Монгол улсын Засгийн газраас 2012-2016 онуудад иргэдийн орон сууцны хангамжийг нэмэгдүүлэх,амьдрах ая тухтай орчинг бүрдүүлэх, инженерийн дэд бүтцийн барилга байгууламжуудыг барьж байгуулах, өргөтгөн шинэчлэх зорилтыг тавьж “ Шинэ бүтээн байгуулалт” хөтөлбөрийг хэрэгжүүлж байгаа билээ.  

         Тус хөтөлбөрийн хүрээнд БХБЯам, НЗДТГазар хамтран “”Дэд бүтэц”” төслийн нэгж байгуулж, Улаанбаатар хотод орон сууцны 10 хороолол, гэр хорооллын 12 байршилд инженерийн дэд бүтцийн барилга, байгууламжийн 73 төсөл, арга хэмжээг хэрэгжүүлэхээр төлөвлөн ажиллаж байна.  Эдгээр төсөлд Улаанбаатар хотын Баянгол, Буянт-Ухаа, Шинэ Яармаг, Ирээдүй, Солонго, Берлин-Эко, 7, 14 дугаар хороолол, МҮОНРТелевиз орчмын орон сууцны хороолол,  Дэнжийн 1000, Гандан, Хайлааст, Ханын материал, Баянзүрх дүүргийн 8, 12, 16 дугаар хороо, Сүхбаатар дүүргийн 15, 16, 17 дугаар хороо, Сонгинохайрхан дүүргийн 10 дугаар хороо, Чингэлтэй дүүргийн 7 дугаар хорооны гэр хорооллууд хамрагдаад байгаа юм.

            Төсөлд хамрагдсан эдгээр хорооллуудад 10 кв-ын 16 хуваарилах байгууламж, цахилгаан дамжуулах 147 дэд станц, 10 кв-ын  196 мянган метрийн кабель шугам, дулаан дамжуулах 57 төв, 215 мянган метр дулаан хангамжийн шугам, цэвэр усны 13 мянган метрийн цэвэр усны гол шугам, бохир усны 4500 метр шугам, бохир усны носасны 2 станц барьж байгуулах бөгөөд гэр хорооллуудын дулаан хангамжийн  7 эх үүсвэрийг өргөтгөн шинэчлэх, цэвэр усны эх үүсвэрийг нэмэгдүүлэх  20 гүний худаг гаргах, 2800 метр кубын эзэлхүүнтэй  хоёр усан сан байгуулах ажлууд хийгдэхээр төлөвлөгдсөн.  

        Түүнчлэн төслийн хүрээнд Буянт-Ухаа орон сууцны хороололд 15000 өрхийн  / 60000 хүн ам / хэрэглээг хангах цэвэр, бохир усны болон дулаан,цахилгаан хангамжийн инженерийн дэд бүтцийн бүтээн байгуулалтын 57 тэрбум төгрөгийн төсөвт өртөгтэй нийт 8 төрлийн ажил хийгдэхээр батлагдсанаас одоогийн байдлаар 7 ажил эхлээд байна. 200 га талбайг хамарсан Буянт-Ухаа орон сууцны хорооллын дулааны шугам сүлжээний ажил, цэвэр усны инженерийн шугам сүлжээ, бохир усны шугам сүлжээ, гадна цахилгааны шугам сүлжээний ажлууд энэ оны 11 дүгээр сарын 1 гэхэд дуусах ёстой бөгөөд Буянт-Ухаа орчимд инженерийн дэд бүтцийн барилга байгууламж, шугам сүлжээ баригдсанаар орчин үеийн тохилог 15000 айлын орон сууцны барилга, 7500 хүүхдийн сургууль, 3750 хүүхдийн цэцэрлэг, 60 ортой ахмадын эмнэлэг, өдөрт 1315 хүнд үзлэг хийх өрхийн эмнэлэг, 300 эхийн төрөх эмнэлэг, төрийн байгууллагууд,  их сургууль болон спорт цогцолборын 5-21 давхар бүхий барилга объёкт шинээр баригдах бололцоо бүрдэх юм.

      Мөн Сонгинохайрхан дүүргийн 1-р хороо Баянголын аманд 450 га газарт орон сууцны хороолол барих хэсэгчилсэн ерөнхий төлөвлөгөө батлагдсанаас  Буман-Өлзий, Мянганы хотхон зэрэг орон сууцны хорооллууд баригдаж эхлээд байна.  Энэхүү төлөвлөгөөгөөр 18435 өрхийн 70055 хүн Баянголын аманд амьдрах юм.  Дэд бүтэц төслөөс хэрэгжүүлж байгаа Баянголын амны инженерийн шугам сүлжээний багц 3 ажлыг 13,3 тэрбум төгрөгөөр санхүүжүүлж байгаа бөгөөд энэ оны 11 сарын 1-нд дуусгахаар гүйцэтгэгч компаниуд ажиллаж байна.