Гэр хорооллыг дахин төлөвлөх ажлын хүрээнд дараах ажлууд өрнөх юм байна. Энэ тухай Хот байгуулалт, хөрөнгө оруулалтын газраас тодрууллаа.

-Ирэх дөрөвдүгээр сараас дахин төлөвлөлт хийх газруудад бүтээн байгуулалтын ажил өрнөнө. Дахин төлөвлөлт хийх газруудыг байршлаар нь нэрлэвэл?
-Сонгинохайрхан дүүргийн V, VI, VII хороо буюу Ханын материал орчимд 130 га, Сонгинохайрхан дүүргийн X хороо буюу Баянхошуунд арьс ширний үйлдвэрийн ажилчдын нийтийн байр орчмын 2.3 га газарт, Сүхбаатар дүүргийн XV хороо Дамбадаржаагийн 58 дугаар сургуулийн орчимд 13 га газарт, Чингэлтэй дүүргийн XII, XII хороонд Хайлаастын 72 дугаар сургууль орчимд 15 га газарт, мөн Радио телевизийн орчимд 11.4 га, Батлан хамгаалах сургуулийн орчимд 93 га, Баянзүрх дүүргийн XII хорооны Амгалан орчимд 14.5 га газарт дахин төлөвлөлтийг хийнэ. Зургаан жилд багтаан 12 байршилд дахин төлөвлөлт хийх юм.
    
-Газраа чөлөөлсөн иргэдэд ямар баталгаа өгөх вэ?
-Төсөл хэрэгжиж дуусах хүртэл газрын эзэнд газар эзэмших, өмчлөх эрх нь хадгалагдсаар байна. Тухайн иргэн газраа байраар солино гэвэл уг хүсэлтийн дагуу орон сууцыг нь олгоно. Өөрөөр хэлбэл газрын гэрчилгээний оронд орон сууцны түлхүүр өгнө гэсэн үг.

-Бүтээн байгуулалт өрнөх үед айлуудыг хаана байршуулах вэ?
-Түр нүүлгэн шилжүүлэлт хийнэ.

-Төсөв, мөнгийг хаанаас шийдвэрлэх вэ?
-Гэр хорооллыг дахин төлөвлөх ажилд нийслэлээс эхний ээлжинд 40 тэрбум төгрөг  төсөвлөсөн.

-Барилга орон сууц нэмэгдснээр эрчим хүчний эх үүсвэрийг хэрхэн шийдвэрлэх вэ?
-Эрчим хүчний эх үүсвэрийн хүчин чадлыг нэмэгдүүлнэ. Долоон байршлын дулааныг бие даасан халаалтаар шийднэ. Гандан, Дэнжийн мянга, Радио телевиз, 14 дүгээр хороолол зэрэг байршлыг төвийн шугам, сүлжээтэй холбоход ачаалал үүсэхгүй.

-Газар болон үл хөдлөх хөрөнгө хамтран эзэмшдэг иргэдийн асуудлыг хэрхэн шийдвэрлэх вэ?
-Нэг хашаанд хоёроос гурван айл амьдардаг тохиолдолд бид зөвхөн газар эзэмшигчтэй л хамтран ажиллана. Бусад айл нь нүүхээс өөр аргагүй. Харин хамтран эзэмшигчид байвал хэрхэн зохицуулах вэ гэдгийг журам гаргаж шийдвэрлэнэ.

Б.Заяа /gogo.mn/