“Construction Mongolia- 2013” олон улсын үзэсгэлэн, хурлыг 2013 оны 10 дугаар сарын 18-20-ны өдрүүдэд зохион байгуулах гэж байна.
Төр, хувийн хэвшлийн байгууллага, гадаад, дотоодын хөрөнгө оруулагчдын хамтын ажиллагааг хөгжүүлэх, тэдэнд барилгын салбарын бодлогыг танилцуулах зорилгоор “Construction Mongolia-2013”сэдэвт олон улсын үзэсгэлэн, хурлыг энэ сарын 18-20-нд зохион байгуулах гэж байна.
Барилга, хот байгуулалтын яамнаас 2013 оныг “Барилга, хот байгуулалтын салбарын бодлого, эрх зүйн орчинг шинэчлэх жил” болгон зарласан билээ. Үүнтэй холбогдуулан зохион байгуулж буй энэхүү үзэсгэлэн, хурлаар төр, хувийн хэвшил, олон улсын банк санхүү, хамтын ажиллагааны байгууллагууд, барилгын салбарын аж ахуйн нэгжүүд, мэргэжлийн холбоод, дэлхийн нэр хүндтэй компаниудын төлөөлөл хуран чуулах юм. Тэд монгол орны барилгын салбарын ирээдүйн хөгжлийн талаар ярилцаж, туршлага солилцох юм.
“Construction Mongolia-2013” олон улсын хурлын зохион байгуулагчаар Барилга, хот байгуулалтын яам, Барилгын хөгжлийн төв, хамтран зохион байгуулагчаар “Global Group” ажиллаж байна. Түүнчлэн ивээн тэтгэгч байгууллагаар “Моринхууртауэр” ХХК, “БэрэнГрупп”, “UNDP” ХХК, “Одкон” ХХК, “БаганатӨргөөГрупп”,“Нишин-Илч” ХХК, “SDevelopment” LLC одоогоор оролцож байгаа юм.
Үзэсгэлэн, хуралд оролцогчдод Монгол Улсын Шинэчлэлийн Засгийн газрын мөрийн хөтөлбөртэй танилцах, хамтран ажиллах шинэ түншээ сонгох, шинэ дэвшилтэд технологитой танилцах, хөрөнгө оруулагч, гүйцэтгэгч компанитай түншлэх боломж бүрдэж буй юм. Түүнчлэн оролцогчид “Улаанбаатар хотын өнгөрсөн ба одоо” фото зургийн үзэсгэлэн үзэж сонирхонгоо олон улсын байгууллагуудтай хамтран ажиллах харилцаа холбоо тогтоох боломжтой. Хуралд оролцох хүсэлтэй хувь хүн болон албан байгууллагынхан “Construction Mongolia-2013” үзэсгэлэнг зохион байгуулах багийн 9967-6359, 11-320338 дугаарын утсаар дамжуулан мэдээлэл авахаас гадна Барилгын хөгжлийн төвийн нэг цэгийн үйлчилгээний төвд өөрийн биеэр очиж бүртгүүлэх боломжтой.
Дашрамд дуулгахад 10 сарын 18-20 өдөрүүдэд УДЭТ-аас Буянт-Ухаа спорт цогцолбор хүртэл нэг цаг тутам автобус явах тул энэхүү үзэсгэлэнг сонирхсон хүмүүс уг автобусаар үнэгүй үйлчлүүлэх боломжтой юм.