Өнөөдөр Шударга өрсөлдөөн хэрэглэгчийн төлөө газар, Орон сууцны санхүүжилтийн корпораци хамтран барилгын үнийн талаар сэтгүүлчдэд мэдэгдэл хийлээ. Хэвлэлийн хурлаар орон сууцны үнийг 1м2 нь нэг сая төгрөгнөөс доош байх боломжтойг судалж тогтоосныг албан ёсоор зарлалаа. Барилгын үнийн талаар төрөөс хэрэгжүүлэх төсөл хөтөлбөрийн талаар дэлгэрэнгүй мэдээллийг Барилга.МН сэтгүүлийн 3 дугаар сарын дугаараас уншаарай. Ингээд орон сууцны үний талаар ШӨХТГ-ын дарга О.Магнайгийн мэдэгдлийг хүргэе.

-    “Би шинэ жилийн өмнө барилгын үнэтэй холбоотой асуудлаар сайн мэдээ дуулгахаар ажиллаж байгаа гэж ярьж байсан. ШӨХТГ маань ОССК-тай хамтраад өнгөрсөн оны 11 сараас эхлэн барилга орон сууцны 1м2-ын зохимжит үнэ хэд байх боломжтой вэ гэдэг судалгааг Улаанбаатар хот болон  бүх  аймгуудад хийсэн. Судалгаагаар Улаанбаатар хотод орон сууцны 1м2-ын үнэ нэг сая төгрөгний дотор байхад барилгын компанидаа ч ашигтай, иргэдэд ч  боломжтой байх юм байна гэдгийг тогтоосон. Одоо судалгаа маань бодит ажил болж хэрэгжиж эхлээд байна. Судалгааны дүн маань зүгээр нэг цаасан дээр бичсэн тоо болж үлдэхгүй. Монгол банк болон Барилга хот байгуулалтын яам хамтраад Үнэ тогтворжуулах дэд хөтөлбөр хэрэгжүүлж байгаа. Манай ШӨХТГ энэ хөтөлбөрт хяналт тавьж оролцоно. Цаашид БХБЯ   барилгын компаниудтай хамтын ажиллагааны гэрээ байгуулахдаа орон сууцны 1м2-ын үнийг нэг сая төгрөгнөөс хэтрүүлэхгүй байх заалтыг гэрээндээ тусгаж өгнө. Өнгөрсөн засгийн газар барилгын эрэлтэд түлхүү анхаарч ажиллаж байсан. Тухайлбал иргэдэд барилга худалдан авах хөнгөлөлттэй зээлийг ихээр олгож байсан бол шинэчлэлийн засгийн газар бодлогын эрс өөрчлөлтийг хийж нийлүүлэлтийг дэмжиж ажиллана. Өөрөөр хэлбэл барилгын компаниудыг дэмжиж ажиллах болно. Барилгын компаниудад хөнгөлөлттэй зээл олгон, ингэхдээ барилгын компаниуд маань 1м2-ын үнийг нэг сая төгрөгөнд барих  үүрэг хүлээнэ. Би энэ бүхнийг харахдаа барилгын салбарт хувьсгалын шинжтэй өөрчлөлт гарч байна гэж дүгнэж байгаа. Бид олон жил барилгын салбарыг анхаарлын гадна орхисон гэж хэлж болно. Үүний улмаас Улаанбаатар хотод зарим барилгын үнэ 1м2 нь 5000 долларт хүрсэн. Нью Иоркт хамгийн тансаг дүүрэгт дээд зэрэглэлийн барилгын 1м2-ын үнэ 6000 доллар байдаг. Гэтэл манайд шороон дунд байгаа барилгын үнэ 5000 доллар байна гэдэг нь хөөс байсан гэсэн үг. Харин одоо энэ хөөс замхарна. Эцсийн дүндээ иргэд хожино гэж хэлэх байна.”

Барилга орон сууцны зохимжит үнийн судалгааны үр дүнгийн хамгийн анхны бодит ажил болон баригдаж эхлээд байгаа Буянт Ухаа хорооллын талаар ОССК-ийн захирал н.Гантулга мэдэгдэхдээ:

-    Манай корпораци ШӨХТГ-тай хамтраад орон сууцны үнийг 1м2-ыг нь нэг сая төгрөгөнд барих боломжтойг судалж тогтоосны үндсэн дээр Буянт Ухаа хорооллыг барьж байгаа. Энэ барилга маань энэ оны 9 сард ашиглалтанд орох бөгөөд 1м2 нь 950,000 төгрөгөөр худалдаалагдана. Бид анх барилгын үнийг 850000 төгрөгөөр   тооцож, энэ онд багтааж ашиглалтанд оруулах байсан боловч дэд бүтцийн асуудал шийдэгдэхгүй удсанаас барилгын ажил хэсэг хугацаагаар зогссон. Буянт ухаа барилгыг засгийн газрын бондын хөрөнгөөр барьж байгаа учраас барилгын үнэд бондын хүүгийн өртөг шингээд  950,000 болсон байгаа. Урьд өмнө барилгын үнэ өсөхөд газрын үнэ, банкны өндөр хүү, дэд бүтцийн асуудал  гээд олон хүчин зүйл нөлөөлж байсан. Энэ жилээс эхлэн баригдах барилгуудын дэд бүтцийг шийдээд явж байгаа, газрыг нь иргэдтэй харилцан тохиролцсоны үндсэн дээр чөлөөлж өгнө, төрөөс хөнгөлөлттэй зээл олгоно зэрэг олон талаар барилгын компаниудыг дэмжих учраас үнийг нэг сая төгрөгнөөс дээш гаргахгүй гэсэн үг. Барилгын компаниудыг төрөөс бодлогоор дэмжээд нийлүүлэлтийг өсгөөд өгөхөөр одоо өндөр үнээр зарагдаж байгаа барилгуудын үнэ ч гэсэн аяндаа дагаад буурна.

                                                                                  Сурвалжилсан: Б.Цолмонтуяа