БХБ-ын сайд Ц.Баярсайхан “Шинэ орон сууц, ҮХХ”-ийн үзэсгэлэнтэй танилцлаа
“Шинэ орон сууц ҮХХ”-ийн үзэсгэлэн яармаг 3 дахь өдрөө амжилттай үргэлжилж байна. Өнөөдөр БХБ-ын сайд Ц.Баярсайхан, БХБЯ-ны Стратеги, бодлого төлөвлөлтийн газрын дарга Г.Мэргэнбаяр нарын албаны хүмүүсийн хамт үзэсгэлэн яармагийг үзэж сонирхлоо.
Ингээд БХБ-ын сайд Ц.Баярсайханы сэтгэгдлээс хүргэе.
- Танд энэ өдрийн мэнд хүргэе. Үзэсгэлэнгийн сэтгэгдлээс хуваалцахгүй юу?
- 6 дахь жилдээ зохион байгуулагдаж байгаа Барилга экспо үзэсгэлэнгийн нэгдүгээр хэсэг “Барилгын материал, дэвшилтэт технологийн үзэсгэлэн” амжилттай зохиогдож өндөрлөсөн. Харин өнөөдөр “Шинэ орон сууц, үл хөдлөх хөрөнгийн үзэсгэлэн” 3 өдрөө үргэлжилж байгаа юм байна. Энэ үзэсгэлэн иргэдэд барилгын салбарт өрнөж байгаа үйл явдлын талаар олон талын мэдээлэл өгч, сонголтоо хийхэд нь туслах байх гэж бодож байна. БХБЯ Монгол банктай хамтран ирэх долоо хоногоос орон сууцны нийлүүлэлтийг дэмжих санхүүжилтийг шийдвэрлэх гэж байгаа. Тиймээс энэ үзэсгэлэнд оролцож байгаа барилгын компаниудтай танилцсанаар тэдгээрийн барилгын ажлын гүйцэтгэлийг хангах чиглэлээр хамтран ажиллах бололцоо гарна гэж үзэж байна. Мөн иргэд маань ч гэсэн энд оролцож байгаа бэлэн болсон барилга, орон сууцнуудаас сонгоод 20 жилийн хугацаатай тогтвортой зээлд хамрах боломж бүрдэнэ. Энэхүү орон сууцны хөнгөлөлттэй зээлийн журмыг ирэх долоо хоногт Монгол банктай хамтарч батлаад олон нийтэд танилцуулна. Ашиглалтанд орсон орон сууцанд ямар нэг хязгаарлалтгүйгээр зээлээ аваад орох боломжийг олгож байгаа. Барилга.МН сэтгүүл дээр шинээр ашиглалтад орж байгаа барилгуудын талаар дэлгэрэнгүй мэдээлэл гарсан байна. Энэ онд нийтдээ 30 гаруй мянган орон сууц ашиглалтанд орох бололцоотой юм билээ. Мөн өнгөрсөн хугацаанд гадаадын компаниуд манай орны барилгын салбарыг ихээхэн сонирхож, санхүүгийн дэмжлэг үзүүлсэн. Сүүлийн үед орон сууцны чанар улам сайжирч байгаа, цаашдаа ч гэсэн стандартын шаардлага хангасан чанартай барилгын материалаар барилга, орон сууцаа барих ёстой. Мөн барилга, хот байгуулалтын төлөвлөлтөө маш сайн хийж байх хэрэгтэй. Авто зогсоол, ногоон байгууламж гэх мэт асуудлыг цогцоор нь төлөвлөж барилгаа барьсан нь харагдаж байна. Түүнчлэн өнгө үзэмжийн хувьд хот байгуулалтын норм дүрэмд нийцсэн байх ёстой. Энэ үзэсгэлэнд дэд бүтцийн бие даасан инженерийн байгууламжтай амины орон сууцнууд их байгаа нь олзуурхууштай байна. Ер нь цаашид төвлөрсөн шугам сүлжээнд хамаарахгүй бие даасан хангамжтай барилга, орон сууцыг Засгийн газраас түлхүү дэмжих бодлого барина. Мөн үзэсгэлэнд эрчим хүчний хэмнэлттэй технологиудыг танилцуулж байгаа нь их үр дүнтэй юм. Энэ бүгдээс дүгнэхэд “Барилга экспо 2013” үзэсгэлэн нь өмнөө тавьсан үүрэг зорилтоос гадна нийгмийн өмнө томоохон үүргийг гүйцэтгэж байгаа юм.
- Үзэсгэлэнд оролцож байгаа иргэд болон барилгын компаниудын зүгээс ямар санал хүсэлт тавьж байна вэ?
- Иргэдийн төлөөлөлтэй уулзлаа. Тэд орон сууцны моргейжийн зээлийн талаар маш их асууж, үүнийг ихээхэн дэмжиж байгаа илэрхийлсэн. Орлогын тооцооны хувьд зөвхөн цалин хөлс гэлтгүй нийгмийн халамжаас тогтмол олгодог тодорхой орлогуудыг нэмж тооцох саналыг гаргаж байсан. Мөн зээлийн эх үүсвэр байгаа юу гэдгийг лавлаж байгаа. Өмнө олгож байгаа зээл нь төрийн албан хаагч байх ёстой, анх удаа орон сууц авч байгаа зэрэг шалгуурыг тавьж байсан, одоо олгох зээлэнд хязгаарлалт байгаа үгүйг ихээхэн асууж лавлаж байна.
Барилгын компаниудаас санхүүжилт олгох хүсэлтийг их тавьж байна. БХБЯ эдгээр компаниудыг бүртгэж арилжааны банкуудтай холбож, хөнгөлөлттэй зээлэнд хамрагдах боломжийг олгох талаас нь ажиллана.
Сайд үзэсгэлэнд оролцогч компаниудтай танилцаж байна.
Сайд иргэдийн төлөөлтэй уулзаж байна
БХБ-ын сайд Ц.Баярсайхан, БХБЯ-ы СБТГ-ын дарга Г.Мэргэнбаяр нарыг үзэсгэлэнд оролцогч гадаад компаний төлөөллүүд хүлээн авч уулзав.
