Социализмын үед нийслэлийн 3,4-р хорооллыг босгосон түүхэн гавьяатай “Байшин үйлдвэрлэх комбинат”-ыг сэргээж, шинэ бүтээн байгуулалтын гол бэлтгэн нийлүүлэгч болгохоор Шинэчлэлийн Засгийн газар өнгөрөгч хавар шийдвэр гаргаж, хөрөнгө төсөв баталсан. Энэ хугацаанд тус үйлдвэрт орчин үеийн өндөр хүчин чадалтай тоног төхөөрөмжүүд суурилуулж, туршин тохируулж, үйлдвэрлэлд бэлэн болгожээ. Эхний ээлжинд Төмөр замын бетон дэрний үйлдвэрийг нь ашиглалтад орууллаа.   

           Барилгын салбарын хамгийн томд тооцогдохоор байгаа энэ үйлдвэрт эрчим хүч, дулааны шугам сүлжээ, дэд бүтэц, зам барилгын төмөр бетон эдлэлүүд үйлдвэрлэх бөгөөд үйлдвэрийн 3 шугам дээр нэг удаад 1128 ширхэг бетон дэр цутгаж, жилдээ 350-500 мянган ширхэг бетон дэр гаргах аж. Үйлдвэрлэлийн гол тоног төхөөрөмжүүд нь Английн RMS компанийнх бөгөөд эдгээр нь тэнхлэг дээрээ 23-32 тн-ыг даах хүчин чадалтай бетон дэр гаргана. Энэ нь 132 тн жинтэй вагон явах даацтай гэсэн үг. Бетон дэрэндээ Англи улсын Пандрол системийн бэхэлгээ, хэвийг ашиглаж байгаа бөгөөд  уг бэхэлгээ нь дэлхийн хамгийн халуун, хүйтэн цэгүүдэд, хамгийн хурдан болон хүнд даацын төмөр замуудад хэрэглэгдэж байгаа сүүлийн үеийн технологи гэнэ. Европ стандартад бүрэн нийцүүлэн үйлдвэрлэсэн бетон дэрийг  ирэх хавар эхлэх Тавантолгой-Гашуунсухайт чиглэлийн 217 км шинэ төмөр замын угсралтын ажилд ашиглах юм. Төмөр замын угсралтад шаардагдах 500 мянган ширхэг бетон дэрийг өвөл бэлтгэж, хугацаа хоцрохгүй нийлүүлэх үүргийг тус үйлдвэр хүлээгээд байгаа ажээ.

             1991 оноос хойш Монголд өвлийн улиралд бетон зуурмаг үйлдвэрлэх боломжгүй байсан бол “Улаанбаатар БҮК”-ийнхэн энэ асуудлыг шийдвэрлэж, 400-500м³ элс хайрга халаах 4 бункер зохион бүтээж үйлдвэрлэлдээ нэвтрүүлжээ.