Өнөөдөр  Барилга-Бүтээн байгуулалт-Хөгжил сэдэвт хэлэлцүүлэг МҮСТО-д боллоо. Уг

хэлэлцүүлэгт Барилга, хот байгуулалтын  сайд Ц.Баярсайхан, дэд сайд Г.Байгальмаа, ТНБДарга Р.Эрдэнэбүрэн болон тус яамны газрын дарга нар оролцлоо.

Хэлэлцүүлгийг БХБЯ-ы сайд Ц.Баярсайхан нээж “Барилгын салбарын шинэчлэл” сэдвээр илтгэл тавьлаа. Мөн Газрын харилцаа, геодези зураг зүйн газрын дарга А.Хүрэлшагай, Барилгын хөгжлийн төвийн дарга Б.Баярсайхан, Орон сууц санхүүжилтийн корпорацийн захирал А.Гантулга нар барилгын салбарын өнөөгийн байдал, салбарын шинэчлэл болон тулгамдсан  асуудлын талаар илтгэл тавьлаа.

Хэлэлцүүлэг хөтөлбөрт барилгын салбарын байгууллага, аж ахуйн нэгжүүд өргөнөөр оролцож төрийн албаныханд санал хүсэлт, шүүмжлэлээ нээлттэй илэрхийлсэн. МҮСТО-д урлаг соёлын арга хэмжээ болж байна уу гэж эндүүрэхээр олон хүн цугласан байснаас харахад БХБЯ-аас санаачлан зохион байгуулсан энэхүү хэлэлцүүлэг нь аргагүй л цаг үеэ олсон, барилгын салбарынхны хүсч хүлээж байсан арга хэмжээ боллоо гэж дүгнэхээр байлаа.

Барилга хот байгуулалтын сайд илтгэлдээ барилга эхлүүлэх ба үргэлжүүлэх зөвшөөрлийг Нийслэлийн хот төлөвлөлтийн газраас шинэчилсэн журмын дагуу олгох болсон, тусгай зөвшөөрөл олгох ажлыг хүндрэлгүй, түргэн шуурхай зохион байгуулдаг болох талаар, экспертизтэй холбоотой ажлыг хувийн хэвшлээр гүйцэтгүүлэх боломжтой тухай дурьдсан. Мөн тэрээр хотын дахин төлөвлөлт болон газар чөлөөлөхтэй холбогдсон бусад асуудлын талаар төрөөс авч хэрэгжүүлж байгаа арга хэмжээг дэлгэрэнгүй танилцууллаа.

Танилцуулах илтгэлүүдийн дараа барилгын салбарынхны дунд нээлттэй хэлэлцүүлэг өрнөсөн. Хэлэлцүүлэгт хүрэлцэн ирсэн барилгын байгууллагуудын дийлэнхи хувийг барилга угсралтын компаний төлөөлөл эзэлж байсан бөгөөд тэдэнд бүтээн байгуулалтын ажлыг хийж гүйцэтгэхэд олон хүндрэл бэрхшээл тохиолдож байгаагаас хамгийн чухал нь төрийн бодлого салбарын үйл ажиллагаатай уялдаж чадахгүй байгааг  санал нэгтэйгээр шүүмжилсэн. Мөн барилгын салбарын хөгжлийг хойш нь татаж байгаа нэг  хүчин зүйл нь төрийн албаны хүнд суртал гэж үзсэн бөгөөд хувийн хэвшлээр гүйцэтгүүлэх боломжтой зарим чиг үүргийг төрийн байгууллага өөр дээрээ төвлөрүүлэн ачаалал үүсгэж байгаа талаар  олон хүн саналаа хэлсэн. Хэлэлцүүлгийн хүрээнд хөндөгдсөн нэгэн чухал сэдэв бол барилгын материалын үйлдвэрлэлийг дэмжих тухай асуудал байв.

Хэлэлцүүлэгт оролцогчид тусгай зөвшөөрөл авах, барилгын үйл ажиллагаа эрхлэх зэрэгт барилгын мэргэжилтэй боловсон хүчний хүрэлцээ дутмаг байдгаас ихээхэн хүндрэл үүсдэг тухай онцолж байсан бөгөөд сайд хэлэхдээ барилгын салбарын мэргэжилтэн бэлтгэх асуудлыг төрийн бодлогын хүрээнд авч хэлэлцэж байгаа, МСҮТөвүүдийг дэмжиж ажиллана гэлээ.

Өнөөдрийн хэлэлцүүлгийн үр дүн шинэчлэгдэн батлагдах Барилгын тухай хууль, Газрын тухай багц хууль, Татварын хуулийн төсөлд тусгалаа олох болноо гэж сайд ярианы төгсгөлд амласан юм.