Барилгын салбарт үйл ажиллагаа явуулж байгаа томоохон аж ахуйн нэгж, компаниудын төлөөлөл, БХБЯ болон Барилгын Хөгжлийн Төв, "Барилга.МН" БЗМТ хамтран “Барилгын салбарын цаашдын чиг хандлага” сэдвээр санал солилцсон уулзалтыг зохион байгууллаа.

 

    Барилгын салбарт шинэчлэх, шинээр бий болгож шийдвэрлэх олон асуудал бий. Өнөөдрийн энэ уулзалт ч үүнд чиглэгдсэн байсан юм. Барилгын салбарт болохгүй байгаа асуудлыг шийдвэрлэхэд зөвхөн төрийн байгууллага нь эрх мэдэн шийдэх биш, энэ салбарт үйл ажиллагаа явуулж байгаа мэргэшсэн байгууллагуудын санаа бодлыг сонсож, шинээр гарах хууль тогтоомж үйл ажиллагаанд нь нийцсэн байлгахад энэ уулзалтын гол зорилго, агуулга нь оршиж байсан юм.

 

     Уулзалтын эхэнд БХТ-ийн захирал Б.Баярсайхан байгууллагдаад төдийлөн удаагүй байгаа ТӨУҮГ-ын үйл ажиллагааг танилцуулж, салбарынханд зориулан хийж байгаа ажлуудынхаа талаар товчхон танилцууллаа.

 

      БХБЯ-ны төрийн нарийн бичгийн дарга Р.Эрдэнэбүрэн энэ онд зээл тусламж болоод банкны бондоор санхүүжигдсэн 1 их наяд орчим төгрөгний бүтээн байгуулалтын ажлууд хийгдэх бол 325 тэрбум төгрөгний дэд бүтцийн ажил хийгдэх төлөвлөгөөтэй байгаа гэсэн таатай мэдээг дуулгасан юм. Гэхдээ энэ ажлыг ихэвчлэн дотоодын барилгын компаниудаар гүйцэтгүүлэх зорилготой байгаа гэнэ. Мөн 50 тэрбум төгрөгний төсөл хөтөлбөр хэрэгжүүлэх юм байна.

 

     БХБЯ дээр барилгын компаниудаас ирж байгаа санал, гомдлын дийлэнх хувийг “тусгай зөвшөөрөл”-тэй холбоотой асуудал эзэлдэг гэдгийг Төрийн нарийн бичгийн дарга онцоллоо. Харин энэ асуудал одоо яригдаж байгаа шинэчлэлийн асуудал батлагдаад хэрэгжээд ирэхээр арилна гэлээ.

   Компаниудын төлөөлөл төрийн байгууллагын төлөөлөлөөс зураг төсөл, экспертез, тусгай зөвшөөрлийн наймаатай холбоотой асуудлуудыг цэгцлэх талаар ямар ажлууд хийхээр төлөвлөж байгааг голчлон асууж байсан юм. Ирэх хаврын чуулганаар “Барилгын тухай хууль”-ийн шинэчилсэн найруулгыг хэлэлцэх юм байна.

 

     Барилгын салбарт олон өөрчлөлт, шинэчлэлт хийгдээд ирэхээр барилгын компаниудаас ихээхэн үүрэг хариуцлага, ажлын өндөр бүтээмж шаардагдах нь гэсэн эерэг дүгнэлтийг өнөөдрийн уулзалтаас хийж болохоор байсан юм.