“Газрын харилцаа, газар өмчлөл-10 жил” сэдэвт өдөрлөг боллоо
Нийслэлийн Засаг дарга болон Монголын Мянганы сорилтын сан хооронд байгуулсан харилцан ойлголцлын санамж бичгийн хүрээнд нийслэлийн Засаг даргын захирамжаар “Газар өмчлөлийг эрчимжүүлэх” нэг сарын аяныг Улаанбаатар хотын зарим дүүрэгт хэрэгжүүлж байгаа билээ.
Тус аяны хүрээнд өнөөдөр “Газрын харилцаа, газар өмчлөл 10 жил” сэдэвт нээлттэй өдөрлөгийг зохион байгуулж Нийслэлийн Засаг даргын тамгын газар, харъяа агентлагууд, нийслэлийн Өмчийн харилцааны газар, нийслэлийн 9 дүүргийн Өмч, газрын харилцааны алба, Улсын бүртгэлийн ерөнхий газар, Газрын харилцаа, геодези зураг зүйн газар, Монголын Мянганы сорилтын сангийн Хөрөнгийн эрхийн төсөл зэрэг байгууллагууд хамтран иргэдэд мэдээлэл хийлээ.
Өдөрлөгт Улаанбаатар хотын захирагч Э.Бат-Үүл хүрэлцэн ирж газар өмчлөл, нийслэлийн гэр хорооллын 12 байршилд дахин төлөвлөлт хийх ажил ямар байгаа зэрэг асуудлаар иргэдийн сонирхсон асуултанд хариулт өгч, өдөрлөгт оролцож буй байгууллагын танилцуулгыг үзэж сонирхон тодорхой үүрэг даалгавар өглөө.
Баянзүрх дүүpгийн 11-р хорооны иргэн: - “Манайх 2011 онд хашааны газраа өөрийн өмчлөлд шилжүүлж авсан. Газар дээрээ байшин барилгаа барь гэсэн хорооны шаардлагыг биелүүлээд байшингаа бариад амьдарч байгаа. Гэтэл засаг төр солигдоод, манай дүүрэгт шинээр сонгогдсон Засаг дарга одоо газрыг маань буцааж хурааж авна гээд байна. Би өнөөдөр Засаг даргатай уулзахад 11 хүний бүрэлдэхүүнтэй ажлын хэсэг гарсан, газраа яаралтай буцааж өг гэсэн. Үүнийг тодруулж өгөөч” гэж хүсэхэ
Хотын захирагч: - “Хүний өмчилж авсан газрыг хурааж авна гэж байхгүй. Энэ бол хүний эрхэнд халдсан хэрэг. Би долоо хоног бүрийн Баасан гарагт иргэдийг хүлээн авч уулзаж байгаа. Та бүхэн Иргэдийг хүлээн авах төвд бүртгүүлээд надтай уулзаж санал хүсэлтээ нээлттэй илэрхийлж болно. Газар өмчлөлийн эрхийн бүртгэл маш их замбараагүй байгаа нь хаа хаанаа үл ойлголцол гарахад хүргэж байна. Тухайн хашааны газар яг хэний нэр дээр, ямар хэмжээтэй байгаа нь мэдэгдэхгүй байгаа жишээ олон бий. Гэр хорооллын зарим байршилд дахин төлөвлөлт хийх ажлын хүрээнд иргэдтэй уулзаж тохироод газрыг нь үнэлээд авах гэтэл өөр нэг хүн минийх гээд гараад ирдэг. Мөн иргэд кадастрын зургийн хэмжээнээс илүү гаргаж хашаа татсан зөрчил ч их байна. Эдгээр асуудлыг яаралтай шийдэхгүй бол гэр хорооллыг орон сууцжуулах, газрыг шинэчлэн зохион байгуулах ажлууд гацаанд орох гээд байна шүү. Тиймээс энэ бүртгэлийн асуудлыг яаралтай нэг мөр цэглэх хэрэгтэй” гэдгийг Улсын бүртгэлийн ерөнхий газар, Газрын харилцаа, геодези зураг зүйн газар, Өмчийн харилцааны газарт сануулав.
Мөн хэзээнээс шинээр газар олгож эхлэх вэ гэсэн асуултанд “Шинээр газар олгох бүсүүдэд юуны өмнө хот төлөвлөлтийг хийнэ. Төлөвлөлтгүй газар олгоно гэсэн асуудал одоо гарахгүй. Төлөвлөлтөө гаргаж дуусаад НИТХ-аар хэлэлцүүлж батлуулсны дараа газрыг өмчлүүлж эхэлнэ” гэлээ.
Өдөрлөгийн үеэр “Газар өмчлөлийг эрчимжүүлэх” аяны хугацаанд ММСС-ийн Хөрөнгийн эрхийн төслөөс хэрэгжүүлсэн “Хашааны газрын өмчлөл ба эрхийн бүртгэлийн ажил”-ын хүрээнд газраа өмчилж авсан Сонгинохайрхан, Чингэлтэй, Баянзүрх дүүргийн иргэдийн төлөөлөлд газар өмчлөх эрхийн бүртгэлийн гэрчилгээг гардууллаа. “Хашааны газрын өмчлөл ба эрхийн бүртгэлийн ажил” нь эдгээр 3 дүүргийн сонгогдсон хэсгүүдэд хэрэгжиж байгаа бөгөөд нийт 46.600 гаруй хашааны газрын хээрийн нарийвчилсан судалгааг хийж, үүнээс хуульд заасан шаардлагуудыг бүрэн хангасан хашааны газруудаг иргэдэд өмчлүүлж, улсын бүртгэлийн гэрчилгээг нь олгосон байна.
“Хашааны газрын өмчлөл ба эрхийн бүртгэлийн ажил” нь дээрх 3 дүүрэгт жишиг байдлаар хэрэгжсэнээр гэр хороололд дахин төлөвлөлтийн ажлыг хэрэгжүүлэхэд томоохон угтвар ажил болох бөгөөд иргэдийн санаатай болон санамсаргүй байдлаас үүдэлтэй газрын зөрчил маргааныг арилгах, холбогдох төрийн байгууллагуудын мэдээллийн санг үнэн бодит мэдээллээр хангах, газар өмчлөл бүртгэлийн ажлыг нэгдсэн байдлаар бусад дүүрэгт хэрэгжүүлэх арга замыг бий болгох чухал ач холбогдолтой аж.
