Өнөөдөр Монголын Барилгачдын баярын өдөр, “Барилга Орон Сууц-2013” үзэсгэлэн яармагийн нээлтийн ёслол нэгэн зэрэг тохиож  байна. Монгол улсад Барилгын салбар үүсч хөгжсөний 87 жилийн түүхэн ойн баярт зориулсан барилгын салбарын “Барилга Орон Сууц-2013” үзэсгэлэн Мишээл экспо төвд албан ёсоор нээлтээ хийлээ.

         Нээлтийн арга хэмжээнд Барилга хот байгуулалтын яамны Төрийн захиргаа удирдлагын газрын дарга Ц.Доржпалам, Барилгын хөгжлийн төвийн захирал Б.Баярсайхан, орлогч захирал Ч.Отгончулуун, Гэр хорооллын хөгжлийн газрын дарга Ш.Ганхуяг, Барилгын зөвлөгөө мэдээллийн төвийн захирал Г.Батсүх, Монголын барилгачдын холбооны ерөнхийлөгч М.Батбаатар, Барилгын хөгжлийн үндэсний нэгдсэн төвийн ТУЗ-ийн дарга Г.Мягмар, Зураг төсөл зохиогчдын холбооны гүйцэтгэх захирал А.Батцэнгэл, Барилгын материал үйлдвэрлэгчдийн холбооны гүйцэтгэх захирал О.Лхагвадорж нарын хүндэт зочид төлөөлөгчид ирж оролцлоо.

       Барилгын зөвлөгөө мэдээллийн төвийн захирал Г.Батсүх үзэсгэлэн яармагийн нээлтийн арга хэмжээг нээж хэлсэн үгэндээ: “Бүтээн байгуулалтын ажлууд ид өрнөж буй энэ үед барилгачдын баярыг тохиолдуулан зохион байгуулж буй “Барилга орон сууц 2013” бүзэсгэлэн яармагийн нээлтийн ёслолд хүрэлцэн ирсэн хүндэт  зочид төлөөлөгчид,  оролцогч компаниуд, үзэсгэлэнг үзэж сонирхохоор ирсэн бүх хүмүүстээ Монгол улсад барилгын салбар үүсч хөгжсөний 87 жилийн ойн баярын мэндийг та бүхэнд хүргэе. 

         2013 онд Монгол улсын барилгын салбарт хууль, эрх зүйн  шинэчлэлийн алхамууд хийгдэж, Засгийн газраас барилгын салбарт үзүүлсэн санхүүгийн дэмжлэг болон иргэдийг орон сууцжуулах 8 хувийн хүүтэй орон сууцны ипотекийн зээлийн хөтөлбөрийг баталсан нь барилгын салбарын бизнес эрхлэгчдэд томоохон дэмжлэг болж байна. Түүнчлэн Улаанбаатар хот, хөдөө орон нутаг  даяар гэр хорооллын дахин төлөвлөлт, дэд бүтцийн өргөтгөл, “Шинэ сум” төсөл зэрэг бүтээн байгуулалтын томоохон ажлууд хийгдэж эхэлсэн нь Монгол улсын хөгжлийг түргэсгэх чухал алхам болсон юм. Энэ утгаараа “Барилга Орон сууц-2013” үзэсгэлэн яармаг нь Засгийн газраас хэрэгжүүлж буй ипотекийн зээлийн хөтөлбөр, Улаанбаатар хотод өрнөж буй бүтээн байгуулалтын ажлуудыг танилцуулах, дүгнэх боломжийг та бидэнд олгож байгаагаараа онцлог юм “ гэлээ.

        “Барилга орон сууц 2013” үзэсгэлэнгийн Ерөнхий ивээн тэтгэгчээр Мега пластик системс ХХК, Империал кастел ХХК оролцож байгаа бөгөөд үзэсгэлэнд нийтдээ Монголын үндэсний 120 гаруй шилдэг аж ахуйн нэгжүүд оролцож үзэсгэлэнгийн өдрүүдэд шинэ орон сууц, барилгын материал, дэвшилтэт техник технологидоо хямдрал урамшуулал зарлаж, дээрээс нь үзэсгэлэнг зорьж очсон хүмүүсийг бөөн бөөн бэлэгнүүд хүлээж байна.

         Үзэсгэлэнгийн арга хэмжээ энэ сарын 8-ыг дуустал Мишээл экспо төвд үргэлжилнэ. Та бүхэн энэ амралтын өдрүүдээр Мишээл төвд зочилж шинэ орон сууц, амины орон сууц, өөрт хэрэгтэй барилгын материал, шинээр нэвтэрч буй дэвшилтэт технологио үзэж сонгоод, хямдралтай үнээр аваарай.

Нээлтийн арга хэмжээнд хүрэлцэн ирсэн хүндэт зочид үзэсгэлэнг нээж үг хэлэв

Ёслолын тууз хайчилж байна

"Барилга орон сууц 2013" үзэсгэлэн нээлтээ хийлээ

Үзэсгэлэнд оролцогч компаниудын төлөөлөл