Оюутнуудын эрүүл мэнд, суралцах орчин, нөхцлийг сайжруулах талаар Боловсрол, шинжлэх ухааны яам, Монголын оюутны холбоо хамтран  2012-2013 оны хичээлийн жилд хамтран ажиллах тухай санамж бичгийг өчигдөр ШУТИС-ийн Төв номын сангийн байранд үзэглэлээ. Ингэснээр талууд оюутны эрүүл мэнд, нийгмийн халамж, суралцах орчны талаарх ажлуудыг зөвлөлдөж, Боловсрол, шинжлэх ухааны яамнаас хэлэлцэн шийдээд санхүүгийн дэмжлэг үзүүлэх юм байна.

Энэ талаар Монголын оюутны холбооны ерөнхийлөгч Х.Батсайханаас тодрууллаа.

-Холбооноос төрийн болон төрийн бус байгууллагуудтай их л хамтран ажилладаг. Энэ удаад Боловсрол, шинжлэх ухааны яамтай хамтарч байгаа нь юугаараа онцлог вэ?

 -Их, дээд сургуулийн шинэчлэл гээд ярьж буй энэ цаг үед оюутны оролцоог бий болгох нь чухал гэж үзэж байна. Их, дээд сургуулиуд сургалтынхаа төлбөрийг тогтоох Удирдах зөвлөлд оюутны оролцоо байдаггүй шүү дээ. Энэ байдлыг засах хэрэгтэй. Тухайлбал, тухайн сургуулийн оюутан байхад захирлынхаа өөдөөс дуугарах нь хэр билээ. Тиймээс төрийн өмчийн долоон сургуульд Монголын оюутны холбооны төлөөллийг оруулж байгаа. Ирэх намар 1000 оюутны байр ашиглалтад орно. МОХ 1000 оюутны байрыг оюутнуудын амьдрах жишиг сууц болгох зорилгоор  менежментийн тал дээр нь анхаарч ажиллана. Мөн МОХ-оос оюутны эрүүл мэндийн асуудалд ач холбогдол өгч анхаарна. 

-Оюутнуудын эрүүл мэндийг хэрхэн анхаарна гэж?

-Улаанбаатарт 50 гаруй мянган оюутан хөдөөнөөс ирж суралцаж байна. Хөдөөнөөс ирж байгаа оюутнууд ч гэлтгүй бүх л оюутнуудын хувьд эрүүл мэндийн асуудал чухал юм. Тэгэхээр үүний тулд оюутны Эрүүл мэндийн төв байгуулах саналтай байна. Урьд нь оюутнуудад зориулсан 2004-2007 оны хугацаанд  Хуучин анагаах ухааны их сургуулийг түшиглэсэн орон тооны эмч нартай Эрүүл мэндийн төв ажиллаж байсан ч хаагдсан юм.

-Ямар шалтгаанаар хаагдсан юм бэ?

-Тухайн үедээ эрүүл мэндийн даатгалаас санхүүжүүлэх даатгалын тогтолцоо учир  дутагдалтай байсан учраас хаагдсан. Одоо бол харьцангуй боломжтой болсон шүү дээ. Үүнд салбарын холбогдох яамд, агентлаг анхаарна гэдгээ илэрхийлсэн байгаа.
Оюутан, суралцагчдаас татаас мөнгө авахыг хориглосон тушаал гарсан билээ. Энэ талаар Боловсрол, шинжлэх ухааны яамны Дээд боловсролын хэлтсийн дарга П.Эрхэмбулган  дараах мэдээллийг өгч байна.

-Одоогоор 96 их, дээд сургууль, коллежид 175 мянган оюутан өдөр, орой, эчнээгээр суралцаж байна. Сургууль бүрт тушаалыг хэр дагаж мөрдөж байна гэдгийг хянахад хэцүү учраас Боловсролын яамны 1209 тусгай дугаар бүх л санал, гомдлыг авч байна. Бид энэ тал дээр Мэргэжлийн хяналтын ерөнхий газар болон Авлигатай тэмцэх газартай хамтарч байгаа юм. Ингээд яамны хувьд тусгай дугаарт оюутнуудаас татаас мөнгө авч байна гэсэн гомдол ирээгүй бөгөөд ихэнхдээ багшийн тэтгэмжийн тухай асуулт дийлэнх байна.

-Хэрэв тушаалыг зөрчиж татаас мөнгө авсан нь тогтоогдвол ямар хариуцлага тооцох вэ?

-Үнэхээр оюутнуудаасаа хууль бус, төлбөрийн зориулалтаас бусад татаас мөнгө авч байгаа нь тогтоогдвол хуулийн дагуу тухайн их, дээд сургуулийн үйл ажиллагаа явуулах тусгай эрхийг цуцлах хүртэлх арга хэмжээг авна.