Барилгын салбар болон бүтээн байгуулалтын ажил хаяанд ирлээ.

Орон сууцны үнийн өсөлтийн бурууг салбарынхан нь импортоор орж ирж буй барилгын материалтай холбож тайлбарладаг. Барилга хот байгуулалтын яамнаас барилгын салбарынхны ажил эхлэхээс урьтаж цемент, арматурын үнийг барихаар барилгын материал үйлдвэрлэгч компаниудад 265 тэрбумын зээл олгохоор болов.

Барилгын материалын үйлдвэрлэгч болон  импортоор оруулж ирдэг компаниудын төлөөлөл өнөөдөр Барилга хот байгуулалтын яаманд цуглаж үнийн саналаа хэлэлцлээ.

БХБЯ-ны зүгээс ууттай цементийг нэг тонныг нь 160.000, задгай цементийг 170000 төгрөгт барих санал гаргасан нь эсэргүүцэлтэй тулгарав. Э.Дэлгэрбаяр хэмээн өөрийгөө танилцуулсан эмэгтэйн ярьснаар бол “Импорт, дотоодын үйлдвэрийн цементийн үнийн хувьд өөр асуудал. Хөтөлийн задгай цементийн замын ангиуд шууд авчихдаг болохоор бараг олдоггүй. Бидний зүгээс задгай цементийг 170.000, ууттай цементийн тонн тутмыг нь 180.000 төгрөгөөр борлуулах саналтай байна.

Эрээнээс Зам-Үүд хүртэл тээвэрлэхэд бараг л Замын –Үүдээс нийслэлд ирэх хэмжээний зардал гардаг. Тээврийн зардал өчигдөр гэхэд 1000-гаар нэмэгдчихлээ. Тээвэрлэлт, юаны зөрүү, гааль гээд бидэнд бэрхшээл бий. Яамны үнийн саналыг бол хүлээн авах боломжгүй. Бид ууттай цементийн задлаад задгайгаар зарах юм уу. Задгай цементийн хувьд технологийн хувьд маш их ажиллагаатай учраас зардал өндөр гардаг” гэсэн тайлбарыг өглөө.  

Барилгын талбайд ууттай бус задгай цемент хэрэглэж байх албан ёсны журам гарсан юм байна. Гэхдээ тусгай зориулалтын тоног төхөөрөмж ашиглан задгай цементийг хүргэх ёстой. Манайд энэ бүх шаардлагыг хангасан 4-5 компани байдгийг үйлдвэрлэгчид ярив. Ингээд БХБЯ-ны холбогдох албан тушаалтнууд дахин хэлэлцэж задгай цементийг тонн тутмыг нь 175000, ууттайг нь 165000 төгрөгт үнийг нь барихаар боллоо.

Өнгөрсөн долоо, наймдугаар сард буюу барилгын салбарын ид оргил үед тонн цемент 200000-220000 төгрөгт хүрсэн. БХБЯ, импортлогч, үйлдвэрлэгчдийн тохирсон үнийн санал оргил үед ч үйлчлэхээр болсон юм.

Замын-Үүдээс Улаанбаатар хүртэл нэг вагон цементийн тээвэрлэлтийн зардал 1.100.000 төгрөг байдаг аж. Хүнд даацын машин механизмыг нийслэлд нэвтрүүлэхгүй байгаа учраас бага тоннын даацтай автомашинаар тээвэрлэж байгаа нь үнэ нэмэгдээд байгаа. Нефть импортлогчдод өгч валютын ханшийг тогтворжуулсан шиг юаны өсөлтийг зохицуулах тал дээр анхаарч үзээч.

Цементийг хямдхан нийлүүлсэн ч зуурмаг нийлүүлдэг компаниудын дийлэнх нь гадаад эзэнтэй учраас дуртай үнээ хэлдэг зэрэг саналыг БХБЯ-ны Барилгын материалын бодлого хэрэгжилтийн зохицуулах газрын дарга Э.Цэдэнсамбад уламжиллаа. Юутай ч барилгын салбарын улирал дуустал цемент, арматурын үнэ нэмэгдэхгүй байхаар болж гэрээнд гарын үсэг зурж зээлээ авахаар боллоо. Компаниудын хувьд зээлийн хэмжээ харилцан адилгүй олгогдох аж.

Б.Ирээдүй