Тусгай зөвшөөрөл олгох суурь нөхцөлүүдийг цөөлжээ
Барилга байгууламжийн зураг төсөл боловсруулах, барилга угсралтын ажил гүйцэтгэх, өргөх байгууламж, түүний эд ангийн үйлдвэрлэл, угсралт, засвар үйлчилгээ эрхлэх хуулийн этгээдэд тусгай зөвшөөрөл олгох, хугацааг сунгах, түдгэлзүүлэх, сэргээх, хүчингүй болгох, гэрчилгээг нөхөн олгохтой холбогдсон харилцааг зохицуулах журмыг шинээр боловсруулжээ. Журманд зааснаар тусгай зөвшөөрөл шинээр авах, сунгуулах, нэмэлт ажлын төрөл авах аж ахуйн нэгж, байгууллага нь холбогдох бичиг баримтыг бүрдүүлж Барилгын хөгжлийн төвд хүргүүлэх бөгөөд БХТ нь хүсэлт ирүүлсэн дарааллын дагуу хянан үзэж ажлын 10 хоногийн дотор “Тусгай зөвшөөрөл олгох асуудлаар урьдчилан дүгнэлт гаргах ажлын хэсэг”-ийн хуралдаанаар хэлэлцүүлэн урьдчилсан дүгнэлт гаргуулна. Ажлын хэсгийн хуралдаан нь 7 хоног бүрийн пүрэв гарагийн 15 цагт болно.
Тухайн урьдчилсан дүгнэлтийг Барилга, хот байгуулалтын яамны Төрийн нарийн бичгийн дарга баталгаажуулж, цааш нь ажлын 3 хоногийн дотор БХБ-ын сайдад танилцуулж шийдвэрлүүлнэ. Ингээд тусгай зөвшөөрөл шинээр олгох, сунгах, нэмэлт ажлын төрөл олгох шийдвэрийн дагуу тусгай зөвшөөрөл эзэмшигчтэй гэрээ байгуулж, гэрчилгээ олгох ажлыг БХТ ажлын 7 хоногт багтаан зохион байгуулах юм. Хэрэв тусгай зөвшөөрөл олгохоос татгалзсан бол тухайн аж ахуйн нэгжид бичгээр мэдэгдэх гэнэ. Энэхүү журманд зааснаар тусгай зөвшөөрөл олгох суурь нөхцөл, шаардлагыг нэлээн хөнгөвчилсөн нь барилгын салбарынханд дуулгах таатай мэдээ болж байна.
Тусгай зөвшөөрөл олгоход бүрдүүлэх баримт бичиг
Тусгай зөвшөөрлийг шинээр авах:
1. “Аж ахуйн үйл ажиллагааны тусгай зөвшөөрлийн тухай хууль”-ийн 11 дүгээр зүйлд заасан бичиг баримт
2. Холбогдох ажлын төрөл, суурь нөхцөл шаардлагын дагуу инженер, техникийн ажилтан бүрийн диплом, гэрчилгээ, батламж, зөвлөх инженер, мэргэшсэн инженерийн мэргэшлийн зэргийн гэрчилгээний баталгаажуулсан хуулбар \тусгай дугаар бүхий нэрийн тэмдгийг дарж баталгаажуулсан байх\
Орон нутгийн аж ахуйн нэгж, байгууллага бол тухайн орон нутгийн Газрын харилцаа, барилга, хот байгуулалтын газрын тодорхойлолт
3. Гадаадын хөрөнгө оруулалттай аж ахуйн нэгжийн хувьд Барилгын тухай хуулийн 14 дүгээр зүйлийн 2-д заасан зөвшөөрөл, гадаадын хөрөнгө оруулалтын газраас олгосон сертификатын хуулбар
Тусгай зөвшөөрөл сунгуулах:
1. Барилгын норм, норматив боловсруулах санд шимтгэл төлсөн баримт
2. Гүйцэтгэсэн ажлын талаарх захиалагч байгууллагын тодорхойлолт
3. Барилга, байгууламжийн байнгын ашиглалтанд хүлээлгэн өгсөн комиссын актын хуулбар, фото зураг
4. Зөвлөх болон мэргэшсэн, бусад инженер техникийн ажилтны шилжилт хөдөлгөөний өөрчлөлт, тусгай зөвшөөрлийн гэрчилгээний хуулбар, тусгай зөвшөөрлийн хавсралтанд хийгдсэн тэмдэглэл
Тусгай зөвшөөрөлд нэмэлт ажлын төрөл авах:
1. “Аж ахуйн үйл ажиллагааны тусгай зөвшөөрлийн тухай хууль”-ийн 11 дүгээр зүйлд заасан бичиг баримт
2. Барилгын норм, норматив боловсруулах санд шимтгэл төлсөн баримт
3. Холбогдох ажлын төрөл, суурь нөхцөл шаардлагын дагуу инженер, техникийн ажилтан бүрийн диплом, гэрчилгээ, батламж, зөвлөх инженер, мэргэшсэн инженерийн мэргэшлийн зэргийн гэрчилгээний баталгаажуулсан хуулбар \тусгай дугаар бүхий нэрийн тэмдгийг дарж баталгаажуулсан байх\
Тусгай зөвшөөрөл олгох ажлын төрөл, суурь нөхцөл, шаардлагыг энд uploads/users/14815/file/tatah.doc дарж татаж авна уу.