Нийслэлийн удирдлагын зөвлөлийн гишүүдийн ээлжит хуралдаанаар “Орон сууцны санхүүжилтийн корпораци”/ОССК/-ийн чиг үүрэг, орон тоо, төсөв, үл хөдлөх болон эд хөрөнгийг “Төрийн орон сууцны санхүүжилтийн корпораци/ТОССК/”-д шилжүүлэх асуудлыг хэлэлцлээ.

         Нийслэлийн удирдлагууд энэ асуудлыг хэлэлцээд, орон нутгийн өмчийн хөрөнгийг төрийн өмчид шилжүүлэх асуудлыг НИТХ-д өргөн барихаар шийдвэрлэсэн байна. Өөрөөр хэлбэл, ОССК-ийн өмч хөрөнгө, үйл ажиллагааг ТОССК-д шилжүүлэх эсэхийг НИТХ-ын төлөөлөгчдийн хурлаар эцэслэн шийдвэрлэх юм.

          Одоогийн байдлаар “Орон сууцны санхүүжилтийн корпораци” ХХК-ийн дүрмийн сангийн 51 хувийг НЗДТГ, 24.5 хувийг Сангийн яам, 24.5 хувийг Барилга, хот байгуулалтын яам эзэмшдэг. ОССК нь хүн амыг орон сууцаар хангах төрийн бодлого, зорилтыг хэрэгжүүлэх ажлын хүрээнд үл хөдлөх хөрөнгө барьцаалан зээл олгох, санхүүгийн хөрөнгө оруулалт хийх зэрэг барилга-санхүүгийн үйл ажиллагааг хосолмол хэлбэрээр үзүүлж байсан. Харин Монгол Улсын Засгийн газраас орон сууцны талаар баримтлах бодлого, хэрэгжүүлэх үйл ажиллагааг төвлөрсөн удирдлагаар хангах, иргэдийг орон сууцаар хангах төрийн орон сууцны төвлөрсөн тогтолцоог бүрдүүлэх зорилгоор Засгийн газрын 2013 оны 253 дугаар тогтоолоор тус байгууллагыг “Төрийн орон сууцны санхүүжилтийн корпораци” /ТОССК/ 100 хувь төрийн өмчит улсын үйлдвэрийн газрыг үүсгэн байгуулж, Засгийн газрын 2013 оны 218 дугаар тогтоолоор дүрэм, орон тоог баталж, улсын бүртгэлд бүртгүүлээд байгаа билээ.

         ОССК нь энэ оны эхний хагас жилийн санхүүгийн тайлангаар 108,5 сая төгрөгийн ашигтай ажилласан бөгөөд нийт хөрөнгө 168.384.8 сая төгрөгнөөс эргэлтийн хөрөнгө 166.787.7 сая төгрөг, эргэлтийн бус хөрөнгө 1.597.1 сая төгрөг, нийт өр төлбөр 168.264.8 сая, үүнээс 13.175.0 сая төгрөгийн богино хугацаат өр, 155.089.8 сая төгрөгийн урт хугацаат өртэй байна. Нийслэлээс хамааралгүй үүссэн эдгээр өр төлбөрийг Засгийн газар өөртөө шилжүүлж байгаа аж.