Барилгын материал үйлдвэрлэлийн салбарт үйл ажиллагаа явуулж байгаа үндэсний үйлдвэрлэгчдийн дунд томоохон байр суурь эзэлдэг Хөтөлийн "Цемент-Шохой"ХК, БМҮХ харилцагч компаниудаа БХБЯ дээр хүлээн авч уулзлаа.

 

     Уулзалтын гол зорилго барилгын ажил эхлэхэд хэдий хэмжээний шохой, материал бүтээгдэхүүн хэрэгтэй байгааг тооцоолж гаргах, тэр хэмжээнд шохой болон цементээ үйлдвэрлэн гаргах зорилготой юм. Мөн Хөтөлийн Цемент Шохой компаниас гаргаж байгаа бүтээгдэхүүнийг хэрэглэхэд тулгарч байгаа асуудал юу байна, шийдвэрлэх арга замын талаар санал хүсэлтийг нь сонсохоор уулзсан байна.

 

     Хөтөлийн Цемент Шохой компани нь 65,000 тонн шохой үйлдвэрлэх хүчин чадалтай ч ноднин жил түүхэндээ анх удаа 50,000 тонн шохой үйлдвэрлэсэн бол энэ жил 45,000 тонн шохой үйлдвэрлэх зорилготой ажиллаж байгаагаа дуулгалаа. Энэ жил түлхүү барилгын салбарт бүтээгдэхүүн үйлчилгээгээ хүргэх зорилготой ажиллаж байгаа юм байна.

 

       Харилцагч компаниудаас гарч байсан ихэнх санал нь барилгын ажлын ид үед шохойны хэрэгцээ маш их байдаг боловч хэрэгцээгээ бүрэн хангаж чадахгүйн дээр Хөтөлөөс Улаанбаатар цаашлаад Налайх хүртэл тээвэрлэдэг учраас тээвэрлэлтийн зардал өндөр байгааг хэлж байлаа. Мөн  Хөтөлийн үйлдвэрийн шохой 3 минут орчим хугацаанд унтардагаас хөнгөн бетон үйлдвэрлэхэд хүндрэл үүсдэг учир унтралтын хугацааг 7-8 минут болгох талаар анхаарч өгөхийг хүслээ.