Хөдөлмөрийн сайд Я.Санжмятав “Үндэсний мэргэжилтэй ажилтан бэлтгэх хөтөлбөр”-ийн хүрээнд өнөөдөр Барилга хот байгуулалтын сайд Ц.Баярсайхантай уулзаж, санал бодлоо солилцлоо. Уулзалтад барилгын салбарын томоохон компаниудын төлөөлөл болон мэргэжлийн холбоод, Мэргэжлийн сургалт үйлдвэрлэлийн төв/МСҮТ/-ийн захирлууд оролцож, “Үндэсний мэргэжилтэй ажилтан бэлтгэх хөтөлбөр”-ийг хэрэгжүүлэхэд тулгарч буй хүндрэл бэрхшээл, тулгамдаад байгаа асуудлуудыг хөндөж ярилцсан юм.

Уулзалтын эхэнд Хөдөлмөрийн сайд Я.Санжмятав хэлсэн үгэндээ “Би мягмар гаригт МСҮТ-ийн захирлуудыг хүлээн авч уулзаж, мэргэжилтэй ажилтан бэлтгэх шатанд тулгамдаж буй асуудлууд, ажлын байрны хүрэлцээ хангамж зэрэг асуудлаар санал солилцсон. Тэдний ярианаас барилгын салбарыг онцгойлон авч үзэх учиртай юм байна гэж ойлгосон. Учир нь улирлын чанартай салбар учраас бэлтгэж байгаа мэргэжилтнүүдийнхээ ажлын байрыг тогтмолжуулах, байнгын ажлын байртай байлгах тал дээр засгийн газар, Барилга хот байгуулалтын яамтай хамтарч ажиллах зайлшгүй шаардлага тулгарч байна. Тиймээс өнөөдөр салбарын сайд Ц.Баярсайхан болон барилгын компаниуд, мэргэжлийн холбоо, МСҮТ-ийн захирлуудтай уулзаж, асуудлуудаа тал талаас нь ярилцах нь зүйтэй гэж үзсэн. Эндээс та бүхэн тулгамдаж байгаа асуудлуудаа салбарынхаа сайдад ярьж, мэргэжилтэй ажилтан бэлтгэхэд чухал шаардлагатай байгаа асуудлуудыг дэлгэн тавина гэдэгт итгэлтэй байна” гэлээ.

Үндэсний мэргэжилтэй ажилтан бэлтгэх хөтөлбөрийн хүрээнд хийгдэж буй тус уулзалтад барилгын салбарын томоохон компаниудын төлөөлөл, ажил олгогчид, барилгын чиглэлээр ажилтан бэлтгэдэг МСҮТ-ийн захирлууд, мэргэжлийн холбоодын төлөөлөл оролцож  байгаагаараа онцлог байлаа.

Үүний дараа БХБ-ын сайд Ц.Баярсайхан “Барилгын салбарт 2016 он хүртэлх бүтээн байгуулалтын төслийг нэг дор батлуулж, барилгын компаниудад ижил тэгш хуваарилах нь тэднийг тогтмол ажилтай байлгах гарц” хэмээн харж байгаагаа хэллээ. Мөн бүтээн байгуулалтын ажлыг нээлттэйгээр хуваарилснаар “тендерийн ченж”-үүд үгүй болж, “Би чадна” багууд тогтмол нэг компанид харьяалагдах боломж бий гэдгийг онцолсон юм. Мөн Шинэчлэлийн Засгийн газрын мөрийн хөтөлбөрт “150 000 ажлын байр бий болгоно” гэсэн амлалтын хамгийн хүндийг үүрч байгаа Хөдөлмөрийн яамыг ажилдаа тун шуурхай хандаж, ханцуй шамлаж орсонд талархалтай байгаагаа илэрхийлэн цаашид хамтарч ажиллахад бэлэн байгаагаа хэллээ.

Уулзалтын үеэр барилгын компаниуд, ажил олгогчдын зүгээс сайд нарт хандаж барилгын компаниудын хувьд тендер авна гэдэг бүтэшгүй мөрөөдөл болж, тогтмол ажилтай байх боломжгүй байдаг. Тогтмол ажилгүй компани байнгын ажилчинтай байх ямар ч нөхцөлгүй байдгийн дээр энэ чиглэлээр ажилтан бэлтгэдэг МСҮТ-үүдээс захиалга авах аргагүй байдгаа хэллээ. Хэрвээ Засгийн газар, салбарын яамнаас барилгын компаниудыг тогтмол ажилтай байлгах тал дээр бодлого боловсруулж ажиллавал компаниуд байнгын ажилтай болохын дээр, байнгын мэргэжилтэй ажилтантай болж, МСҮТ-үүдийн бэлтгэж байгаа төгсөгчдийг ажлын байраар хангахад бэлэн байгаагаа илэрхийллээ. Томоохон бүтээн байгуулагч компаниудыг дагаад жижиг дунд үйлдвэр ч хөгжих учиртайг хэлж байсан юм.

Мөн сүүлийн үед барилга барихад гадна тохижилт, ногоон байгууламжийг орхигдуулж байгааг шүүмжилж, барилгын яамнаас энэ талаар бодитой бодлого баримталж, ажиллахыг хүсч байлаа. Харин МСҮТ-өөс зарим нэг ховор мэргэжлээр ажилтан бэлтгэх боломж бий эсэхийг тодруулж, зарим нэгэн мэргэжлийн томьёоллыг өөрчлөхгүй бол нийгмийн даатгалд ажилчдаа бүртгүүлэх, цаашлаад тэтгэвэр тэтгэмж тогтоолгоход барилгачид хохирч мэдэх талтай байгааг анхааруулж байлаа.

Ийнхүү Хөдөлмөрийн яам болон Барилга хот байгуулалтын сайд нарын зохион байгуулсан уулзалтын үр дүнд барилгын салбарт компаниуд нь тогтмол ажилтай, мэргэжилтэй ажилтантай, мэргэжлийн сургуулиуд нь ажилтан бэлтгэхэд, ажлын байрны хүрэлцээ муу гэдэг зүйл үгүй болно гэдэгт итгэлтэй байгаагаа уулзалтанд оролцогчид энэ үеэр илэрхийлж байсан юм.