Гэр хорооллыг 6 жилийн дотор дэд бүтцэд холбох боломжтой
Улаанбаатар хотыг дахин төлөвлөж, гэр хорооллыг орон сууцжуулах бодлогыг боловсруулах хэрэгцээ шаардлага нийслэлийн хотын өмнө тулгараад байгаа хамгийн том асуудал болоод байгаа.
Харин яг энэ чиглэлээр олон жилийн туршлагатай, Өмнөд Африкийн томоохон хотуудыг дахин төлөвлөж, орон сууцжуулах ажлыг гүйцэтгэж байгаа Австралийн “Wave international” компани Улаанбаатар хотын хүн амын 70 гаруй хувийг эзэлж байгаа гэр хорооллыг зургаан жилийн дотор дэд бүтцэд бүрэн холбох боломжтой гэж үзэж байна.
Дээрх ажлыг хийж гүйцэтгэхэд хоёр тэрбум ам.доллар хөрөнгө, санхүүжилт шаардлагатай гэсэн урьдчилсан дүгнэлтийг гаргажээ. Үүнийгээ Барилга хот төлөвлөлтийн газрынханд танилцуулсан байна.
Энэ компанийн хамт олон Өмнөд Африк дахь төсөлд гар бие оролцож, төслийг өөрсдөө зохиосон 30-40 жилийн туршлагатай гэнэ.
Сүүлийн 100 жилд хотын дахин төлөвлөлт хийсэн орон цөөхөн байдаг бөгөөд өндөр хөгжилтэй орнууд ойролцоогоор 100-200 жилийн өмнө төлөвлөлтөө хийчихсэн байдаг байна.
Өмнөд Африктай харьцуулахад нийслэл хотын гэр хорооллын гудамжны зохион байгуулалт сайтай учраас богино хугацаанд биелэх боломжтой төсөл юм.