Барилгын ханган нийлүүлэгчдийн уулзалт боллоо
“Барилга экспо 2013” олон улсын үзэсгэлэн яармагийн 2 дахь өдрийн үйл ажиллагаа “Барилгын ханган нийлүүлэгчдийн уулзалт”-аар эхэллээ.
Уулзалтанд БХБЯ, Гаалийн ерөнхий газар, Стандарт хэмжил зүйн газар зэрэг төрийн байгууллагын удирдах ажилтнууд хүрэлцэн ирж барилга, барилгын материалын салбартай холбогдох эрх зүйн орчин, шинээр хэрэгжиж байгаа хөтөлбөр, стандартуудын талаар мэдээлэл хийсэн. Үргэлжлүүлэн уулзалтанд оролцогч төрийн байгууллагын удирдлагууд болон Барилгын худалдаа, импортын бизнес эрхлэгчид барилгын материалын салбарт тулгамдаж байгаа асуудал, шийдвэрлэх гарцын талаар хэлэлцүүлэг өрнүүлсэн бүтээлч уулзалт болж өнгөрлөө.
Ингээд уулзалтын үеэр тавигдсан илтгэлүүдээс хүргэе.
БХБЯ-ны Барилга, барилгын материалын хэрэгжилтийг зохицуулах газрын дарга Б.Цэдэнсамба “БХБЯ-аас барилгын материалын чиглэлд баримталж буй бодлого чиглэл” –ийг таницуулсан.
Тэрээр манай орны барилгын салбар бол цаг агаарын байдлаас шалтгаалж богино хугацаанд эрчимтэй үйлдвэрлэл явуулдаг гэдгийг онцлоод ажиллах хүч дутагдалтай, импортын барилгын материалын хараат байдалд байдаг гэх мэт салбарт тулгамдаад буй хүндрэлүүдийн талаар дурьдлаа. Мөн жилийн ердөө 220 орчим хоногт барилгын ажил үргэлжилдэг, үүнээс шалтгаалж мэргэжлийн ажилчид тогтвортой ажилладаггүй, аюулгүй ажиллагаа алдагддаг, яарч сандарч хийдгээс чанаргүй барилга барьдаг гээд олон дутагдал гардаг. Тиймээс өнөөдрийн хэрэглэж байгаа нойтон технологи буюу карказ цутгах технолгиос аль болох татгалзаж жилийн дөрвөн улиралд ажлаа үргэлжлүүлэх боломжтой угсармал барилгуудыг барьж байх зорилго тавьж байгаа гэлээ. Энэ нь манайх шиг газар хөдлөлтийн идэвхитэй бүсэд оршдог эрсдэлтэй газрын хувьд хамгийн тохирсон технологи гэнэ. Барилгын материалын импортын хамаарлаас гарахын тулд олон арга хэмжээг хэрэгжүүлж байгааг танилцуулсан. Тухайлбал, барилгын материал үйлдвэрлэх хүсэлтэй 100 гаруй компаниас өргөдөл ирснээс эхний ээлжинд хамгийн боломжтой төслүүдийг шалгаруулж хөнгөлөлттэй зээл олгохоор судалж байгаа, импортын 70 гаруй компанид 7 хувийн хүүтэй, 220 тэрбум төгрөгийн зээл, барилгын материал үйлдвэрлэгч 35 компанид 5.5 хувийн хүүтэй 70 орчим тэрбум төгрөгийн зээл өгөхөөр шийдвэрлэсэн гэлээ. Мөн энэ онд ашиглалтанд оруулах шаардлагатай барилгуудад зориулж 300 тэрбум төгрөгийн зээл олгох ажээ.
Дэлгэрэнгүй илтгэлийг Энд дарж татаж авна уу
Гаалийн ерөнхий газрын Хууль эрх зүйн хэлтсийн гаалийн улсын байцаагч Ч.Эрдэнэбат “Гаалийн эрх зүйн орчин, Гааль бизнес ажиллагаа” сэдвээр мэдээлэл хийсэн.
Тэрээр Гаалийн ерөнхий газар нь үйл ажиллагаандаа Эрсдэлийн болон логистикийн менежментийг нэвтрүүлэн ажиллаж байгааг дурьдаадимпорт, экспортын барааг хий гаалиар нэвтрүүлэх ажлыг илүү шуурхай болгохын зэрэгцээ улс орны аюулгүй байдлыг хэрхэн хангаж ажиллах вэ гэдэг дээр анхаарал хандуулах үүднээс гаалийн тухай, гаалийн тарифын тухай хуулийг шинэчилж байгаа гэлээ. Цаашид гаалийн бүрдүүлэлт хийх ажлыг аль болох нүүр тулж хийхээс зайлсхийдэг болно гэв. Өнөөдрийн байдлаар манай улсад гаалийн бүрдүүлэлт хийхэд 60 хоног зарцуулж байна, гэтэл Германд ердөө 3 хоногт энэ ажлыг амжуулдаг. Тиймээс шинэ хуулийн зохицуулалтаар гаалийн бүрдүүлэлт хийх ажлыг богино хугацаанд, цөөн хэмжээний материал шаардагдаж хялбар зохион байгуулдаг болно гэлээ.
Дэлгэрэнгүй илтгэлийг энд дарж татаж үзнэ үү.
Стандарт Хэмжил зүйн газрын Стандарт тээвэр зохицуулалтын ахлах мэргэжилтэн Т.Энхтуул “Барилгын салбарын шинэ стандартын тухай” танилцууллаа.
Монгол улсын барилгын салбартихэвчлэн ISO болон Евро нормын стандартууд хэрэглэгддэг гээд 2011 оноос хойш шинээр батлагдсан болон хүчингүй болсон стандартуудыг танилцууллаа. Мөн барилгын салбар эрчимтэй хөгжиж, гадаадын дэвшилтэт техник технологи, шинэ нэр төрлийн барилгын материал, бүтээгдэхүүн ихээр орж ирэх болсон бөгөөд Монгол улсад тэдгээрт тохирсон стандарт байдаггүй. Тиймээс худалдаа эрхлэгчид тухайн бүтээгдэхүүнд тохирсон стандараа оруулж ирээд түр хэрэглэх зөвшөөрөл авсны үндсэн дээр борлуулалт хийх боломжтой гэнэ. \Эдгээр стандартын жагсаалтыг манай сайтаас дэлгэрэнгүй байдлаар үзэх боломжтой\.
