Нийслэлийн өмнөх Засаг дарга болон дүүргүүдийн Засаг дарга нар эрх мэдлээ хэтрүүлэн ашиглаж, улмаар авлига авч хууль бусаар олгосон газар өдгөө 100 хол давжээ.

Эдгээр газрыг цэгцлэж, нийслэлийн өмчид буцаан авах ажлыг хэрэгжүүлэхээр нийслэлийн Засаг дарга Э.Бат-Үүл энэ сарын 15-ны өдөр захирамж гаргасан.

Өмнө нь Газрын тухай хуулийн заалтуудыг зөрчин дүүргийн Засаг дарга нар эрх мэдлээ хэтрүүлэн хотын суурьшлын бүсийн инженерийн шугам сүлжээ болон сүлжээнд холбогдохоор төлөвлөгдсөн газруудыг дуудлага худалдаа, төсөл шалгаруулалт явуулалгүйгээр газар эзэмших эрх олгосон гэгдэх нийт 30 иргэн, аж ахуйн нэгжийн 90 га газар, нийтийн эзэмшлийн гудамж, зам талбайд газар эзэмших эрх олгосон нийт 25 иргэн, аж ахуйн нэгжийн 2.3 га газар, мөн төрийн байгууллагын газар эзэмших эрхийг бусдад шилжүүлэн газар эзэмших эрх олгосон нийт 12 иргэн, аж ахуйн нэгжийн 60.8 га газрын эрхийг хүчингүй болгосон.

Оны өмнө газар эзэмших эрхээ цуцлуулсан  40 гаруй аж ахуйн нэгж, үүний дээр саяхан цуцлуулсан 105 иргэн, аж ахуйн нэгжийн нэр дээр хууль бусаар шилжээд байсан дээрх газрууд бүгд  нийслэлийн өмчид шилжих юм.

Эрх мэдлээ хэтрүүлсэн дарга нарын гарын үсгээр цохуулж авсан дээрх газруудад нийтийн  эзэмшлийн зам талбай, төрийн байгууллагууд, сургууль, цэцэрлэгийн эзэмшлийн газрууд олноороо багтаж байгаа.

Энэ мэтээр хууль зөрчин, эрх мэдлээ хэтрүүлэн ашиглаж, олгосон  газрын эрхийг цуцлах ажил цаашид үргэлжилнэ. Тиймээс төрийн тусгай хамгаалалттай газарт хууль бусаар олгосон газруудыг дээрх байдлаар цуцлахыг хотын даргаас хүсэж байна.

Уг нь төрийн тусгай хамгаалалттай газарт зөвхөн аялал жуулчлалын чиглэлээр үйл ажиллагаа явуулах  хувь хүн болон аж ахуйн нэгж байгууллагад зөвшөөрөл олгодог.

Өнөөдрийн байдлаар 80 гаруй аж ахуйн нэгжид энэ чиглэлээр үйл ажиллагаагаа явуулах зөвшөөрөл олгосноос Нүхтийн аманд гэхэд ердөө хоёрхон компани хууль тогтоомжийн дагуу ажиллаж байгаа. Харин бусад нь газраа хууль бусаар ашиглаж, тансаг зэрэглэлийн хаус сүндэрлүүлчихсэн байх жишээтэй.

Бас болоогүй дээр нь нэмээд гоёмсог хауснуудыг барих ажил үргэлжилж байна. Мөн тусгай хамгаалалттай газарт байрлах “Оргил” рашаан сувиллын эх ундарга болсон цамхгийн хажууханд арваад компани барилга барихаар бэлтгэл ажлаа базааж эхэлсэн байна. Хотын дарга аа.

Тэд хүний биед тустай эрдэс бодисоор элбэг “Оргил” рашааныг бүр соруулж байж барилга барих юм гэсэн.

Уг нь ямарваа нэгэн урсац ус, булаг шанд, рашааны эх ундаргаас 200 метрийн зайд барилга байгууламж барихыг хориглосон байдаг. Гэтэл энэ хуулийн заалтыг зөрчин нийслэлийн Засаг дарга асан Ц.Батбаяр нэлээд хэдэн газар олгосон байна.

Тодруулан нэг жишээ дурьдвал өнгөрсөн 2007 оны тавдугаар сарын 25-ны өдрийн 248 дугаар захирамжаар Хан-Уул дүүргийн арваннэгдүгээр хорооны нутаг дэвсгэр “Оргил” рашаан сувиллын баруун талд 0.9345 га газрыг орон сууц, чийрэгжүүлэлтийн зориулалтаар эзэмшүүлэхийг даалгасан байгаа юм. Гэтэл яг үнэндээ тус газарт чийрэгжүүлэлтийн төв бус харин гоёмсог хаус болж хувирсан. Түүний хууль бусаар олгосон газар үүгээр дуусахгүй. Зөвхөн “Оргил” рашаан сувиллын ойр орчимд л гэхэд арваар тоологдох газар байгаа.

Байгаль орчин, аялал жуулчлалын яамны өмнөх сайдууд ялангуяа Л.Гансүх тусгай хамгаалалттай газар буюу Нүхтийн аманд 193 иргэнд зуслангийн зориулалтаар газар олгосон нь өдийг хүртэл өргөжин тэлсээр бүхэл бүтэн хороолол болжээ.

Тэгэхээр нийслэлийн өмнөх Засаг дарга нарын хууль бусаар олгосон 100 гаруй газрын зөвшөөрлийг цуцалсан шигээ тусгай хамгаалалттай газрууд буюу Зайсан, Нүхтэд сүндэрлэсэн тансаг хаусны газруудыг цуцалж, хууль бус бүх зүйлийг арилгахыг  хотын даргаас хүсэж байна.

Ж.Баттуул

Эх сурвалж www.gogo.mn