Япон улсын Жайка байгууллагын дэмжлэгтэйгээр Улаанбаатар хотыг метротой болгох судалгааны ажлыг эхлүүлээд байгаа. Нийслэл метротой болсноор хотын төв хэсгээр буюу баруун дөрвөн замаас зүүн дөрвөн зам хүртэл газар доогуур, харин бусад хэсгээр ил явахаар “Улаанбаатар метро”-г байгуулах боломжтой юм байна. Мөн хотын төвийн зогсоолууд болон газар доогуур томоохон үйлчилгээний төв бүхий цогцолбор барихаар төлөвлөжээ.

        Хөрөнгө оруулалтын судалгаанаас харахад Жайка болон бусад олон улсын байгууллагаас 600 сая ам доллар, Монгол улсаас 700 сая ам долларын хөрөнгө оруулалт хийж, нийтдээ 1,5 тэрбум ам.долларын санхүүжилтээр Улаанбаатар метро төслийг хэрэгжүүлэх боломжтой гэсэн тооцоо гарсан байна.

       Нийслэлийн Засаг даргын Зам, тээвэр, дэд бүтцийн асуудал хариуцсан орлогч Н.Гантөмөр “Хэрвээ 2014 оноос барилгын ажлыг эхлүүлвэл 2020 он гэхэд Улаанбаатар хот метротой болох бололцоотой. Метрогоор цагт зорчих үйлчлүүлэгчдийн тоо 20 мянгаас дээш байх ёстой бөгөөд урьдчилан тооцоолсноор "Улаанбаатар метро"-оор нэг удаа зорчихдоо 500-600 төгрөг төлж, ойролцоогоор 18 километр замыг 30 минутанд туулах боломжтой” гэлээ.

      Ийнхүү нийслэлийн Удирдлагын зөвлөлийн гишүүд “Улаанбаатар метро” төслийг НИТХ-ын нэгдсэн хуралдаанд өргөн барьж хэлэлцүүлэхээр шийдвэрлэжээ.

                                                                                                             Эх сурвалж: News.mn