Нийслэл Улаанбаатар хотын анхны ерөнхий төлөвлөгөө 1952 онд хийгдсэн бөгөөд тухайн үед 500.000 хүн амтай байхаар төлөвлөжээ. Үүнээс хойш 1961 онд хотын ерөнхий төлөвлөгөөг дахин боловсруулсан байна. Ингэхдээ Улаанбаатар хотыг 10 жилээр хөгжүүлэх ерөнхий төлөвлөгөө боловсруулж, уг төлөвлөлтийн дагуу барилгажилтыг эмх цэгцтэй явуулжээ. Энэ үеэс хойш 1971, 1986 онуудад хотын ерөнхий төлөвлөгөөг шинэчлэн боловсруулж байсан бөгөөд 1986 он гэхэд Улаанбаатар хотын хүн амын тоо анх төлөвлөж байсан 500.000-д хүрээд байв.

       Өнөөдрийн байдлаар нийслэл хот маань даац хэтэрсэн автозамын сүлжээтэй, цөөхөн гудамжтай, байгаа хэдэн гудамж нь ногоон байгууламжгүй, зам талбай хомс гээд олон учир дутагдалтай байгаа. Иймээс Улаанбаатар хотын автозамын сүлжээг өргөтгөн хөгжүүлэх, гэр хорооллын дэд бүтцийг цогц байдлаар шийдвэрлэх зорилго бүхий “Гудамж  төсөл”-ийг хэрэгжүүлэхээр болсон. Энэ үүргийг Эдийн засгийн хөгжлийн сайд Н.Батбаяр, Хот байгуулалтын сайд Ц.Баярсайхан, Нийслэлийн Засаг дарга бөгөөд Улаанбаатар хотын захирагч Э.Бат-Үүл  нар хүлээсэн бөгөөд  
төслийн хөрөнгө оруулалтыг “Чингис” бондын санхүүжилтээр шийдэх аж.

       Төсөл нь автозамын сүлжээний уулзваруудыг шинэчлэн засах, шинэ зам, гудамжийг бий болгож, авто замын сүлжээний нэвтрэх чадварыг нэмэгдүүлэх зорилго бүхий “Хотын төв” дэд төсөл, гэр хороололд шинээр гудамжны сүлжээг бий болгож, инженерийн дэд бүтцийг цогцоор шийдэх “Гэр хороолол” дэд төсөл, хотын төвийн автозамын хэт ачааллыг бууруулах, нэвтрэх чадварыг дээшлүүлэх “Хурдны зам” төсөл гэсэн гурван дэд бүтэцтэй байх юм.

 

 

 

         “Хотын төв” дэд төслийн хүрээнд 119 шинэ гудамжтай болох бол зам тээврийн осол их гардаг, түгжрэл ихтэй Зуун айлын уулзвар, Өргөөгийн уулзвар, Гранд плазагийн уулзвар, Кёкүшютаүэрийн уулзвар зэрэг шилжих хөдөлгөөнд хүндрэлтэй Т хэлбэрийн 33 уулзварыг шууд нэвтрэх боломжтой 4 замын уулзвар болгон өөрчлөх аж.

 

 

 

 

        “Гэр хороолол” дэд төслийн хүрээнд гэр хорооллын 25 шинэ бичил төв байгуулах, төв болгонд инженерийн шийдэл бүхий дэд станцууд барих, байршил болон нягтралаас хамаарч 6 жижиг оврын цахилгаан станц байгуулахаар төлөвлөжээ. Мөн гэр хороололд 700 орчим км гудамж, автозамын сүлжээ барих гэнэ. Гэхдээ энэхүү дэд төслийг хэрэгжүүлэхийн тулд :

·         Гэр хорооллын мастер тѳлѳвлѳгѳѳг шинээр боловсруулах

·         Гэр хорооллын газрын шинэ менежмэнт бий болгох

·         Газар үл хѳдлѳх хѳрѳнгийн үнэлгээний компаниуд байгуулах

·         Мастeр Судалгааны ажил хийх

·         Хороо болгон зураг тѳслийн байгууллагуудтай хамтран ажиллах шаардлагатай байгаа юм.

 

 

 

Гэр хорооллын орхигдсон мастер төлөвлөгөөг шинээр боловсруулахдаа гудамжны стандартыг шинээр бий болгох, явган хүний өргөн зам тавих, шинээр тавигдах явган хүний замын  доогуур инженерийн шугам сүлжээ тавьж өгөх, гэрэлтүүлгийг  хийх зэрэг ажлыг тусгах аж. Ингэхдээ гэр хорооллын сонгосон хэсэгт зориулсан дахин төлөвлөлт хийж, төлөвлөлтийн дагуу автозам болон дэд бүтцийн тэнхлэгт орсон айлуудад нөхөн олговор олгож, инженерийн шугам сүлжээг хонгилын ситемээр шийдэх гэнэ.

 

 

 

 

        “Хурдны зам” төслийн хүрээнд 2013-2016 онуудад босоо болон хэвтээ тэнхлэгийн дагуу нийт 122 км хурдны зам тавихаар төлөвлөжээ. Үүнээс 2013 онд хэвтээ тэнхлэгийн дагуу 30 км урт Туулын хурдны зам (Баянзүрхийн товчоо – Азийн автозамын сүлжээний АН-3 тэнхлэг), босоо тэнхлэгийн дагуу  32 км урт Сэлбэ голын хурдны зам (Хандгайт – Яармаг) тавих бол 2013-2016 онд босоо тэнхлэгийн 15 км урт Баянголын хурдны зам (Баянголын ам – Туул гол),  23 км урт Баянхошууны хурдны зам (Баянхошуу – Яармаг),   9 км урт Бэлхийн хурдны зам (Бэлхийн ам – Сэлбэ гол),   13 км урт Улиастайн хурдны зам (Улиасайн ам – Туул гол)-уудыг тус тус тавих гэнэ.