Гэр хороолыг дахин төлөвлөх ажлын хүрээнд төлөвлөж, хийгдэж байгаа ажлуудын талаар Нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч дарга С.Очирбаттай ярилцлаа.

-Гэр хорооллыг дахин төлөвлөх газруудын байршлыг өнгөрсөн долоо хоногт товлолоо. Энэ ажлыг хэзээнээс хэрэгжүүлж эхлэх вэ?

-Иргэдийн төлөөлөгчдийн өнгөрсөн долоо хоногт болсон ээлжит хуралдаанаар гэр хорооллыг дахин төлөвлөлтийг эхлүүлэх эхний ээлжийн долоон байршил тогтоогдсон. Нийслэлийн Засаг даргын мөрийн хөтөлбөрт гэр хорооллыг дэд бүтцэд бүрэн холбогдсон, ногоон байгууламж бүхий амины орон сууцны хороолол болгон хөгжүүлэх, хэсэгчилсэн ерөнхий төлөвлөгөөг дүүрэг, хороо тус бүрээр боловсруулж хэрэгжүүлнэ гэж заасан байгаа. Энэхүү мөрийн хөтөлбөрийг ирэх дөрөвдүгээр сар гэхэд эхлүүлэх учиртай. Мөн 2030 он хүртэлх хотын ерөнхий төлөвлөгөөг анх удаа УИХ-аар батлуулах гэж байгаатай холбогдуулан бид гэр хорооллын дахин төлөвлөх ажлыг эхлүүлэх зайлшгүй шардлагатай байгаа юм. Эхний ээлжид Засаг даргаар ахлуулсан, Иргэдийн хурлын төлөөлөгчдийн ажлын хэсгүүдийг ахлаад иргэдтэйгээ уулзаж, энэ ажлыг танилцуулсан байгаа.

-Ямар байршилд дахин төлөвлөлт хийгдэх вэ?

-Сонгинохайрхан дүүргийн V, VI, VII хороо буюу Ханын материал орчимд 130 га, Сонгинохайрхан дүүргийн X хороо буюу Баянхошуунд арьс ширний үйлдвэрийн ажилчдын нийтийн байр орчмын 2.3 га газарт, Сүхбаатар дүүргийн XV хороо Дамбадаржаагийн 58 дугаар сургуулийн орчимд 13 га газарт, Чингэлтэй дүүргийн XII, XII хороонд Хайлаастын 72 дугаар сургууль орчимд 15 га газарт, мөн Радио телевизийн орчимд 11.4 га, Батлан хамгаалах сургуулийн орчимд 93 га, Баянзүрх дүүүргийн XII  хорооны Амгалан орчимд 14.5 га газарт дахин төлөвлөлтийг хийхээр зэхээд байгаа. Өмнө нь мөн Гандан, Дэнжийн мянга, Радио телевизийн ойролцоо гэх мэтээр таван газрыг төлөвлөөд байсан. Ийнхүү ирэх зургаан жилд багтаан 12 байршилд дахин төлөвлөлт хийх юм.

-Иргэдэд газраа өгөөд хоосон хоцрон алдах вий гэх болгоомжлол байна. Ямар баталгаа гаргаж өгөх вэ?

-Бидний барьж байгаа гол зарчим бол энэ төсөл хэрэгжиж дуусах хүртэл газрын эзэнд газар эзэмших, өмчлөх эрх нь хадгалагдсаар байх юм. Хэрэв иргэн би газраа хоёр, гурван өрөө байраар солино гэвэл бид “баруун, зүүнээрээ” солилцоно. Газрын гэрчилгээний орон, орон сууцны түлхүүр өгнө гэсэн үг. Тиймээс болгоомжлох зүйл байхгүй юм.

-Бүтээн байгуулалт хийгдэж байх үед айлуудыг хаана байрлуулах вэ?

-Энэ хугацаанд түр нүүлгэн шилжүүлэлт хийх юм. 

-Энэ хэмжээний бүтээн байгуулалтыг хийхэд багагүй хөрөнгө мөнгө шаардагдах биз ээ. Төсөв, мөнгийг хэрхэн шийдвэрлэх вэ?

