НИТХ-ын Тэргүүлэгчдийн хуралдаанаас нийслэлийн гудамж, замын хөдөлгөөнд ачааны автомашиныг цагийн хязгаарлалттай оролцуулах, түр зөвшөөрөл олгох журмын төслийг хэлэлцэн баталлаа.
Ачааны автомашиныг хотын төвийн зарим гудамжинд зөвшөөрөлтэй хөдөлгөөнд оролцуулах журам нь 2009 оноос эхлэн мөрдөгдөж эхэлсэн байна. Энэхүү журмаар бүх жин нь 3500 кг болон түүнээс дээш жинтэй ачааны автомашинд “С”, бүх жин нь 3500 кг-аас хэтрэхгүй жинтэй ачааны автомашиныг “В” гэсэн ангиллаар зөвшөөрөл олгож хөдөлгөөнд оролцуулж байсан. Тодруулбал  В ангиллаар зөвшөөрөл авсан автомашин 10:00-21:00 цагийн хооронд бага тойруугаас дотогш замууд, Энхтайвны өргөн чөлөө, Чингисийн өргөн чөлөө зэрэг гудамж, замуудад замын хөдөлгөөнд оролцохыг хязгаарласан байдаг бол “С” ангиллын  зөвшөөрөл авсан ачааны автомашин өдрийн 07:00-21:00 цагийн хооронд Энхтайваны өргөн чөлөөнд Геологийн төв лабораторийн баруун урд уулзвараас Офицеруудын ордон хүртэл, 1-р хорооллын 32-р байрны баруун уулзвараас “Саппоро” үйлчилгээний төвийн зүүн тойрог хүртэл, Ард Аюушийн өргөн чөлөө, Их тойруугаас дотогш  зэрэг  замуудаар хөдөлгөөнд оролцохыг хориглосон байдаг.

       Шинэчилсэн журмаар бол бүх жин нь 3500 кг болон түүнээс дээш жинтэй ачааны автомашиныг “С” ангиллаар гэж өөрчлөн, чиргүүлтэй автомашиныг “Е “ гэсэн ангиллаар түр зөвшөөрөл олгохоор болж байна. Мөн "В” ангиллын ачааны автомашиныг өдрийн 11:00-20:00 цаг болгон өөрчилж, С, СЕ ангиллын ачааны автомашиныг бага тойруугийн гудамж, замууд, Энх тайвны өргөн чөлөө, Чингисийн болон Энэбишийн өргөн чөлөө, Сөүлийн гудамж, усны гудамжинд 08:00-21:00 цагийн хооронд  замын хөдөлгөөнд оролцохыг хязгаарлахаар шинэчилсэн журамд тусгажээ. Харин цэвэр усны шугам хоолойн дуудлагын автомашин, дулааны шугам сүлжээний засвар дуудлагын автомашин, холбооны шугам сүлжээний гэмтлийн машин хотын зам барилга, засвар, арчлалт хамгаалалтын автомашин, хотын тохижилт үйлчилгээний автомашин, шуудан зөөврийн автомашин зэрэг ачааны автомашинууд зайлшгүй тохиолдлын үед замын болон дагалдах хуудсанд заагдсан маршрутаар хориглолсон замд нэвтэрч хөдөлгөөнд оролцох юм байна.
      Журам 2013 оны  4 дүгээр сарын 01-ний өдрөөс эхлэн мөрдөгдөнө. Харин нийслэлийн гудамж, замын хөдөлгөөнд ачааны автомашин оролцуулах түр зөвшөөрлийн хураамжийг 2013 оны 3 дугаар сарын 28-нд болох НИТХ-ын  ээлжит хуралдаанаар хэлэлцэн тогтооно. Өмнө нь ачааны автомашин замын хөдөлгөөнд оролцохдоо зөвшөөрөл авдаг байсан тогтолцоог өөрчилж зөвхөн хориглосон газар луу орохдоо түр зөвшөөрөл авах журамд шилжиж байгааг бөгөөд энэхүү түр зөвшөөрлийг Нийслэлийн тээврийн газраас олгодог болж байгаа юм байна.