Барилга, хот байгуулалтын сайд Ц.Баярсайхан, СБТГ-ын дарга Г.Мэргэнбаяр,  ББМБХЗГ-ын дарга Б.Цэдэнсамба, ХБГХБХЗГ-ын дарга Ц.Баярбат, ББМБХЗГ-ын ахлах мэргэжилтэн Ч.Цэцэг,  Хот байгуулалт, зураг төслийн институтын захирал Н.Бат-Эрдэнэ, ХБЗТИ-ийн менежер н. Наранцогт нар Зураг төслийн “Идеал-групп” ХХК-д очиж зураг төсөл боловсруулж байгаа үйл ажиллагаатай танилцлаа.

Ерөнхий захирал М.Батбаяр  Монгол улсад анх удаа ашиглаж байгаа “ALLPLAN” программын талаар танилцуулав. Энэ программ нь ХБНГУ-ын Nemetchek группын бүтээсэн барилгын салбар дахь иж бүрэн зураг төслийн программ юм байна.

“ALLPLAN” нь зураг төслийг 3D-ээр гүйцэтгэх программ хангамж бөгөөд зураг төслийн ажлыг түргэтгэх, барилгын гүйцэтгэгч, захиалагч, зураг төсөлчид, хөрөнгө оруулагчдын хооронд уялдаа холбоотой ажиллах, нэг цэгээс удирдах, зөвлөх үйлчилгээ үзүүлэх, удирдлагаар хангахад чиглэгддэг байна.  Программыг Иркутск хотын СТП институтийн 2 мэргэжилтэнтэй хамтран ажиллуулж байна.

Зураг төслийн “Идеал-групп” ХХК-ийнханд Барилга, хот байгуулалтын сайд Ц.Баярсайхан яамнаас хийж, хэрэгжүүлж  байгаа ажлуудын талаар товч танилцуулав. Өнгөрсөн хугацаанд “Барилгын материалын үйлдвэрлэлийг дэмжих хөтөлбөр” батлагдсан. Мөн  зураг төсөл зохиогчдын холбоо болон зураг төсөл боловсруулдаг аж ахуйн нэгжүүдтэй уулзалт зохион байгуулан зураг төслийн ажлын чанарыг сайжруулах,  цаашид төлөвлөж байгаа ажлуудын талаар танилцуулсанаа хэлэв.

Энэ онд 10 аймгийн ерөнхий төлөвлөгөө, “Сумын төвийн шинэчлэл” хөтөлбөр зэрэг төлөвлөгдсөн олон ажлууд байгаа. 10 аймгийн ерөнхий төлөвлөгөөг нэгдсэн зохион байгуулалтаар хийнэ.  Энэ ажлыг Хот байгуулалт, барилгын зургийн институттэй хамтарч зохион байгуулна гэлээ.  

 “ALLPLAN” программыг 10 аймгийн ерөнхий  төлөвлөгөөг шинээр боловсруулах ажилд хэрэгжүүлэх боломжтой талаар энэ үеэр ярилцлаа.