Аймаг бүрт  1000 айлын орон сууц барих, энэ ажлын хүрээнд орон нутагт инженерийн шугам сүлжээ ямар байгаатай Барилга, хот байгуулалтын сайд Ц.Баярсайхан танилцаж байгаа.   Өнгөрсөн сарын сүүлээр Сүхбаатар, Хэнтий аймгуудын  хот, төлөвлөлт шугам сүлжээ, цэвэр бохир усны хоолой зэргийг газар дээр нь очиж үзсэн бол үргэлжлүүлэн Төв аймагт ажиллалаа.

 

     Төв аймагт 1000 айлын орон сууц барихад 14,3 га газар шаардлагатай байгаа. Зуунмод хотод баруун талаасаа барилгажилт явуулах ба газар өмчлөх гэрчилгээгээ аваагүй, зөвшөөрөлгүй буусан 100 гаруй айлын газрыг чөлөөлж, орон сууц барихаар төлөвлөсөнөө орон нутгийн удирдлагууд ярьж байлаа. Орон сууц барихдаа Сүхбаатар аймагт хэрэгжиж эхэлсэн төсөл шиг бага м²-тай орон сууцнуудыг барихаар төлөвлөж байгаа гэнэ.

 

       Энэ жил орон нутгийг хөгжүүлэх сангаас 491 сая төгрөг гаргаж,  бохирын шугам татах ажлыг уг төлөвлөсөн газартаа эхлүүлэх юм байна. Энэ ажилд нийтдээ 2,5 тэрбум төгрөг шаардлагатай байгаа тухайгаа хэлж байсан юм.

 

      Энэ онд хийх ажлуудын нэг нь сум бүрт 4 айлын орон сууц барих хөтөлбөртэй.  Сумын төвүүдэд барих орон сууцны зураг төсөл нь бэлэн болсон бөгөөд суурийн ажлыг энэ хавартаа эхлүүлэх гэнэ. Ирэх сард аймгийн хөрөнгө оруулалтын чуулган хийж,  хямд өртөгтэй орон сууцны саналыг хөрөнгө оруулагчдаас хүсэх юм байна.

 

     Төв аймаг нь Улаанбаатар хоттой ойролцоо дээр нь Шинэ нисэх онгоцны буудал, Майдар гэх зэрэг олон төсөл бүтээн байгуулалт хэрэгжих юм. Төв аймагт баригдах 1000 айлын орон сууцны төлөвлөлт ерөнхий төлөвлөгөөний дагуу хийгдэнэ. Түүнчлэн аймаг бүрт чулуу ангилан бутлах, бетон зуурмагийн узель, төмөр бетон эдлэлийн үйлдвэр баригдана. Энэ жил инженерийн шугам сүлжээнд зориулж салбарын хэмжээнд 20 тэрбум төгрөг төсөвлөгдсөн. Эндээс Төв аймагт  шийдвэрлэх боломж байгааг сайд хэллээ.

 

      Энэ онд барилга, хот байгуулалтын салбарт батлуулсан төсөвт 10 аймагт хэсэгчилсэн 4 аймагт ерөнхий төлөвлөлт хийгдэх гэнэ.

 

      Төв аймгийн хувьд уурын зуухаар галладаг хоёр аймгийн нэг. Цаашдаа дулааны цахилгаан станц барихгүй бол дулааны эх үүсвэр хүндрэлтэй болжээ. Тиймээс аймаг орон нутгийн удирдлагуудад уурын зуухнаас салах арга зам эрэлхийлж,  концесс бусад хөрөнгө оруулалтаар дулааны цахилгааны станцтай болох ёстойг зөвлөлөө. Уулзалт ярилцлагын дараа Төв аймгийн цэвэрлэх байгууламж, 1000 айлын орон сууц барихаар төлөвлөсөн газраа аймгийн удирдлагууд сайдад танилцууллаа. Засгийн газраас дэвшүүлсэн аймагт бүрт 1000 айлын орон сууц барих хөтөлбөрийн дагуу яамны холбогдох газрын дарга, мэргэжилтнүүд Сүхбаатар, Хэнтий, Дорнод, Өмнөговь, Дорноговь, Дундговь аймагт ажиллаад байна. Ирэх долоо хоногт Дархан, Орхон, Булган аймгийн инженерийн шугам сүлжээ, цэвэрлэх байгууламжийн  хүчин чадал, бусад ажилтай танилцах юм байна.