Нийслэлийн Засаг дарга бөгөөд  Улаанбаатар хотын Захирагч Э.Бат-Үүл болон  АНУ-ын Азийн сангийн суурин төлөөлөгч Мелони К.Линдберг нар “Гэр хорооллын иргэдийн санал санаачлагыг дэмжих сан” байгуулах тухай болон “Мэдээлэл харилцаа холбооны технологи, иргэдийн мэдээллийг ашиглан хотын хог хаягдлын менежментийг сайжруулах төсөл”  хэрэгжүүлэхэд хамтран ажиллах тухай хоёр гэрээнд гарын үсэг зурлаа. Австралийн Олон улсын хөгжлийн агентлагийн санхүүжилтээр Азийн сангаас дээрх төслүүдийг хэрэгжүүлж байгаа юм.          “Гэр хорооллын  иргэдийн санал санаачлагыг дэмжих  сан” байгуулагдсанаар гэр хорооллын иргэд, оршин суугчдын ахуй амьдралыг сайжруулах, мөн хотын зүгээс авч хэрэгжүүлж буй нийтийн үйлчилгээний чанар, хүртээмжийг сайжруулахад чиглэсэн санал санаачлагыг дэмжин, энэ чиглэлээр төсөл хөтөлбөрүүдийг санхүүжүүлж, улмаар хэрэгжүүлэхэд нь дэмжлэг үзүүлнэ. Мөн гэр хорооллын иргэдийн амьдарлыг сайжруулах зорилгоор иргэдийн зүгээс гарсан шинэ санаа, санаачлагыг хөхүүлэн дэмжинэ.

          Азийн сангаас хэрэгжүүлж буй “ Улаанбаатар хотын гэр хороолол дахь үйлчилгээг сайжруулах” хөтөлбөрийн хүрээнд байгуулагдсан Гэр хорооллын ажлын албадын үйл ажиллагааг дэмжиж, албадыг тухайн хариуцсан хороод дүүрэгтээ идэвхитэй, иргэдэд хүртээмжтэй үйл ажиллагаа зохион байгуулахад нь туслах зорилготой юм. Мэдээлэл, харилцаа холбооны технологи, иргэдийн мэдээллийг ашиглан хотын хатуу хог хаягдлын менежментийг сайжруулах төсөл нь гэр хорооллын иргэдийн амьдрах орчинг сайжруулахад чиглэж байна. Ингэхдээ үйлчилгээ үзүүлэгч байгууллагуудад тооцох хариуцлагыг нэмэгдүүлж, байршил тогтоох GPS систем болон мэссеж ашиглан иргэдийн оролцоог нэмэгдүүлнэ. Улаанбаатар хотын Захирагчийн ажлын алба болон АНУ-ын Азийн сан нь 2012 оны 12 сараас хойш хамтран ажиллаж байгаа бөгөөд шинээр 10 гаруй гэр хорооллын ажлын албыг байгуулаад байна. Улаанбаатар хотын гэр хорооллын нийтийн үйлчилгээг сайжруулах чиглэлээр АНУ-ын Азийн сан “Улаанбаатар хотын гэр хороолол дахь нийтийн үйлчилгээг сайжруулах” хөтөлбөрийг 2012 оны 5-р сараас хэрэгжүүлж байна гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.