Барилгын ажил эхлэх, үргэлжлүүлэх хугацаа, барилгыг ашиглалтанд оруулах зөвшөөрөл авах шат дамжлага богиноссон талаар өнөөдөр Барилга хот байгуулалтын яамны Төрийн нарийн бичгийн дарга Р.Эрдэнэбүрэн сэтгүүлчдэд мэдээлэл хийлээ.

Саяхан батлагдсан Засгийн газрын 151-р тогтоолоор дээрх хоёр асуудлыг нэг дүрмээр зохицуулж, давхардсан олон дүрэм журмыг хүчингүй болгожээ. Барилга байгууламжийг эрсдлийн түвшингээр нь гурав ангилсан бөгөөд үүнд:

1. Эрсдэл өндөртэй буюу 17-35 давхар барилга байгууламж, онгоцны буудал, олон улсын чанартай авто зам, гүүрийн байгууламж зэргийг Барилга, хот байгуулалтын яам хариуцна.

2. 17 давхар хүртэлх үйлдвэр, иргэний барилга байгууламжийн зөвшөөрлийг нийслэл, орон нутгийн захиргааны байгууллага хариуцна

3. Жижиг засварын газар, хоёр давхар хүртэлх буюу дээд тал нь 3600 метр куб хэмжээ бүхий барилга байгууламж, хувийн хаус барих иргэд ажил эхлүүлэх зөвшөөрөл авах шаардлагагүй болжээ.

Барилга хүлээн авахад өмнө нь Техникийн комисс, дараа нь Улсын комисс хүлээж авдаг байсан бол шинэ журмаар нэгдүгээр ангилалд багтах барилгыг хүлээж авах комисс Барилга, хот байгуулалтын яамнаас гарах бол хоёрдугаар ангиллын барилга байгууламжийг орон нутгаас гарсан комисс хүлээн авах юм байна.
Харин гуравдугаар ангилалд багтах барилга байгууламжийг тухайн иргэн барилгын зураг хийлгэсэн хүнтэйгээ бүртгэлийн газрын тодорхой албан тушаалтантай  ярьж мэдэгдээд, бүртгүүлдэг систем рүү орж байгаа гэнэ.

Ингэснээр 11 үе шатны 70 гаруй  албан тушаалтны гарын үсэг цуглуулж, ойролцоогоор 208 хоног зарцуулдаг байсан бол одоо дөрвөн үе шатны 13 процедураар ойролцоогоор 59 хоногийн хугацаанд ажлаа бүтээх боломжтой болжээ.

Иргэд энэ тогтоол хэрэгжиж эхэлсэн өдөр хүртэл Мэргэжлийн хяналтын газар материалаа өгсөн бол хуучин журмаар зөвшөөрлүүд зохицуулагдах бол тогтоол хэрэгжиж эхэлснээс хойш материалаа өгсөн бол дээрх шинэ ангилсан журмаар хариуцсан газарт нь явуулах юм байна.

Цаашдаа шинэ Газрын тухай багц хууль, Барилгын тухай хууль, Хот төлөвлөлтийн тухай хууль, Барилгын норм стандартын журам батлагдсанаар тогтолцоонд өөрчлөлт гарах гэнэ.

А.Цацрал / GOGO.MN /