шаардлагатай байгаа бөгөөд энэ ажлыг “Цэвэр агаар сан” болон Дэлхийн банкнаас шинээр хэрэгжүүлж байгаа “Улаанбаатар-Цэвэр агаар” төслөөс хамтран хэрэгжүүлэхээр болсон байна.

         Дэлхийн банкны  “Улаанбаатар-Цэвэр агаар“ төслийн хүрээнд нийслэлийн төвийн зургаан дүүрэгт 15 сая ам.долларын хөнгөлөлттэй зээл хэрэгжүүлж,эрчим хүчний хэмнэлттэй зуухаар хангахаар төлөвлөжээ. 15 төрлийн зууханд ШУТИС-ийн лабориторийг ашиглан туршилт хийхэд дөрвөн төрлийн зуух тэнцсэн байна. Эдгээрийн  нэг нь дотоодын үйлдвэрийн, нөгөө нь Хятадад үйл ажиллагаа явуулдаг Монголын хөрөнгө оруулалттай үйлдвэрийн, үлдсэн хоёр нь Туркт үйлдвэрлэсэн зуух ажээ. Эрчим хүчний хэмнэлттэй зуухыг 29 мянга орчим төгрөгөөрборлуулах саналтай байгаа аж.    

        Мөн тус хурал дээр Агаарын бохирдлыг бууруулах үндэсний хорооны дарга П.Цагаан шахмал түлшний үйлдвэрүүдтэй гэрээгээ түргэн байгуулах, бүрэн шаталтат нанобензин, нанотехнологийг нэвтрүүлэх ажлыг шуурхайлах хэрэгтэй гээд ДЦС-2 ТӨХК шахмал түлшний үйлдвэр барих амлалтаа хэрэгжүүлж чадахгүй бол мөнгөө буцааж тушаа, эсвэл түлшээ цаг алдахгүй нийлүүлэх ёстой гэдгийг хатуу анхаарууллаа.

         Нийслэлийн хэмжээнд жилд дунджаар 800 мянган тонн түлш хэрэглэдэг бөгөөд2012-2013 оны халаалтын улиралд нийслэлийн түүхий нүүрс түлэхийг хязгаарласан бүсийн нийт өрхийг шахмал түлшээр бүрэн хангахад 34 мянган тонн түлш шаардлагатай байжээ. Гэвч ДЦС-2 компанийг түшиглэн барьж байгаа хагас коксжуулсан шахмал түлшний үйлдвэр ашиглалтад ороогүй, одоо ажиллаж байгаа шахмал түлшний жижиг үйлдвэрүүд төслийн хүчин чадлаараа ажиллах боломжгүй байснаас 8.000 тонн түлшийг л нийлүүлсэн байна. Улаанбаатар хотын утааг 50 хувиар бууруулах боломжтой түлш бол үртсэн шахмал түлш гэнэ. Гэвч энэ нь түүхий нүүрснээс 2-3 дахин өндөр үнэтэй, нийслэлийн өмчит нэг, хувийн хэд хэдэн үйлдвэр нийлээд жилд ердөө найман мянган тонн шахмал түлш гаргадаг. Монголд мод боловсруулах үйлдвэр цөөн тул үртсээр хангах боломжгүй, ОХУ-ын Красноярск, Иркутск орчмоос модны үртэс авах боломжтой ч тээврийн зардал маш өндөр байдаг аж. Нэг тонн үртэсний үнэ 253 мянган төгрөг, үүгээр зөвхөн Баянгол дүүргийг хангая гэвэл 7,6 тэрбум төгрөг хэрэгтэй гэсэн тооцоо гаргажээ. Нийт 600 мянга орчим тонн үртэс авч чадвал Улаанбаатарын утааг 60 хувь бууруулах боломжтой юм байна. Харин ирэх жил хотын утааг бууруулах ажилд зориулж 200 орчим тэрбум төгрөг төсөвт суулгуулахаар болжээ.