Орон сууцны үнийг буулгах, хэт хөөсөрсөн ханшийг намжаах зорилгоор Засгийн газар, Монголбанк хамтран шинэ хөтөлбөр хэрэгжүүлэх болсноо тун саяхан зарласан.

Хөтөлбөрийн нэрийг “Барилгын салбарыг дэмжих, улмаар орон сууцны үнийг тогтворжуулах” гэж нэрлэсэн юм. Энэхүү урт нэртэй хөтөлбөрийн үр дүн нь хэрхэн гарах, чухам яаж хэрэгжүүлэх талаар дэлгэрэнгүй ойлголт олон нийтэд адга байлаа. Орон сууцны үнийг тогтворжуулахын тулд эрэлт, нийлүүлэлт зохистой төвшинд байх ёстой.

Өөрөөр хэлбэл, шинэ барилга барих таатай боломж, бололцоо нь бүрдсэн байх хэрэгтэй юм. Тиймээс дараах нөхцлүүдийг хангахын тулд бодлогын арга хэмжээг авч эхэлсэн тохиолдолд энэхүү дэд хөтөлбөрийг хэрэгжүүлж эхлэх ажээ. Нөхцөл гэдэг нь Улаанбаатарыг баруун, зүүн тийш тус бүр 30 км, урагшаа 20 км тэлж, замын төгсгөлийн цэгүүд дээр суурьшлын шинэ бүсүүдийг нээн, тэдгээрийг Улаанбаатар хотын төвтэй холбосон 80 км хурдны авто замыг гаргах зураг, төслийг зургаан сарын дотор бэлэн болгож, 24 сарын дотор ашиглалтад оруулахаар заажээ. Мөн эдгээр суурьшлын шинэ бүсэд орон сууцны хороолол барих газрын хангамжийг бий болгож, орон сууцны хорооллын газрыг ил, тод эзэмшүүлэх ёстойг онцолсон байна. Ийм нөхцөл бүрдсэн тохиолдолд барилгын компаниудыг төрөөс дэмжвэл орон сууцны үнэ боломжит төвшинд хүрч буух боломжтой гэдгийг дэд хөтөлбөрийг баталсан талууд хэлж байлаа. Ямар арга замаар хэрэгжүүлэх тухайд барилгын гол нэр төрлийн материал үйлдвэрлэгч, импортлогчдод эргэлтийн хөрөнгийн хөнгөлөлттэй зээл олгоно.

Мөн ипотекийн хоёрдогч захад үйл ажиллагаа явуулах үндсэн санхүүгийн байгууллагыг бодлого зохицуулалтаар дэмжих гэнэ. Барилгын гол нэр төрлийн материалын үйлдвэрлэлийг дэмжих хөтөлбөрийн санхүүжилтийн нийт дүн 379 тэрбум төгрөг болох аж. Үүнд барилгын гол нэр төрлийн материалын дотоодын нийлүүлэлтийн тогтвортой байдлыг хангах, зайлшгүй импортлох шаардлагатай байгаа цемент, арматур зэргийг тогтмол нийлүүлэх, байгаль орчинд ээлтэй барилгын материал үйлдвэрлэх төслүүдийг дэмжих гэх мэт нарийн, тодорхой чиглэлтэй ажлууд багтжээ. Харин орон сууцны санхүүжилтийн урт хугацааны тогтвортой тогтолцоог бий болгохын тулд 800 тэрбум төгрөгийг зарцуулна гэж тооцоолжээ. Барилгын материал үйлдвэрлэгч болон импортлогч, байгаль орчинд ээлтэй материал үйлдвэрлэх төсөл бүхий компанид гурван жилийн хугацаатай хөнгөлөлттэй зээл олгосноор эргэлтийн хөрөнгийг нь шийдэж, дэмжсэнээр хөтөлбөр үр дүнтэй хэрэгжинэ гэж Засгийн газраас тооцоолж байна.

Ингэхдээ тухайн компанийн тоног төхөөрөмж, эсвэл барилгын материалын үлдэгдэл, бусад хөрөнгө зэргийг барьцаанд байлгаж зээл олгох юм. Хамгийн гол нь энэ бүхний дараа ямар үр дүнд хүрэх нь сонирхол татна. Хөтөлбөр боловсруулагчдын хэлж байгаагаар барилгын гол нэр төрлийн материалын дотоодын нийлүүлэлтийн урт хугацааны тогтвортой байдал бий болно гэнэ.

Ингэснээр орон сууцны үнэ тогтворжиж, дундаж давхаргынхны орон сууцтай болох боломж бүрдэнэ гэж үзэж байна. Хамгийн гол буюу зардлаас шалтгаалах үнийн өсөлт буурна гэсэн хэтийн тооцоог хийгээд байна.

Б.Уран /gogo.mn/