-Гэр хорооллыг дахин төлөвлөх ажилд нийслэлээс 40 тэрбум төгрөг эхний ээлжинд төсөвлөсөн. Инженерийн шугам сүлжээ, сургууль, цэцэрлэг зэргийг санхүүжүүлэн, бүтээн байгуулаад эхлэхээр тэр газрын үнэ цэнэ өснө. Ийм ашигтай байрлал  хөрөнгө оруулагчдын анхаарлыг татах нь зүйн хэрэг.

-Дулаан, цахилгаан, цэвэр ус зэргээр хангахад одоогийн цахилгаан станц, байгууламжуудын хүчин чадал хүрэлцэх болов уу? 

-Эрчим хүчний тухайд эх үүсвэрийн хүчин чадлыг нэмэгдүүлнэ. Харин сая төлөвлөсөн долоон байршлын дулааныг бие даасан халаалтаар шийднэ. Харин урьд нь төлөвлөсөн Гандан, Дэнжийн мянга, Радио телевиз, 14 дүгээр хороолол зэрэг байршлыг төвийн шугам, сүлжээтэй холбоход ачаалал үүсэхгүй гэж холбогдох байгууллагууд мэдэгдсэн.

-Дахин төлөвлөлтийг байршлуудад зэрэг эхлүүлэх үү?

-Тийм, ирэх дөрөвдүгээр сараас эхлэх болов уу. Нийслэлийн гэр хорооллын хөгжлийн газар, Гэр хороолыг орон сууцжуулах байгууллагууд энэ ажлыг зохион байгуулах юм.

-Дахин төлөвлөлтийн бүсэд амьдарч буй иргэд ямар нэгэн бичиг баримт бүрдүүлэх үү?

-Иргэд буюу газрын эзнээс шаардах, шалтгаалах зүйл байхгүй. Холбогдох байгууллагын ажилчид бүх ажлыг зохицуулж, хөөцөлдөж, хянах юм.

-Газар болон үл хөдлөх хөрөнгөө хамтран эзэмшдэг иргэдийн асуудлыг хэрхэн шийдвэрлэх вэ?

-Нэг хашаанд хоёроос гурван айл амьдардаг тохиолдолд бид зөвхөн газар эзэмшигчтэй л хамтран ажиллана. Бусад айл нь нүүхээс өөр аргагүй. Харин хамтран эзэмшигчид байвал хэрхэн зохицуулах вэ гэдгийг энэ сарын 15-нд гарах журмаар тодорхой болох юм. Ер нь энэ асуудлыг сайтар ярилцаж, нягтлах шаардлагатай. Олон хувилбар яригдаж байгаа.

-Дахин төлөвлөлтөд хамрагдсан айлын зэргэлдээх айлууд хүсэлт гаргавал дахин төлөвлөлтөд хамруулах боломжтой юу?

-Энэ төсөл бол анхны эхлэлийн алхам. Иргэд энэ төслийг дэмжээд л байвал бид дахин төлөвлөлт хийгдсэн газар тэлэх юм.

-Хэрэв иргэд газраа өгөхгүй гэвэл хэрхэн шийдвэрлэх вэ?
-Хөрөнгө оруулагч, газрын эзэн хоёр харилцан тохиролцох шаардлагатай. Гэвч иргэд энэ ажлыг бүрэн дэмжинэ гэдэгт бид итгэлтэй байгаа. Учир нь айлуудыг нүүлгэн шилжүүлээд тэр газарт нь бид үйлдвэр, сургууль, цэцэрлэг, худалдааны төвүүдийг бий болгож, шинээр барьсан орон сууцанд газрын эздийг оруулна. Иргэдийн дийлэнх хувь нь энэ саналыг тун баяртай хүлээн авч байгаа шүү. Хэрэв дахин төлөвлөх газарт иргэдийн ихэнх хувь нь дахин төлөвлөлтийг дэмжихгүй гэвэл тэр газарт Хотын захиргаа өөрөө нүүж болох юм. Энэ мэтээр шийдвэрлэнэ.

Д.Жаргалсайхан