“Барилгын материал, дэвшилтэт технологийн үзэсгэлэн”-ийн шилдгүүд тодорлоо
“Барилга экспо 2013” олон улсын үзэсгэлэн яармагийн нэгдүгээр хэсэг буюу “Барилгын материал, дэвшилтэт технологийн үзэсгэлэн” 4 өдрийн турш амжилттай үргэлжилж өндөрлөлөө. Үзэсгэлэнгийн хаалтын ёслол Мишээл төвд болж үзэсгэлэнд оролцогч компаниудын шилдгүүдэд шагнал гардуулав.
“Барилгын материал, дэвшилтэт технологийн үзэсгэлэн”-д гадаад, дотоодын 120 гаруй компани оролцож барилгын материал, бүтээгдэхүүн, дэвшилтэт технологио олон нийтэд танилцуулсан.
“Барилгын материал, дэвшилтэт технологийн үзэсгэлэн” яармагийн шилдэг оролцогчдоор:
1. Хэрэглэгчдийн таашаалд нийцсэн Шилдэг бүтээгдэхүүн “Цонх констракшн” ХХК
2. Шинэ дэвшилтэт техник, технологи нэвтрүүлэгч “Пирамид Индастри” ХХК-ний Чулуут өнгөлгөө
3. Шилдэг оролцогч брэнд маркетер “Фүжи Эксим Монгол” ХХК
4. Шилдэг импортлогч “Төмөрт транс” ХХК
5. Шилдэг үйлдвэрлэгч “Ногоон газар” ХХК тус тус шалгарлаа.
“Барилга экспо 2013” олон улсын үзэсгэлэнгийн Ерөнхий ивээн тэтгэгч Солонгосын шугам сүлжээний корпорацийн захирал Со Бунг Ён
“Барилга экспо 2013” олон улсын үзэсгэлэнгийн Ерөнхий ивээн тэтгэгч Фүжи эксим компаний захирал Дики Хоё
“Барилга экспо 2013”-ын шилдгүүд
“Барилга экспо 2013” олон улсын үзэсгэлэнгийн Ерөнхий ивээн тэтгэгч ЛИО брэнд
Үзэсгэлэн яармагт оролцсон компаниудын сэтгэгдлээс хүргэж байна.
“Пирамид Индастри” ХХК-ийн Чулуун өнгөлгөөний үйлдвэрийн захирал н.Төвбаяр:
- Үзэсгэлэнгийнхээ сэтгэгдлээс хуваалцахгүй юу?
Маш сайхан үзэсгэлэн болж байна. Олон улсын гэдэг утгыг харуулж чадсан зохион байгуулалт сайтай үзэсгэлэн болж өнгөрлөө.
- Энэ шагнал танай байгууллага, хамт олны хөдөлмөр, зүтгэлийг үнэлсэн дүгнэлт болов уу?
Манай байгууллага “Шилдэг дэвшилтэт технологи нэвтрүүлэгч байгууллага”-аар тодорлоо. Солонгосын чулуут өнгөлгөөний материалын үйлдвэрийг оруулж ирсэн. Үйлдвэрийг оруулж ирэхэд маш олон шат дамжлага, шалгуур давж оруулж ирсэн. Энэ хичээл зүтгэлийг маань үнэлж, дүгнэсэн шагнал байх гэж бодож байна.
“Фүжи Эксим Монголиа” ХХК-ийн захирал Л.Ариунболд:
- Үзэсгэлэнгийнхээ сэтгэгдлээс хуваалцахгүй юу?
4 өдөр гэдэг асар богино хугацаа байлаа. Манай компани анх удаагаа оролцож байгаа ч амжилттай оролцлоо. Бас “Шилдэг оролцогч, брэнд маркетер” байгууллагын шагналыг хүртлээ туйлын баяртай байна. Энэ удаагийн үзэсгэлэн маш сайн зохион байгуулалт сайтай, цаашдаа улам чанартай үзэсгэлэн зохион байгуулаарай гэж хүсье.
Дараа дараагийн үзэсгэлэн яармаг илүү өргөн хүрээтэй, олон орныг хамарч чадсан үзэсгэлэн болж чадна гэдэгт итгэлтэй байна.
- Фүжи Эксим Монголиа компани нь Кансай брэндийн бүтээгдэхүүнүүдийг танилцуулсан шүү дээ?
Японы Кансай пэйнт брэндийн барилгын бүх төрлийн будаг, зам, гүүрийн хамгаалалтын түрхлэгийг монголын хэрэглэгчдэд танилцууллаа. Энэ компани нь судлагааны ажилдаа асар их хөрөнгө зарцуулдаг. Мөн нано түвшинд үйлдвэрлэсэн бүтээгдэхүүнээр “Барилга Экспо 2013” үзэсгэлэн яармагт оролцлоо.
“Төмөрт транс” ХХК:
- Үзэсгэлэн яармагт хэд дэх удаагаа оролцож байна. Сэтгэгдлээсээ хуваалцахгүй юу?
Манай компани 3 дахь удаагаа оролцож байна. Мөн энэ шагналыг авсандаа баяртай байна. Энэ бол бидний нөр их хөдөлмөр байсан. Анх 2012 оны 9 сард 4,5 тэрбум төгрөгөөр үйлдвэрээ босгосон. Цаашдаа үзэсгэлэн яармагт байнга оролцож байх болно.