Засгийн газраас 2011 онд “Агаарын бохирдлыг бууруулах, дулаан алдагдлыг багасгах, цахилгаан эрчим хүч хэмнэх чиглэлээр үйл ажиллагаа явуулж байгаа иргэн, аж ахуйн нэгж байгууллагад урамшуулал олгох журам”-ыг гаргасан билээ.

Энэхүү журмын дагуу Байгаль орчин, ногоон хөгжлийн сайд, Эрчим хүчний сайдын хамтарсан тушаалаар  зөвхөн дээрх чиглэлээр бүтээгдэхүүн үйлдвэрлэж, импортолж, худалдаалж буй иргэн, аж ахуй нэгж байгууллагуудыг шалгаруулж, урамшуулал олгох болсон байна.

Энэ ажлыг жилд хоёр удаа зохион байгуулах бөгөөд сайдын тушаалаар томилогдсон комисс шалгаруулалтыг хийх юм. Үүний зэрэгцээ  тухайн бүтээгдэхүүн үйлчилгээнээс авсан хэрэглэгчийн сэтгэл ханамжийн судалгааг  иргэдээс авсны үндсэн дээр  шалгаруулалтыг явуулах аж.

Шалгарсан иргэн, аж ахуй нэгж байгууллагын бараа бүтээгдэхүүнийг сурталчлах, гадны хөрөнгө оруулалтын зээл, тусламж авахад нь төрийн зүгээс баталгаа гаргаж өгөх болон бизнесийн үйл ажиллагааг нь дэмжин тухайн иргэн, байгууллагын үйл ажиллагаанаас хамаарч мөнгөн урамшуулал олгох юм байна.

Энэ удаад дөрөвдүгээр сарын 26-ны өдөр хүртэл иргэн, байгууллага аж ахуйн нэгжээсй материал хүлээн авч байгаа бөгөөд энэ жилийн хоёр дахь шалгаруулалт ирэх намар болох юм.

Б.Соёлмаа